×

Մելինե եւ Լիլի Միրիջանյանները Լուսանկարը՝ Մեդիամաքս

Mirijanyan pastry-ի առօրյան, ճամփորդող հրուշակագործն ու մակարոնները

Շտապողականությունն ու հետաքրքրասիրությունը կարող են վայրկյանների ընթացքում փչացնել նույնիսկ ամենալավ բիսքվիթը։ Մինչ սկսնակներն անընդհատ ուզում են վերահսկել պատրաստման ընթացքը, փորձառու հրուշակագործները բիսքվիթի եփվածությունը հասկանում են մի հայացքով, բույրով կամ ձեռքի թեթեւ հպումով։

Մասնագիտությամբ ճարտարապետ-դիզայներ, աշխատանքային բերումով հրուշակագործ Մելինե Միրիջանյանը սոցցանցի իր հետեւորդներին պարբերաբար պատմում է մասնագիտական գաղտնիքների մասին։ Հրուշակագործը խորհուրդ է տալիս բիսքվիթը ջեռոցում դնելու առաջին 30 րոպեներին չբացել դուռը եւ զգուշացնում՝ եթե ջեռոցից հանելուց հետո բիսքվիթն իջնում է, ուրեմն շտապել եք 5-7 րոպե, բայց էլ ոչինչ չեք կարող անել։

Մելինե Միրիջանյանն ասում է, որ 8 տարվա ընթացքում բազմաթիվ դասընթացների է մասնակցել, հետո իր գիտելիքներով կիսվել մայրիկի ու աշակերտների հետ։

GastroVino-ն այցելել է Mirijanyan pastry, որտեղ պատրաստում են տորթեր, թխվածքներ, կոնֆետներ, մակարոն (թխվածքաբլիթ) եւ մսային կիսաֆաբրիկատներ։ Խնայած գումարով բիզնես սկսելու, հրուշակարանի առօրյայի եւ յուրահատուկ միջուկներով մակարոնների մասին պատմել են Մելինե Միրիջանյանն ու նրա մայրը՝ Լիլի Միրիջանյանը։

Բիզնես՝ մայրիկի խնայած գումարով

Մելինե․18 տարեկանում զբաղվում էի ապակիների գեղարվեստական մշակմամբ՝ Մուրանո ապակուց պատրաստում էի զարդեր, սպասք, ինտերիերի դեկորներ ու վաճառում Երեւանի կենտրոնում վարձակալած խանութում։ Մի քանի տարի անց վարձակալության արժեքը բարձրացավ, ես էլ որոշեցի տեղափոխվել այլ վայր, բայց դրանից հետո հիասթափություն եղավ, երիտասարդ էի, ուսանող, բիզնես մտածելակերպ չունեի եւ այլեւս չզբաղվեցի այդ գործով։

2010-ից սկսած ընտանեկան միջոցառումներն էինք կազմակերպում։ Մայրս ու քույրս պատրաստում էին տորթերը, թխվածքաբլիթները, իսկ ես ավելի շատ դիզայնով էի զբաղվում։ Ամեն ինչ անում էինք «տնավարի», բայց այն տարիների համար, կարծես, վատ չէր ստացվում։ 2013-ին, երբ սկսեցի աշխատանք փնտրել, քրոջս ամուսինը հուշեց, որ այն, ինչ անում ենք ընտանեկան հավաքույթների համար, կարող է դառնալ բիզնես։ Մեկ գիշերում որոշեցինք ու մայրիկի խնայած գումարներով միջոցառումների կազմակերպման բիզնես սկսեցինք, ընկերությունը կոչվում էր «My party»:

Մելինե Միրիջանյանը Լուսանկարը՝ Մեդիամաքս


Սկզբում դժվար էր, ամսվա ընթացքում կարող էինք մեկ-երկու պատվեր ունենալ, աշխատանքները տանն էինք անում։ Այն ժամանակ «candy bar» անող ընկերությունները շատ չէին, ինտերնետից օգտվելու հնարավորություն չկար։ Երբեմն, խորհուրդ էինք հարցնում որեւէ մեկից, կարող էին մի բան այն չասել, գիշերները չէինք քնում ու պատահում էր, որ մինչեւ լուսաբաց աշխատում էինք։ Ֆինանսապես միշտ ապահովված ենք եղել, երբ դժվար պահեր էին լինում, հայրս ասում էր, որ իզուր ենք ինքներս մեզ տանջում, բայց հարցը գումարը չէր, այլ՝ լավ բիզնես գաղափարը զարգացնելու նպատակը։

Լուսանկարը՝ Mirijanyan pastry


Հետզհետե պատվերների թիվն ավելացավ, հետո «գրավեցինք» հորս ֆիրմայի մի հատվածը, ընդլայնվեցինք, խանութ վարձակալեցինք։ Ավելի ուշ այդ խանութն էլ փակվեց, այժմ թիմն ավելի փոքր է, պատվերներն էլ օնլայն ենք ընդունում։

Հրուշակարանի առօրյան

Լիլի. Ես բոլոր հարցերում օգնում եմ Մելինեին, բացի շոկոլադ պատրաստելուց, նաեւ նրա «քարտուղարուհին եմ», օրվա ընթացքում հիշեցնում եմ տարբեր գործերի մասին։ Հրուշակարանում մեր աշխատանքը սկսում է 10։00-ից՝ նախաճաշով, հետո սրճում ենք, ապա մեր 5 հոգանոց թիմը կիսվում է երկու մասի ու բաժանում աշխատանքը։ Մենք պատրաստում ենք այն ամենը, ինչ շատ ենք հավանում։

Լիլի եւ Մելինե Միրիջանյանները Լուսանկարը՝ Մեդիամաքս


Աշխատանքը կարող ենք ավարտել երեկոյան 8-9-ին։ Ամանորին մոտ օրերին մինչեւ 11-ն աշխատել ենք։ Պատահում է, որ մեր մշտական հաճախորդները մոռանում եւ պատվերը շատ ուշ են անում, նման դեպքերում սովորականից ավելի երկար ենք աշխատում։ Հաճախորդներ ունենք, որ ֆիրմայի ստեղծման պահից մեզ հետ են, նրանց մերժել չենք կարող։

Լուսանկարը՝ Mirijanyan pastry


Մելինե. Հրուշակարանից ամեն օր կարող է դուրս գալ չորս տորթ։ Մեկ տորթ պատրաստելու համար բավական ժամանակ է պետք է։ Պատրաստի բիսքվիթը ֆորմայից հանելուց հետո պետք է հովանա, հետո մոտ չորս ժամ մնա սառնարանում՝ ճիշտ տեքստուրա ձեռք բերելու համար, կրեմը պատրաստելն ու զարդարելն էլ բավական ժամանակ են պահանջում։ Նախապես ոչինչ չենք ունենում պատրաստի, դրանից է, գուցե, որ օրվա ընթացքում սահմանափակ պատվերներ ենք կարողանում անել։ Մեծ տորթերը, երբեմն, իմ մեքենայով եմ առաքում, որովհետեւ պատվերներ կան, որ ոչ ոքի չեմ վստահում, իսկ, առհասարակ մենք միշտ պատասխանատու ենք որակի եւ տեսքի համար, անկախ նրանից, թե ում մեղքով է վնասվել տորթը։

Ամենահաճախ տրվող հարցը

Մելինե․Օրվա ընթացքում շատ ժամանակ եմ ծախսում բլոգ վարելու համար, տեքստեր եմ գրում, կարճ տեսանյութեր նկարում, շփվում հաճախորդների հետ։ Ամենահաճախը հարցնում են՝ «մարգարինո՞վ եք աշխատում, թե՞ կարագով»։ Ես երբեք մարգարին չեմ օգտագործել, անգամ դրա համը չգիտեմ։ Նախկինում քմահաճ հաճախորդներ շատ էին պատահում, բայց հիմա պատվերներ անող մարդիկ գիտեն, որ այնքան էլ էժան չէ մեզ մոտ, բայց փոխարենը չենք թաքցնում, թե ինչ պրոդուկտով ենք աշխատում։

Լուսանկարը՝ Մեդիամաքս


Երկրորդ հաճախ տրվող հարցը վերաբերում է բաղադրատոմսերին. հաճախ կիսվում եմ դրանցով եւ, կարծում եմ, որ եթե որոշել ես փոխանցել, ապա որեւէ բան չպետք է թաքցնես։ Լինում են դեպքեր, սակայն, երբ մերժում եմ։ Օրինակ՝ երբ մակարոնի բաղադրատոմսն են ուզում, չեմ տալիս, որովհետեւ այն մեր 7 տարվա չարչարանքն է, դրանով գումար ենք վաստակում, այն էլ՝ չքնելու եւ ընթացքում ծագող տարբեր խնդիրներ հարթելու գնով։

Լիլի. Մենք աշխատում ենք բնական միջոցներով, արհեստական հավելումներ չենք ավելացնում, միայն կարող ենք գույն օգտագործել, այն էլ՝ կրկին որակյալ։ Ընդհանրապես, եթե հաճախորդը մեզ շատ չի ստիպում, աշխատում ենք անգամ գույները մեղմ անել, հնարավորինս քիչ ներկանյութ օգտագործելու համար։

Լուսանկարը՝ Մեդիամաքս


Մելինե. Ես նախընտրում եմ պատրաստել շոկոլադապատ տորթեր, նաեւ սիրում եմ նկարել տորթերի վրա։ Երբեմն, սպիտված ենք լինում հրաժարվել պատվերներից, եթե տորթի ոճը այնքան էլ մեզ չի համապատասխանում, բայց հաճախորդին չնեղացնելու համար կարող եմ առաջարկել իր նախընտրած թեմայով այլ աշխատանք։ Ինչ վերաբերում է հրաժարվելուն, ապա նաեւ հրաժարվում եմ բանանով միջուկներ պատրաստել, որովհետեւ այն արագ սեւանում է ու տորթը կտրելիս տգեղ է լինում: Վերջերս բացառություն արեցինք մի երեխայի ծննդյան տորթի համար, ով ալերգիա ուներ։ Այս տարիների ընթացքում մշակել ենք տորթերի մեր միջուկները, դրանք սեզոնային են, հատապտղային ամռանն ենք խորհուրդ տալիս, ձմռանը՝ գազարով, համեմունքներով, նարինջ-շոկոլադով, ժելեներով։

Չորս միջուկ

Լիլի․Ամռանը սկսեցինք պատրաստել «Չորս միջուկ» թխվածքը։ Այն չորս մասից բաղկացացած շերտավոր տորթ է՝ «Միկադո», «Մեղրով տորթ», «Թռչնի կաթ» եւ «Սպարտակ»։ Հավանաբար, առաջին երեքը շատերին ծանոթ է, իսկ չորրորդը շոկոլադե շերտավոր խմոր է՝ կրեմ չիզով, եփած կրեմով եւ շոկոլադե գլազուրով։ Յուրաքանչյուրից դրվում է մեկ քառորդ մաս ու դառնում մեկ ամբողջական տորթ։ Սա նրանց համար է, ովքեր կուզեն մեկ պատվերով չորս տեսակի թխվածք համտեսել։

Մակարոններ՝ չիչխանով ու տանձ-պարմեզանով

Մելինե. Ինձ ավելի հաճախ դիմում եմ մակարոնների համար։ Մենք պատրաստում ենք քսանից ավելի միջուկ։ Ամենամեծ սպառում ունեցողը տանձ-պարմեզանն է, պահանջված են նաեւ կարամելը, վանիլը, շոկոլադը, չիչխանը, նանան, հատապտուղները, մանգո-մարակույան, նորվեգական պանրովը, պնդուկովը, որ շատ հակասող ու հետաքրքիր համ ունի։

Լուսանկարը՝ Մեդիամաքս


Մեր մակարոնները տարբերվում են Ֆրանսիայում եւ Եվրոպայում վաճառվողներից, գրեթե բոլորն ավելի մոտ են ռուս հրուշակագործների մշակումներին։ Եվրոպայում պարտադիր չէ, որ մակարոնի ֆորման գեղեցիկ լինի, կարող են հավաքել նաեւ ծուռ «կափարիչներով», միջուկներն էլ են տարբեր եւ այնտեղ ավելի քիչ քանակով են դնում։ Արտասահմանում ապրող իմ հրուշակագործ ընկերները զարմանում են, երբ տեսնում են ձեռքով պատրաստված հավասարաչափ «կափարիչները»։

Լիլի. Մակարոնների մակերեսը լինում է 3,5-4,5 սմ, բայց քաշը հստակ պահպանել հնարավոր չէ։ Ինձ մակարոն պատրաստել սովորեցրել է Մելինեն։ Մակարոնին արժեք տալիս է միջուկը, չնայած որ «կափարիչը» պատրաստվում է նուշի ալյուրով, որը եւս էժան չէ։ Որքան բարակ է միջուկի շերտը՝ այնքան էժան է ինքնարժեքը։ Կախված միջուկից՝ մեր մակարոնների ինքնարժեքները տարբեր են, բայց մենք սահմանել ենք մեկ գին՝ 550 դրամ, եւ դրանք իրար փոխլրացնում են։

Մելինե. Հաճախորդները, երբեմն, նախապես են պատվիրում կամ իրենց հետ արտասահման են տանում, եւ անհրաժեշտ է այնպես պահել, որ ուտելու պահին թարմ լինեն։ Մակարոնները սառնարանում կարող են պահպանվել չորս օր, իսկ սառցարանում, հերմետիկ տարայում, մինչեւ մեկ ամիս։

Լուսանկարը՝ Մեդիամաքս


Աշխարհում ընդունված տեխնիկա կա, թե ինչպես է պետք դրանք «կյանք վերադարձնել», որ ջերմաստիճանային շոկ չլինի. մակարոնները նախ սառցարանից պետք է տեղափոխել սառնարան, ապա՝ սենյակային ջերմաստիճանի եւ հետո դրանք լրիվ թարմ կլինեն։

Աշխատանքի ու հանգստի ժամանակը

Մելինե. Մենք երեք ամիս ծանրաբեռնված աշխատում ենք, հետո փակում հրուշակարանի դռներն ու մեկնում հանգստի։ Ճամփորդություններն ինձ մեծ էմոցիաներ ու ուժ են տալիս, որ վերադառնամ ու կարողանամ աշխատել մեծ ծանրաբեռնվածությամբ։

Լուսանկարը՝ Mirijanyan pastry


Այն ընթացքում, երբ ես ճամփորդում եմ ու հրուշակարանը փակ է, մեր մշտական հաճախորդներին առաջարկում եմ օգտվել իմ գործընկերների ծառայություններից։ Կախված նրանից, թե հաճախորդը ինչպիսի պատվեր է ուզում անել, խորհուրդ եմ տալիս դիմել այս կամ այն հրուշակագործին։ Իմ էջերում հաճախ կարելի է գրառումներ տեսնել գործընկեր հրուշակագործների մասին։ Ճիշտ մրցակցությունը հենց այսպիսին է։ Մենք կարող ենք իրար գովել, մեկս մյուսի դասընթացը գնել, իրար օգնել, խորհուրդ տալ։

Ճամփորդություններից մեկի ընթացքում, երբ Մալդիվներում էի, ծանոթացա խոհարար Դրիս Դաաբազի հետ, մտքեր փոխանակելուց հետո նա առաջարկեց հաջորդ առավոտյան միասին տորթ պատրաստել։ Առավոտյան հանդիպեցինք, օգնեցի տորթ պատրաստել ու մի քանի գաղտնիքով կիսվեցի։

Խորհուրդ սկսնակներին

Մելինե. Տարիներ առաջ, երբ դեռ նոր էինք սկսել աշխատել, մեզ համար շատ դժվար էր, հիմա, երբ սկսնակ հրուշակագործների եմ հանդիպում, պատկերացնում եմ, թե որքան բարդ ճանապարհ են անցնելու։ Ես խորհուրդ եմ տալիս սկզբում ընտրել նեղ ուղղվածություն։ Եթե մեզ նման սկսեն ամեն ինչ պատրաստել, դժվար կլինի, դրա համար մեկնարկից 8 տարի անց, վերջին մեկ տարում մենք կենտրոնացել ենք 5 ճյուղի վրա։ Սկսնակները չպետք է խնայեն իրենց վրա ներդրում անել, մեկ-երկու անգամ սրճարան չգնալու հաշվին կարելի է որեւէ օգտակար դասընթաց գնել։

Համացանցում անվճար դասեր շատ կան, կարող են կարծել, որ ամեն ինչ հնարավոր է սովորել դրանց միջոցով։ Ինքս էլ կիսվում եմ պատրաստման եղանակներով, բայց եթե սկսնակը գնա որեւէ հրուշակարան, վարպետը նրան ցույց տա, սովորեցնի, ժամանակ տրամադրի, ամեն ինչ ավելի հեշտ կլինի։

Անի Խչոյան
Լուսանկարները՝ Էմին Արիստակեսյանի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին