«Asador-ում արդեն մատուցում ենք Ժիլարդո ոստրեները (Gillardeau Oysters), որոնց գաստրոնոմիկ ոլորտում անվանում են ոստրեների «Ռոլս-Ռոյս»»,- GastroVino-ի հետ զրույցում պատմում է Asador ռեստորանի հիմնադիր Արսեն Հովհաննիսյանը: 

«Այս ոստրեները շքեղ կյանքի խորհրդանիշներից են եւ հիմա դրանք առաջին անգամ ներկայացվում են Հայաստանում»:

Asador-ի խոհանոցում աշխատում են կենդանի ոստրեների հետ

Ժիլարդո ոստրեների ներմուծման ուղղությամբ Asador-ում վաղուց էին մտածում, սակայն ցանկանում էին աշխատել անմիջապես արտադրող ընկերության հետ՝ ուղիղ ներմուծումներ ապահովելու համար: 

6

Լուսանկարը՝ Asador

«Խուսափում էինք միջնորդավորված ներմուծումներից, քանի որ դա ուղղակիորեն ազդում է մթերքի թարմության վրա, ինչը մեզ համար առանցքային է: Այդ քայլին չգնացինք այնքան ժամանակ, մինչեւ ծանոթացանք արտադրող ընտանիքի անդամներից մեկի հետ, որի միջոցով էլ կարողացանք անմիջապես արտադրողից ներմուծել Հայաստան ու արդեն անընդհատ սկզբունքով»,- պատմում է Արսեն Հովհաննիսյանը: 

Հայաստան ոստրեները հասնում են կենդանի վիճակում՝ հատուկ արկղերում, որտեղ պահպանվում է 0-5 O C ջերմաստիճան: Կենդանի ոստրեները հերմետիկ փակված են եւ բացելը հատուկ վարպետություն է պահանջում՝ չվնասելու եւ ծովային ջուրը պահպանելու համար: 

6

Արսեն Հովհաննիսյանը | Լուսանկարը՝ Asador

«Asador-ը վաղուց հայտնի է թարմ, երբեւէ չսառեցված ծովամթերքի իր առաջարկով, սակայն սա եւս մեկ քայլ էր ապացուցելու, որ մենք իսկապես կարողանում ենք աշխատել թարմ ապրանքների, թարմ ծովամթերքի հետ՝ հասանելի դարձնելով դրանք մեր հաճախորդներին»,-ընդգծում է Արսեն Հովհաննիսյանը: 

Ժիլարդո ոստրեների մասին 

Gillardeau ընկերությունը հիմնադրվել է 1898 թվականին Ֆրանսիայում եւ ներկայում կառավարվում է Ժիլարդո ընտանիքի արդեն չորրորդ սերնդի կողմից: Աշխարհում շատ չեն այն ռեստորանները, որոնց վստահվում է ժիլարդո ոստրեների մատուցումը: Դրանց յուրահատկությունն ու բարձր որակը աճեցման բարդ պայմանների ու մեթոդի մեջ են: 

6

Լուսանկարը՝ Asador

Ժիլարդո ոստրեները աճեցվում են հատուկ ընտրված անտլանտյան ջրերում՝ Ծովափնյա Շարանտի եւ Նորմանդիայի շրջաններում, որտեղ մակընթացությունները, աղիությունը եւ սննդարար նյութերը ապահովում են ճիշտ պայմաններ։ Նախնական աճեցումից հետո դրանք տեղափոխվում են հատուկ աղի/կավային լճակներ, որտեղ էլ հասունանում են եւ ձեռք բերում բալանսավորված հանքային-աղային համ: Արտադրական ամբողջ գործընթացը տեւում է մինչեւ 4 տարի, որը շուրջ երկու անգամ գերազանցում է այլ ոստրեների աճեցման ժամանակահատվածը: 

Արձակուրդներից վերադարձող հյուրերը գոհ են մնում

Թեեւ ոստրեները նորույթ են հայկական շուկայում, Asador-ում դրանք արդեն իսկ մեծ պահանջարկ են վայելում՝ շնորհիվ ժիլարդո ոստրեների մեծ համբավի: Դրանք մատուցվում են դասական ձեւով՝ ազնվամորու քացախով եւ կիտրոնով, երբեմն նաեւ տաբասկո սոուսով: Դրանք կընդգրկվեն նաեւ ծովամթերքի սեթերի մեջ, եւ հնարավոր է, շուտով մատուցվեն նաեւ շամպայնով սեթում՝ հատուկ առաջարկով: Արսեն Հովհաննիսյանը վստահեցնում է, որ հետաքրքիր առաջարկները դեռ առջեւում են: 

6

Լուսանկարը՝ Asador

«Չնայած այն պրեմիում կարգի եւ ավելի բարձր գնային դասի սնունդ է՝ այնքան արագ է սպառվում, որ հազիվ ենք հասցնում ներմուծել: Իսկապես, այն սպասված էր թե´ զբոսաշրջիկների շրջանում, թե´ մեր տեղացի հյուրերի, որոնք եւս շատ պահանջկոտ են: Ուրախ ենք, որ երբ նրանք վերադառնում են արձակուրդներից ու նորից մեզ այցելում, նշում են, որ այստեղ գաստրոնոմիկ փորձառության տեսանկյունից ոչ միայն հետ չենք մնում, այլեւ որոշ դեպքերում մի քանի քայլ առաջ ենք»,- ասում է Asador-ի հիմնադիրը: 

Ծովից հեռու ծովամթերքով զարմացնելու հնարքը

Արսեն Հովհաննիսյանը դրական է գնահատում Հայաստանում հյուրընկալության ոլորտի զարգացման միտումները՝ միեւնույն ժամանակ ընդգծելով, որ նորարարությունների տարածումն իրենց ԴՆԹ-ում է:

«Ջանք չենք խնայում, որպեսզի բոլոր նորարարությունները մեր միջոցով մտնեն շուկա: Ես համոզված եմ, որ կարճ ժամանակ անց ոստրեները եւս շատ սիրվելու ու տարածվելու են հայկական շուկայում»,- ընդգծում է նա՝ հավելելով, որ ժիլարդո ոստրեների առկայությունը շուկայում ինքնին վկայում է դրա զարգացվածության մասին: 

6

Լուսանկարը՝ Asador

Առհասարակ ծովամթերքի, այն էլ նման բարձր կարգի ծովամթերքի թարմ հասանելիության ապահովումը Հայաստանում ոչ աստղաբաշխական գներով կարող է դրական ազդեցություն ունենալ զբոսաշրջության ոլորտի զարգացման վրա: Թարմ ու ճիշտ պատրաստված ծովամթերքի մատուցումը ծովին ելք չունեցող երկրում, որը շատ հեռու է այդ մթերքների արտադրման վայրերից, դրականորեն զարմացնում է հատկապես գիտակ զբոսաշրջիկներին: 

«Մեր տեղական ուտեստները փորձելիս, իհարկե, զբոսաշրջիկներն ընդգծում են, թե որքան համեղ են դրանք, սակայն վերադարձին երեւի թե գլուխ գովալու շատ բան չունենան, եթե համեմատենք նրա հետ, որ հետո Հայաստան իրենց այցի մասին ընկերներին կարող են պատմել՝ ծով չունեցող երկրում համտեսել են իրենց կյանքի լավագույն ոստրեները, կամ խավիարը եւ այլն: Եթե լավ ծովամթերքը ծովային երկրներում սովորական է ընկալվում, Հայաստանում թարմ ու բարձորակ ծովամթերքը կրկնակի զարմանք է առաջացնում, որի մասին մեր օտարերկրացի հյուրերն, անպայման, պատմելու են իրենց երկիր վերադառնալիս»,- ամփոփում է Արսեն Հովհաննիսյանը: 

Գայանե Ենոքյան