×
Շրջանակված Դիլիջանի անտառապատ լեռներով, դրամատիկ երկնքով, վինտաժային էկլեկտիկիզմով եւ շոշափելի ջերմությամբ մայիսի 27-ին կայացավ ռեստորանային քննադատ, գաստրոլրագրող Իվան Գլուշկովի եւ լեգենդար ARARAT կոնյակի «Երկրի աղը» համատեղ նախագծի երկրորդ ընթրիքը։ Այս անգամ Տավուշի համերն ու բույրերը բացահայտվեցին հունական մեկնաբանությամբ։
Լուսանկարը՝ Մեդիամաքս
Ըստ Իվան Գլուշկովի՝ Դիլիջանի համար հունական մոտիվներն ընտրվել են մի քանի ընդհանրությունների հիման վրա.
«Հայկական եւ հունական մշակույթների հիմնասյուներից մեկը կյանքն ու համը վայելելու ունակությունն է։ Մթերքի ու ոճի առումով Դիլիջանի հետ ընդհանրություն կա՝ բավականին բրուտալ, վառ խոհանոց, մեծ թվով մսեղեն (մասնավորապես՝ խոզի միս), բանջարեղեն, սունկ, գրիլ։ Այս ամենը հատվում է Հունաստանի հետ։
Իվան Գլուշկովը | Լուսանկարը՝ ARARAT
Ընթրիքի մենք ընտրել ենք Հայաստանի ամենահարգված ռեստորատորներից եւ վառ էսթետներից մեկի՝ Ժիրայր Ավանյանի Im Toon ռեստորանը. գեղեցկագույն, նշանային վայր, որն ինձ համար Դիլիջանի սիրտն է։
Դավիթ Հովհաննիսյանը, Ժիրայր Ավանյանը, Նիկիտա Բրեխովը եւ Կամո Ադուլյանը | Լուսանկարը՝ ARARAT
Ընթրիքի կոնցեպտը անփոփոխ է՝ հրավիրված շեֆ-խոհարարը տեղում ծանոթանում է մթերքին, ուտեստները պատրաստվում են «այստեղ եւ հիմա» սկզբունքով։
Ինչպես առաջին ընթրիքի ժամանակ, յուրաքանչյուր մատուցումն ուղեկցվում է ARARAT-ի կողմից հատուկ ստեղծված կոկտեյլներով, որոնք արեւի, օդի, ավանդույթների եւ հույզերի խտացում են»:
Հայկական մթերքի հունական տեսլականի պատասխանատուն էր մոսկովյան The Greeks ռեստորանի շեֆ-խոհարար Նիկիտա Բրեխովը՝ տաղանդավոր երիտասարդ շեֆերից մեկը, ում համար մասնագետները աստղային գաստրոնոմիկ ապագա են կանխատեսում։
«Ծնվել եւ մեծացել եմ Դոնի Ռոստովում, որտեղ շատ հայեր են ապրում։ Սակայն ծանոթ չէի հայկական խոհանոցին եւ երբ ժամանեցի Հայաստան, շատ հետաքրքիր բացահայտումներ արեցի. ռեժան, կանաչեղեն՝ սիբեխ եւ դանդուռ, պանիրներ՝ բորբոսով «Գյումրի» չեչիլ, մոթալ։
Լուսանկարը՝ ARARAT
Ես սովոր եմ իմպրովիզացիայի, սիրում եմ նոր բան ստեղծել մթերքի պատահական հավաքածուից՝ չբարդացնելով խոհանոցը եւ առանց շատ բաղադրիչներ խառնելու: Գալիք ընթրիքի մթերքը հաջողվեց հարմարեցնել հունական դասական խոհանոցին։ Կարծում եմ, որ շատ լավ ստացվեց: Փորձեցինք առավելագույնս օգտագործել ամեն ինչ՝ սեզոնային բանջարեղենը, մրգերը եւ հատապտուղները, ծառի սունկը, Դիլիջանի խոզի միսը։ Գրեթե բոլոր ուտեստները պատրաստվելու են գրիլի վրա՝ հունական սոուսներով»,- ասել է Նիկիտա Բրեխովը մեզ հետ զրույցում։
Լուսանկարը՝ Մեդիամաքս
Շքեղ տեռասում ողջույնի ARARAT կոկտեյլներից եւ շեֆ-խոհարարի կոմպլիմենտից հետո հյուրերը նստում են ջերմ նարնջագույն սփռոցներով ծածկված երկար սեղանների մոտ՝ սպասքավորված նկարազարդ ափսեներով, գունավոր գավաթներով եւ վայրի վառ ծաղիկների փնջերով: Կռածո բյուրեղյա ջահեր, հնաոճ բուֆետներ, գունագեղ գորգեր խճանկարային սալիկապատ հատակների վրա, վառ նկարներ՝ ամեն ինչ շատ հյութալի է, գեղեցիկ եւ մթնոլորտային։
Ձաձիկին | Լուսանկարը՝ ARARAT
Ինչպես նախորդ անգամ, ճաշատեսակները չեն մատուցվում անհատական, այլ սեղանին դրվում են ընդհանուր ափսեներով, որպեսզի հյուրերին հնարավորություն ընձեռվի կիսվել եւ հյուրասիրել:
Մութաբալը | Լուսանկարը՝ ARARAT
Նախուտեստներ են՝ մածունից ձաձիկին՝ վարունգով, անանուխով, աջիկայով թրմված ձեթով, կրակի վրա խորոված սմբուկից մութաբալը՝ հայկական խոտաբույսերով եւ սխտորով, քաղցր մուհամարան՝ խորոված կարմիր պղպեղով, լոլիկով եւ ընկույզով։
Մուհամարան | Լուսանկարը՝ ARARAT
Խյուսերի համար ARARAT թիմի բարտենդեր Դավիթ Հովհաննիսյանն առաջարկում է թարմեցնող ապերիտիվ կոկտեյլ «Տաթեւեր», որի հիմքում ARARAT APRICOT-ն է ՝ թրմված չամանի սերմերով, վարունգի ֆրեշի, լեռնային ուրցի, լայմի հյութի եւ վանիլի օշարակի անսովոր հավելումներով:
«Տաթեւեր» կոկտեյլը | Լուսանկարը՝ ARARAT
Բլղուրով, թարմ քաղած կանաչիով եւ «Վինեգրետ» սոուսով «Թաբուլե» աղցանին հաղորդվել է դիլիջանյան երանգ՝ քերած այծի պանիր։ Ծխով պատված ծառի սունկը մատուցում են թթվաշ դանդուռի հետ ֆանտաստիկ համադրությամբ, իսկ թարմ կարտոֆիլը՝ վրան առատորեն լցված հալած ռեժանով:
«Ելակ» կոկտեյլը | Լուսանկարը՝ ARARAT
«Ելակ» կոկտեյլը լրացնում է գունեղ պատկերը՝ կոնտրաստ ստեղծելով ազնվամորու համով թեթեւ գազավորված ջրի, ելակի օշարակի, կամպարիի դառնության եւ ելակի ու չորացրած վարդի վրա թրմված ARARAT Coffee-ի սուրճի հետհամի շնորհիվ:
Իշխան | Լուսանկարը՝ ARARAT
Հիմնական ուտեստներն են՝ ածուխի վրա պատրաստված նուրբ վարդագույն Սեւանի իշխանը՝ պղպեղից, լոլիկից ու ձիթապտղից պատրաստված հրաշալի սոուսով եւ անուշաբույր դիլիջանյան խոզի միսը՝ շոգեխաշած 12 ժամվա ընթացքում։ Ըստ ավանդույթի, տաք ուտեստները մատուցվում են 7-ամյա ANI կոնյակով։
Շոգեխաշած խոզի միսը | Լուսանկարը՝ ARARAT
Աղանդերը նրբագույն պանակոտան է՝ մածունից, լեռնային անանուխի թեյով, կրակի վրա պատրաստված թթու ծիրանով, անանուխի յուղով եւ սեւ թութով։
Լուսանկարը՝ ARARAT
Եվ վերջնական նոնակորդը ARARAT-ից՝ սալորով եւ չամանով թրմված ARARAT CHERRY-ի հիման վրա պատրաստված «Գոհար» կոկտեյլը՝ տնական դեղձի յոգուրտով, MOZART լիկյորով, աղի կարամելային օշարակով եւ սպիտակ շոկոլադե մանր նրբաշերտով:
«Գոհար» կոկտեյլը | Լուսանկարը՝ Մեդիամաքս
Էսթետիկ ընթրիքի լավագույն ավանդույթներին համաձայն, կոկտեյլի վերջին կումը համընկնում է ամպրոպի հետ, որը ներխուժում է շարժական դռների միջով, հորդառատ անձրեւի ձայնը լցնում է ամբողջ տարածությունը՝ ավարտին հասցնելով եւս մեկ գեղեցիկ, հիշվող երեկո:
Աննա Բուբուշյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: