×

Papanino House-ի «իտալական» անունն ու շեֆի «սյուռ» համերը

«Լավագույն բանը, որ մեզ հետ կարող էր լինել Հայաստանում՝ այս ռեստորանը գտնելն ու այնտեղ ժպտերես Ջոյի, շեֆ Խորենի ու Հայաստանի գինու հետ ծանոթությունն էր»:

Սա այն բազմաթիվ գերազանց գնահատականով «ռեվյուներից» մեկն է, որի շնորհիվ Դիլիաջանում գտնվող Papanino House ռեստորանը ամենամեծ ճամփորդական կայքից՝ Tripadvisor-ից ստացել է Travelers’ Choice Winner 2020-ը եւ ընդգրկվել աշխարհի 10% լավագույն ռեստորանների ցանկում:

Տիգրան եւ Անահիտ Սաֆարյանները եւ Խորեն Հարությունյանը


Ռեստորաններին այս վարկանիշում ներառելու «գործը» բացառապես պատկանում է այցելուներին: Tripadvisor-ում թողած գնահատականներից ու մեկնաբանություններից երեւում է, որ դիլիջանյան հին կոլորիտային տուն հիշեցնող ռեստորանը անտարբեր չի թողել ոչ տեղացիներին, ոչ էլ՝ զբոսաշրջիկներին:

Papanino House-ի ստեղծման, այցելուների տպավորությունների ու խոհանոցային առանձնահատկությունների մասին GastroVino-ն զրուցել է ռեստորանի հիմնադիր Տիգրան Սաֆարյանի ու շեֆ-խոհարար Խորեն Հարությունյանի հետ:

Ինչպես սկսվեց ամեն ինչ

Տիգրանն ամեն ռեվյուն կարդալիս հիշում է, թե ինչպես էր անցնում ժամանակին մոլոկաններին պատկանող տան կողքով, նայում պատշգամբին, դարպասի վրա գրված «վաճառվում է»-ին ու որոշում՝ «վերջ, պետք է գնել ու սկսել ամեն ինչ»:

Մասնագիտությամբ իրավաբան եւ ֆինանսիստ ամուսինները՝ Տիգրանն ու Անահիտը ռեստորանը բացել են 2018-ի դեկտեմբերին:

«Այսօր ողջ թիմով հատիկ-հատիկ կարդում ու վերլուծում ենք յուրաքանչյուր ռեվյու, քննարկում ու դիտարկում բոլոր խորհուրդները, ոգեշնչվում դրական արձագանքներից եւ աշխատում մեր թույլ կողմերի վրա: Սա եւ հաճելի է, եւ պարտավորեցնող»,- ասում է Տիգրան Սաֆարյանը:

Նրա խոսքով՝ ստացված արդյունքը նաեւ Papanino-ի անձանկազմի աշխատանքային խստության եւ նվիրվածության շնորհիվ է, իսկ թիմը հավաքելը հիմնադիրը «ամենասթրեսային պահերից» մեկն է համարում:

Տիգրան Սաֆարյանը


Այսօր ռեստորանի անձնակազմում աշխատողների մեծ մասը տավուշցիներ են, իսկ շեֆ-խոհարար Խորեն Հարությունյանն ու սպասարկման մենեջեր Ջո Պետրոսյանը Երեւանից են տեղափոխվել Դիլիջան։

Տեղացիներին հարազատ ու զբոսաշրջիկների «լեզուն չկոտրող» անունը

Ռեստորանի համար անուն ընտրելը ամենադժվար բաներից մեկն է եղել:

«Papanino House-ը գտնվում է Դիլիջանի Պապանինո թաղամասում, որից էլ ծնվել է անունը: Շատ զբոսաշրջիկներ են գալիս հարցնում՝ ինչո՞ւ եք իտալական անուն ընտրել: Պատմում ենք, որ այն թաղամասի անունն է, որը ժամանակին մոլոկաններով բնակեցված գյուղ է եղել, հետո միացել Դիլիջանին ու նրա մաս է կազմել: Գյուղը ռուս հայտնի ճանապարհորդ, նավագնաց Պապանինի անունով է կոչվել:

Արդյունքում՝ ստացանք անուն, որը հարազատ է տեղացիներին, իսկ արտասանելիս օտարազգի զբոսաշրջիկների լեզուն «չի կոտրում»»,- ասում է ռեստորանի հիմնադիրը:

Գնահատականների լայն աշխարհագրությունը

Tripadvisor-ում ռեստորանի մասին մեկնաբանություն թողած այցելուներից ոմանց ռեստորանի աշխատակիցներն անգամ դեմքով են հիշում:

Ավստրալիա, Իտալիա, Հարավային Ամերիկա, Ռուսաստան, Մերձավոր Արեւելքի երկրներ, դե իհարկե, նաեւ Հայաստան. այցելուների ու նրանց թողած գնահատականների աշխարհագրությունը մեծ է:

Խորեն Հարությունյանը (ձախից)


«Ավստրալիայից այցելուներ ունեինք, որոնք ռեստորանի մասին իմացել էին Tripadvisor-ից, եկել էին Դիլիջան ու գտել մեզ: Այցից հետո չուշացավ իրենց տպավորությունների մասին պատմող մեկնաբանությունը: «Գերազանց» ենք ստացել նաեւ Tripadvisor-ում պրոֆեսիոնալ ռեվյու գրող գերմանացի զբոսաշրջիկից, ում մեկնաբանությունների քանակը կայքում անցնում է 1500-ից»,- պատմում է Տիգրանը ու նշում, որ նման գնահատականներ տեսնելիս հասկանում են՝ ճիշտ ճանապարհի վրա են:

Ստեղծագործելու ազատություն ստացած ու Դիլիջանին սիրահարված շեֆը

Խորենը խոստավանում է՝ սիրահարված է Դիլիջանին ու Papanino-ին, որտեղ ստեղծագործելու բացարձակ ազատություն է ստացել:

Հեղինակային բաղադրատոմսերի առումով լիբերալ շեֆն ասում է, որ չի կարող ինչ-որ բան ստեղծել ու պահել ինքն իր համար. «Ուտելիքի մեջ ամենագաղտնի բաղադրիչը խոհարարի ձեռքն է, ում ներաշխարհը փոխանցվում է պատրաստածին: Դրա համար ընդհանրապես չեմ վախենում բաղադրատոմսերով կիսվելուց, դրանք հյուրերին տրամադրելուց ու նրանց համար վարպետության դասեր անցկացնելուց: Թող իմ բաղադրատոմսերով պատրաստեն մարդիկ, ես դրանից շատ եմ ուրախանում, լինում են դեպքեր, որ նկարում եւ ուղարկում են իրենց պատրաստած ուտեստները»:


Թողած «ռեվյուներից» երեւում է, որ բացի համեղ ուտելիքներից՝ այցելուներին շատ է գրավել նաեւ Papanino-ում շեֆ խոհարարի հետ կենդանի շփման մշակույթը:

«Աշխատանքային պիկերի ժամանակ խոհանոցում «դիրիժորություն» պետք է անի շեֆ խոհարարը, իսկ ժամանակ ունեցած դեպքում էլ գնա հյուրերի մոտ, շփվի նրանց հետ»,- ասում է Խորենը, Տիգրանն էլ լրացնում՝ այցելուն պետք է ճանաչի ռեստորանի շեֆին:

Papanino-ի «սյուռ» տոլման, ֆիրմային աղցանն ու Դիլիջանի խոզը

Խորենը հայկական ուտեստներին այնքան լուրջ է վերաբերվում, որքան իր արմատներին, սակայն դա նրան չի խանգարում ունենալ իր՝ «ոչ ավանդական» հայկական խոհանոցը:

Ասում է, որ անգամ 5 րոպեում կարող է ինչ-որ նոր գաղափար ծնվել ու հիշում Papanino աղցանի ստեղծմանը օրը․


«Papanino աղցանը ծնվել է նախագահ Արմեն Սարգսյանի՝ մեր ռեստորան այցելելու օրը: Բամիայից, տանձից, զեյթունից, լոլիկից բաղկացած աղցանն այսօր դարձել է մեր ամենապահանջված աղցաններից մեկը: Բամիան տիպիկ հայկական մթերք է, բայց շատ քիչ ռեստորաններ ու խոհարարներ են այն օգտագործում, շատերն ասում են՝ «արտաքինից սիրուն չէ» (ժպտում է-հեղ.)»:

Խորենն ասում է, որ ընդհանրապես մթերքի հետ պետք է ճիշտ ու արդյունավետ աշխատել, ավելցուկ մասերը օգտագործել այլ ուտեստների մեջ ու կիսվում «սյուռ» տոլմայի ստեղծման պատմությամբ:


«Գառի սրունքով ուտելիք էի պատրաստում ու այնպես էր լինում, որ ինչ-որ մասեր էին ավելանում, դրանք «սլոու քուքինգ» (դանդաղ եփում) արեցի, լցրեցի խորոված սմբուկի վրա, հետո տոլմայի համար նախատեսված խաղողի թուփը տապակեցի ձիթայուղի մեջ, դարձավ չիփս, սրանց կողքին բրինձ ավելացրեցի: Այսպես ստացանք մեր մենյուի «սյուռ» տոլման, չփաթաթված, բայց տոլմայի համով»:

Վանա քաշովին


Հայաստանցի ու օտարերկրացի այցելուների նախասիրություններին անդրադառնալով՝ Խորեն Հարությունյանն ասում է, որ սիրում է «հեղափոխել» մշտական ուտեստներ նախընտրող զբոսաշրջիկներին: «Օրինակ՝ Վանա խաշ, Վանա քաշովի կամ նման այլ հայկական ուտեստներ եմ առաջարկում, կամ ավելուկով բրուսկետաներ», - պատմում է նա:

Համավարակի շրջանում ներքին զբոսաշրջիկների համար հայկական իշխանով Սեւիչե են պատրաստում:

Խորեն Հարությունյանը եւ Տավուշի խոզի խորովածը


Ինչ վերաբերում է շատերի կողմից սիրված Դիլիջանի խոզի խորովածին՝ շեֆն ասում է. «Աշխարհում կա խոզի միս եւ կա Տավուշի խոզի միս: Մենք հայկական խոհանոցում բրենդավորված մթերքներ, ուտելիքներ չունենք, իսկ Տավուշի խոզի միսը կարող է բրենդ դառնալ: Հայաստանում դա արդեն գիտեն, բայց պետք է այնպես աշխատենք, որ աշխարհում եւս իմանան Տավուշի խոզի մսի մասին, որը շատ բարձր որակի է»:

Արփի Ջիլավյան

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:


Կարդալ ավելին