×
Սարյան 6 հասցեն գուցե շատերի համար անմիջապես չի նույնականացվում In Vino-ի հետ, որքան էլ աչքերը փակ կարող են գտնել սիրելի գինու բարը։ Բայց Էմիլի համար այդ հասցեն ու իր սիրելի աշխատավայրը մեկ ամբողջություն են դարձել։ Երբ նրան հարցնում են՝ «որտեղ ես», չի ասում՝ «գործի եմ», ասում է՝ «Սարյան 6-ում եմ»։
Այստեղ են անցնում նրա օրերը գինու գիտելիքի, գինու մարդկանց եւ գինու զրույցների մեջ։ Այստեղ է նաեւ ձեւավորվել նրա ուղին այս ոլորտում։
«Դու ուր, սոմելյեն ուր»
Էմիլ Հակոբովն առաջին մասնագիտությամբ ատամնաբույժ է: Ավարտել է Երեւանի պետական բժշկական համալսարանը:
«Այդ մասնագիտությամբ շատ կարճ եմ աշխատել, բայց դեռ սովորելու տարիներին էլ զգացել եմ, որ ինձ դուր չի գալիս այն, ինչ ընտրել եմ: Բժիշկների ընտանիքով, հարազատներով շրջապատված՝ միշտ այդ խոսակցությունների մեջ եմ եղել՝ կմեծանաս, ատամնաբույժ կդառնաս: Բայց շատ անհետաքրքիր կլիներ, եթե ամեն ինչ իրենց գծած դասական ճանապարհով գնար»,- պատմում է Էմիլը:
Էմիլ Հակոբովը | Լուսանկարը՝ Մեդիամաքս
Գինու ոլորտում նա իր ուղին սկսել է 2024 թվականին. «Համալսարանում սովորելու ընթացքում կարճ ժամանակ հասցրել էի աշխատել նաեւ ալկոհոլի վաճառքի ոլորտում: Գործս ալկոհոլային խմիչքների տարբեր տեսակների հետ էր, բայց հետաքրքրությունս կենտրոնացած էր գինու վրա: Գինին չես կարող հենց այնպես վաճառել, պետք է պատմությունը պատմես, էմոցիա փոխանցես, իսկ ես գինեգործության մասին շատ մակերեսային գիտելիքներ ունեի:
Էմիլ Հակոբովը | Լուսանկարը՝ Մեդիամաքս
Համալսարանն ավարտելուց հետո Էմիլը որոշում է մեկ տարի ընդմիջում վերցրել, որ հասկանա` ի վերջո ինչով է ուզում զբաղվել:
«Մի երեկո մայրս ֆիլմ էր նայում Բուրգունդիայի գինեգործների ու սոմելյեների մասին: Ասաց՝ նայիր ինչպես են համտեսներ անում, ծիծաղելով ասացի՝ գուցե ես էլ որոշեմ ու սոմելյե դառնամ: Ասաց՝ դու ուր, սոմելյեն ուր: Հենց այդ պահին մտածեցի՝ ինչու չէ, կկարողանամ: Դրանից երկու շաբաթ հետո հանդիպեցի ընկերոջս, որը In Vino-ում է աշխատում, հարցրի՝ կարո՞ղ է ձեզ մոտ տեղ լինի գամ աշխատեմ, ասաց՝ հենց հիմա էլ կարող ես, ինքնակենսագրականդ ուղարկիր, տեսնենք: Երեք շաբաթ անց կանչեցին հարցազրույցի»:
«Իմ հասցեն Սարյան 6-ն է»
Էմիլը հիմա In Vino-ի գինու մասնագետներից է (wine specialist): Երբեմն կատակում է, որ ապրում է Սարյան 6 հասցեում եւ ինքն այստեղ «գործի չի գալիս»:
Էմիլ Հակոբովը | Լուսանկարը՝ Մեդիամաքս
«Երբ եկա In Vino, հասկացա, որ գիտելիքներս բազային են, շատ բան ունեմ սովորելու, ուստի սկսեցի գործից հետո էլի «գործի լինել», գրքեր կարդալ, տեսանյութեր դիտել գինեգործության մասին: In Vino-ում նաեւ նոր աշխատողների համար թրեյնինգներ են անցկացնում, ծանոթացնում գինեգործական աշխարհին, բայց գինու աշխարհը հսկայական է, անընդհատ սովորելու բան է ավելանում: 2025 թվականի ամռանը որոշեցի, որ պետք է Վրաստանում Wine & Spirit Education Trust (WSET) միջազգային կրթական ծրագրով սովորեմ: Այս մտքով կիսվեցի Մարիամի հետ (In Vino-ի համահիմնադրի-հեղ.), ասաց՝ ինչու ես Վրաստան գնում, շուտով WSET-ը գալիս է Հայաստան: Մի ամիս հետո բացվեց Armenian wine school-ը (AWS) ու միանգամից որոշեցի WSET Level 3-ն ընդունվել: Ընդունվեցի եւ հիմա պատրաստվում եմ ավարտական քննությանը: Սա շատ կարեւոր քայլ է իմ կյանքում: 2027 թվականին էլ նպատակ ունեմ ընդունվել Գերմանիայի Գայզենհայմի համալսարան՝ Գինու բիզնեսի եւ մարկետինգի բաժին»,- ասում է նա:
Էմիլ Հակոբովը | Լուսանկարը՝ Մեդիամաքս
Էմիլի նպատակն է, որ հայկական գինու մասին իմանան «հարավից` հյուսիս», «արեւելքից` արեւմուտք».
«Արդեն պատկերացում ունեմ՝ իմ կյանքում գինին ինչ տեղ է գրավում եւ ինչ տեղ դեռ պիտի գրավի: Ոլորտի ներսում տեսնում ես խնդիրները, հասկանում ես թերությունները, բայց նաեւ աշխարհին ներկայանալու ներուժը: Իմ կրեդոն է հայկական գինին հասանելի ու ճանաչելի դարձնել ամբողջ աշխարհին: Իհարկե, գիտակցում եմ, որ դա մեկ հոգու գործ չէ ու տասնամյակների աշխատանք է պահանջում»:
«Նվիրեցի էմոցիա ու հետ ստացա»
Էմիլը բժշկությունից գինու ոլորտ է բերել կարգապահությունն ու պատասխանատվությունը.
«Ութ տարի սովորել եմ այդ պատասխանատվության զգացումով, ինչը դարձել է բնավորությանս մասը: Հիմա չեմ ասի, որ այդ տարիները իզուր եմ ծախսել, քանի որ ձեռք եմ բերել այնպիսի հմտություն, որ ցանկացած գործ կկատարեմ պատասխանատվությամբ եւ կարգապահությամբ: Հիմա այդ հատկանիշներին ավելացել են աշխատանքում էմոցիաներ նվիրելը»:
Էմիլ Հակոբովը | Լուսանկարը՝ Մեդիամաքս
«Գինին ավելի շատ տրամադրության հետ համահունչ գնացող խմիչք է, եւ պետք է կարճ երկխոսություն ունենալ հաճախորդի հետ՝ նրա տրամադրությունը հասկանալու համար: Եթե վերցնեք հիասքանչ, ամբողջ աշխարհում հայտնի գինի եւ առաջարկեք այդ պահին վատ տրամադրություն ունեցող մարդուն, միեւնույն է, իրեն կարող է դուր չգալ: Այդ պահին իրեն դուր կգա ավելի թեթեւ ինչ-որ մի բան: Շատ կարեւոր է, որ հյուրն իրեն խաբված չզգա»,- պատմում է գինու մասնագետը:
«Հյուրերին սովորեցնում ենք գինու համն ընկալել»
Էմիլը ոչ միայն հաճախորդների, այլեւ GastroVino-ի հետ է նույն պատրաստակամությամբ երկխոսության մեջ մտնում, երբ հետաքրքրվում եմ, թե In Vino-ի ամենատեսանելի հատվածում՝ վաճառասեղանի վրա, ինչո՞ւ է ջրով լցված գինու տարբեր երեք գավաթ դրված:
Էմիլ Հակոբովը | Լուսանկարը՝ Մեդիամաքս
«Յուրաքանչյուրի մեջ 125 մլ ջուր է լցված, այնքան, որքան որ գինին պետք է լինի գավաթի մեջ: Երբ հաճախորդը, օրինակ, գավաթով սպիտակ գինի է ցանկանում, գավաթը դնում ենք սպիտակի համար նախատեսված ջրով գավաթի կողքը եւ գինին լցնում ջրի մակարդակին հավասար:
Սովորաբար գավաթի մեջ պետք է լինի 125 կամ 150 մլ գինի, սա ամբողջ աշխարհում ընդունված չափաբաժին է: Շատ կարեւոր է, որ գինին գավաթի մեջ բավականաչափ տարածք ունենա»,- մանրամասնում է նա:
Էմիլ Հակոբովը | Լուսանկարը՝ Մեդիամաքս
Երեք գավաթներից ամենափոքրը նախատեսված է սպիտակ, վարդագույն եւ փրփրուն գինիների համար. «Հիմա այնքան էլ թրենդային չէ, բայց մի ժամանակ փրփրունը լցնում էին երկար՝ flute բաժակների մեջ: Մենք փրփրունը մատուցում ենք այս գավաթներով: Այդ գինիները բարձր թթվայնություն ունեն եւ եթե լցված լինեն flute տեսակի երկար եւ նեղ բաժակի մեջ, տարածք չի լինի, որ գինին «բացվի»` կարող է այն թթու թվալ եւ դառնություն ունենալ համի մեջ: Երբ լցնում ենք սպիտակ գինու համար նախատեսված գավաթի մեջ, շփվում է թթվածնի հետ եւ բույրերը բացվում են»:
Էմիլ Հակոբովը | Լուսանկարը՝ Մեդիամաքս
Սպիտակի համար նախատեսվածից մի քիչ ավելի մեծ գավաթով մատուցվում են կարմիր գինիները. «Կարմիր գինուն մի քիչ ավելի շատ ժամանակ է պետք, որ բացվի, դրա համար մի քիչ ավելի լայն է գավաթը: Երբ գինին պտտում ենք բաժակի մեջ, սկսում է հաղորդակցվել թթվածնի հետ եւ ավելի շուտ բացվել: Իհարկե, հնացված, մարմնեղ գինիների համար օգտագործվում են դեկանտերներ»:
Մյուս գավաթը նախատեսված է հենց Արենի տեսակի գինի մատուցելու համար:
«Մեր բոլոր գավաթները Riedel ընկերության արտադրանքն են: Դեռ 1950-ականներին նրանք որոշեցին, որ ամեն խաղող պետք է ունենա իր համապատասխան գավաթը: Արենիից պատրաստված գինու համար նախատեսված գավաթները նման են Պինո նուարի գավաթներին, պարզապես դրանց բացվածքը մի քիչ լայն է: Այս երկու սորտերը նման բնավորություն ունեն»,- բացատրում է Էմիլը:
Էմիլ Հակոբովը | Լուսանկարը՝ Մեդիամաքս
Երբեմն համտեսների ժամանակ Արենի գինին լցնում է թե՛ սովորական կարմիրի, թե՛ Արենիի համար նախատեսված գավաթի մեջ եւ հյուրերին խորհուրդ է տալիս երկուսից էլ փորձել։
«Նախ ասում եմ՝ ըմպեք Արենիի գավաթից, հետո անցեք սովորական կարմիրի գավաթին, հետո կրկին վերադարձեք Արենիին։ Տարբերությունն այն է, որ Արենիի համար նախատեսված գավաթն ավելի ճիշտ է ցույց տալիս գինու համային բնութագրիչները։ Երիտասարդ գինիների դեպքում դա այդքան զգալի չէ, բայց հնացված Արենիի դեպքում տարբերությունը շատ մեծ է, կարծես տարբեր գինիներ լինեն։ Այս կերպ հյուրերին սովորեցնում ենք, թե ինչպես կարող է գավաթն ազդել գինու համն ընկալելու վրա»։
Արփի Ջիլավյան
Լուսանկարները՝ Դավիթ Ղահրամանյանի
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: