×
Բարմեն դառնալը Մարիայի երազանքը չի եղել, բայց իր կյանքն առանց սիրելի աշխատանքի արդեն չի պատկերացնում: Բարի մյուս կողմից մեզ ժպտացող աղջիկը խոստովանում է՝ ժամանակին «խայտառակ չշփվող» էր, բայց հիմա ամեն ինչ այլ է:
Կոկտեյլների եւ մարդկային շփման բոլոր նրբություններին տիրապետող բարմենն այժմ հասցնում է եւ զրուցել բարի դիմաց նստող մարդկանց հետ եւ կռահել նրանց նախընտրելի համերը:
GastroVino-ի հետ զրույցի ընթացքում Մարիա Մանուկյանը պատմել է բարմենի աշխատանքը սովորելու, համեր ստեղծելու եւ մրցույթներում կրեատիվ մնալու մասին:
«Ամեն օր աչքի պոչով հետեւում էի»
16 տարեկան էի, համալսարանում սովորելու տարիներին զուգահեռ սկսեցի մատուցող աշխատել: Սովորում էի Հայ-Ռուսական համալսարանի «Լեզվի տեսություն և միջմշակութային հաղորդակցություն բաժնում»: Ընկերներիցս մեկը, ում հետ այդ ժամանակ աշխատում էի, բավականին հմուտ բարմեն էր, տարբեր մրցույթների մասնակցած եւ բարձր հորիզոնականներ զբաղեցրած: Ամեն օր աչքի պոչով հետեւում էի, թե ինչպես է կոկտեյլներ պատրաստում: Խնդրեցի, որ ինձ էլ սովորեցնի, եւ երբ գործի ընթացքում շատ պիկ էր լինում, թողնում էր, որ ես պատրաստեմ այն կոկտեյլները, որոնք արդեն գիտեի:
Մարիա Մանուկյանը | Լուսանկարը՝ Մեդիամաքս
Երկու տարուց մի քիչ պակաս մատուցող աշխատելուց հետո Simona բարում անցա աշխատանքի: Ամեն ինչ այնտեղից էլ սկսվեց: Սկզբում բարմենի օգնական էի, հետո դարձա բարմեն, հետո՝ միքսոլոջիսթ, հիմա արդեն բար մենեջեր եմ աշխատում եւ Simona-ում, եւ Bar Phoenix-ում:
«Գալիս ասում էին՝ բարմենին կկանչեք»
Երիտասարդ էի, մտավախություններ չունեի, կստացվի այդ գործն ինձ մոտ, թե չէ, բայց երբ սկսեցի աշխատել, ինչ-որ բան ապացուցելու ցանկություն կար մոտս: Առաջին կին բարմեններից էի եւ պետք է այնպես անեի, որ մարդիկ ընկալեին՝ կին, թե տղամարդ՝ տարբերություն չկա այս գործում:
Մարիա Մանուկյանը | Լուսանկարը՝ Մեդիամաքս
Բարի հետեւում կանգնած էի լինում, գալիս ասում էին՝ բարմենին կկանչե՞ք կամ կոկտեյլ էին պատվիրում, բարի մյուս կողմում պատրաստում բերում էի, խմում եւ ասում էին՝ շատ համեղ էր, որ խնդրեմ բարմենին կասե՞ք մի հատ էլ սարքի: Սկիզբը դժվար էր, եղել են պահեր, որ անգամ մտածել եմ հրաժարվել այս գործից: Այն ժամանակ դժվար էին ընդունում կին բարմենի, բայց վերջին տարիներին այլեւս նման կարծրատիպեր չկան:
Հիմա կանայք ոչ թե ուղղակի բարմենի օգնական են, այլ ավելի լուրջ են զբաղվում այս գործով: Բարմենական հավաքույթներից մեկի ընթացքում աղջիկներից մեկը մոտեցավ ինձ եւ ասաց՝ ես եմ ոգեշնչել իրեն, որ ընտրի այս գործը: Այնքան հաճելի էր, այդպես հասկանում ես, որ ինչ անում ես՝ ճիշտ է:
Բարմենի աշխատանքը՝ գաստրոարվեստ
Բարմենի աշխատանքն էլ արվեստ է, գաստրոարվեստ: էլի ինչ-որ բան ես ստեղծում, կարող է այն այդքան էլ մնայուն չի իր տեսակով՝ ինչպես գիրքը, կտավը կամ երգը, բայց մարդու համար համ ես ստեղծում:
Մարիա Մանուկյանը | Լուսանկարը՝ Մեդիամաքս
Լավ կամ վատ առումով չեմ ասում, բայց ես այն քիչ բարմեններից եմ եղել, որ չի շտապել իր հեղինակային համը՝ կոկտեյլը ստեղծել: Ուզում էի կոկտեյլ պատրաստելու տեխնիկան ամբողջությամբ հասցնեի այնպիսի մակարդակի, որ ինձ չշեղեր, եւ նույնիսկ, եթե նոր բան ստեղծելու կամ ընթացքից սարքելու լինեի, տեխնիկան ինձ հուսախաբ չաներ: Բարմեն աշխատելուց մոտավորապես մեկուկես տարի հետո եմ սկսել հեղինակային կոկտեյլներ ստեղծելու փորձեր անել: Այդ ընթացքում նաեւ Բարմենների հայկական ասոցիացիան ավարտեցի ու արդեն հանգիստ էի, որ կարող եմ ինձ թույլ տալ նաեւ հեղինակային գործերով զբաղվել:
Մարիա Մանուկյանը | Լուսանկարը՝ Մեդիամաքս
Շատերին թվում է, որ «շեյք» ես անում, ուրեմն բարմեն ես, բայց շատ բաների վրա պետք է կենտրոնանալ: Տեխնիկային տիրապետելուց բացի՝ պետք է խմիչքը ճանաչել: Օրինակ՝ եթե չաշխատեի կոնյակի հետ, երբեք չէի իմանա, որ այն, ինչն աշխատում է թափանցիկ խմիչքների հետ՝ ջին, ռոմ եւ այլն, չի աշխատում կոնյակի հետ: Պետք է նաեւ ճանաչել մարդկանց քիմքը: Այս ամենը ժամանակ է պահանջում:
Հիմա, երբ հաճախորդ է մտնում բար, մոտավոր հասկանում եմ՝ ինչ պետք է առաջարկել: Թե ոնց եմ դրան հասել, ոնց եմ հասկանում, չեմ կարող բացատրել, բայց աշխատանքի բերումով այնքան մարդ ես տեսնում, շփվում, որ բնավորությունից սկսած մինչեւ քմահաճույքները կարողանում ես մոտավոր պատկերացնել:
Կոնտակտը բարի երկու կողմում
Մարդկանց լսելը, շփվելը մեր գործի մի մասն է, իրավունք չունենք դա չանելու: Լինում են պահեր, երբ դու չես տրամադրություն ունենում, ուզում ես ուղղակի պատրաստածդ շուտ տեղ հասնի եւ շարունակես գործդ: Բայց հաճախ բարմեններն են ստեղծում այն մարդու օրը, որը նստած է բարի մյուս կողմում: Երբ մարդիկ իրենց սիրելի բարմենն են ունենում, երբեմն նրանց հետաքրքրիր էլ չի, թե դու իրենց համար ինչ ես պատրաստելու:
Մարիա Մանուկյանը | Լուսանկարը՝ Մեդիամաքս
Ես շփվող չէի բացարձակ, խայտառակություն էր, կոնտակտը զրո էր: Հիմա հղկվել է շատ բաներ: Երբ նոր էի աշխատում, խոսել չէի սիրում, միայն գլխով էի անում: Անգամ Simona-ում այսպիսի բաներ էին ասում՝ եկեք մունաթով դեմքից համով կոկտեյլներ ստանալու: Հիմա արդեն գիտեմ՝ ինչպես ամեն մի մարդու մոտեցում ցուցաբերեմ:
Առաջին մասնագիտությունս՝ միջմշակութային հաղորդակցությունը, լեզուները եւս ինձ շատ են օգնել բարմենի գործում, քանի որ բացի հայերից՝ ամենատարբեր երկրներից ժամանած մարդկանց հետ ենք շփվում:
Մարիա Մանուկյանը | Լուսանկարը՝ Մեդիամաքս
Հիմա մշակույթ է փոխվել նաեւ բարի հակառակ կողմում գտնվողների մոտ, եթե այն ժամանակ գալիս ասում էին՝ մի համով բան խառնիր տուր, հիմա կոկտեյլների հետ կապված ամեն մի հարցով հետաքրքրվում են: Զգում ես, որ մարդկանց քո արած գործը հետաքրքրում է, ու դու ես իրենց ուսուցիչը, ինչպես մատուցես, առաջին տպավորությունը ոնց ստեղծես, այդպես էլ կգնա: Եթե ինձ էլ վատ կրթեին, ես էլ սեր չէի ունենա սրանով զբաղվելու:
«Ամեն անգամ իմ առջեւ նոր մարտահրավեր եմ դնում»
Բար մենեջերի գործը, կոկտեյլների հիմնական մենյուից բացի, զուգահեռ եւս մեկ մենյու հեղինակելն է: Սկզբից դժվարանում էի, հատկապես Phoenix-ում, որտեղ միայն կոնյակի հիմքով կոկտեյլներ են: Կոնյակի հետ աշխատելն արդեն բարդ է: Առաջին մենյուն կազմելու ժամանակ խառնաշփոթ էր մոտս, չէի պատկերացնում, ոնց պետք է աշխատեմ: Հիմա արդեն ամեն անգամ ավելի բարդ ու հետաքրքիր բան եմ ուզում ստանալ, գալիս եմ այստեղ ու ինքս իմ առաջ նոր մարտահրավեր եմ դնում: Դա ինձ հաճույք է պատճառում:
Լուսանկարը՝ Մեդիամաքս
Գաղափարները գալիս են պահի տակ, երբ կողքից մեկը ինչ-որ բան է ասում ու հուշում է ստացվում, կամ սուպերմարկետով քայլում եմ, ինչ-որ միրգ եմ տեսնում ու նոր կոկտեյլի գաղափար է ծնվում:
Bar Phoenix-ում միայն կոնյակի հիմքով կոկտեյլներ են, հիմնական մենյուի թեման ալքիմիան է: Մյուս՝ սեզոնային մենյուն The Queen-ն է՝ հայկական թագուհիների անուններից կազմված՝ Zabel, Urania, Tilama, Kostandia եւ այլն:
Լուսանկարը՝ Մեդիամաքս
Անունները փորձել եմ ընտրել կոկտեյլի արտաքին տեսքին համապատասխան: Զաբելին համարել են ամենամաքուր ու անբիծ թագուհին, համանուն կոկտեյլն էլ թափանցիկ տեսք ունի: Այն կաթով կտրված կոկտեյլ է: Ալկոհոլից եւ թթվային զանգվածից՝ կիտրոն, լայմ, կաթը կտրվում է, մեջը ավելացվում է արքայախնձորի հյութ, ARARAT Apricot, իսկ վրայի շերտը պատվում է կոկոս-վանիլի ֆոմայով: Այսինքն՝ կոկտեյլը պատրաստվում է բրենդիով, բայց այն թափանցիկ է դառնում կաթով կտրվելու շնորհիվ, որը չի թողնում, որ ծանր ագրեսիվ ալկոհոլային մասն անցնի կոկտեյլին, ինչի արդյունքում էլ շատ փափուկ համ է ձեռք բերում:
«Պետք է եւ կրեատիվ մնալ, եւ ճիշտ համ ստանալ»
Օգոստոսի 24-ին Սինգապուրում մասնակցեցի Asia-Pacific Coctail Competition 2022 մրցույթին, զբաղեցրեցի 4-րդ հորիզոնականը։ Առաջին 3 մրցանակային տեղերը համապատասխանաբար զբաղեցրել են Ֆիլիպինների, Ճապոնիայի և Ավստրալիայի ներկայացուցիչները։
Մարիա Մանուկյանը | Լուսանկարը՝ Մեդիամաքս
Այս տարի նոյեմբերի 4-9-ը Կուբայի Վարադերո քաղաքում մասնակցելու եմ IBA WCC 2022 կոկտեյլների աշխարհի առաջնությանը: Այն մի քանի փուլով է, որոնցից ամեն մեկում 6-7 երկիր է մասնակցում, ամեն մի խումբը մի կատեգորիա ունի, օրինակ՝ long drink, short drink, after dinner, ինձ բաժին ընկել է long drink-ը, որտեղ կարեւորը նորարարությունն է: Մրցույթում 15 րոպե պատրաստվելու ժամանակ է տրվելու եւ 5 րոպե՝ կոկտեյլը սարքելու համար: Պետք է այդքան ժամանակում կարողանաս եւ կրեատիվ մնալ, եւ ճիշտ համը ստանալ:
Ինչպես ցանկացած մրցույթից առաջ՝ բարմենների պարագայում էլ պետք է պարապել, նախապատրաստվել:
Արփի Ջիլավյան
Լուսանկարները՝ Էմին Արիստակեսյանի
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: