×

Լուսանկարը՝ Մեդիամաքս Արեգ Խոջոյանը

Արեգ Խոջոյանի Van Cat-ն ու գինի ստեղծելու ազատությունը

Գինին պետք է այնքան լավը լինի, որ ցանկանաս ընկերներիդ հետ խմել: Հենց այսպիսի տրամադրություն ստեղծելու համար է գինեգործ Արեգ Խոջոյանը գինեսերներին ներկայացնում իր հեղինակած Van Cat գինիները։ 

GN Winery ընկերության Van Cat գինիները գնահատելու հնարավորություն գինու սիրահարներն ունեն արդեն մի քանի ամիս: Սա Արեգի հեղինակային աշխատանքն է,  իր խոսքով՝ նախատեսված է ամենօրյա, թեթեւ ըմպելու համար:


Լուսանկարը՝ Մեդիամաքս

Այս պահին շուկայում ներկայացված են Van Cat 2018 կարմիր Արենին եւ Van Cat վարդագույնը, իսկ 2019-ի սպիտակ Կանգունը եւ վարդագույն Արենի-Կախեթը հասանելի կլինեն շուտով:

Van Cat 2018 կարմիրը պատրաստվում է միայն Արենի խաղողի սորտից, իսկ վարդագույնը, որն արտադրվել է սահմանափակ քանակությամբ, երկու տեսակների՝ Արենի եւ Կախեթի խաղողի տեսակների խառնուրդ է:


Լուսանկարը՝ Մեդիամաքս

«Կարմիրի դեպքում փորձել ենք շեշտել խաղողի տեսակի առանձնահատկությունը, ինչը կլինի նաեւ Van Cat սպիտակ 2019-ի դեպքում, որը կպատրաստվի խաղողի Կանգուն սորտից»,-  ասում է Արեգ Խոջոյանը:

Այս գինիները պահվում են ոչ թե տակառների, այլ չժանգոտվող տարաների մեջ:

Գինու «նկարչի» աշխատանքը

Արեգը պատմում է, որ իր կյանքում արդեն 11 բերքահավաք է ունեցել: 2009 թվականից այս ոլորտում է, մասնակցել է այգիների մշակմանն ու խնամքին, խաղողի վերամշակմանը, խաղողից գինի ստանալու ողջ պրոցեսին: Աշխատել է տարբեր գինու գործարանների հետ՝ որպես խորհրդատու, մասնակցել միջազգային նախագծերի:


Լուսանկարը՝ Մեդիամաքս Արեգ Խոջոյանը

2018թ․-ից աշխատում է GN Winery  ընկերությունում, որտեղ էլ իր հեղինակային աշխատանքն է ստեղծել.

«Հանդիպեցի այնպիսի մարդկանց, որոնց հետ հենց սկզբից հասկացանք իրար ու սկսեցինք միասին քայլեր դնել»:


Լուսանկարը՝ Մեդիամաքս Արեգ Խոջոյանը

Գինեգործի աշխատանքը համեմատելով նկարչության հետ՝ Արեգն ասում է. «Ես ունեցա ստեղծագործելու ազատություն, այն՝ ինչ պատկերացնում էի: Չկա ոչ մի սահմանափակում, ունես արվեստանոց, վրձին, ներկեր ու ազատություն: Հենց այս պայմաններում էլ ծնվեց Van Cat-ը»:

Հայկականն ընդգծող անունը

«Գինին միշտ եղել է հայի մշակույթի մի մասը, ոչ մի հայ չի կարող պատկերացնել ծեսերն առանց գինու»,- ասում է նա՝ նշելով, որ իր հեղինակային խմիչքի համար ընտրել է այնպիսի անուն, որը կընդգծի դրա հայկականությունը:


Լուսանկարը՝ Մեդիամաքս Արեգ Խոջոյանը

«Վանա կատուն հայկական ցեղատեսակ է, բայց դրա մասին այդքան էլ շատ չեն խոսում: Այս անունն ընտրելով մենք ուզում ենք շեշտել հայկական արտադրանք լինելու փաստը: Որքան շատ շուկաներ կարողանանք գրավել մեր արտադրանքով, այնքան ավելի շատ կբարձրաձայնվի թե գինու հայկական լինելու, թե կատվի ցեղատեսակի մասին»,- ասում է գինեգործը:

Van Cat-ի առաջին մեդալն ու ներկայությունը շուկայում

Գերմանիայում 2020 թվականին կայացած Mundus vini գինու միջազգային մրցույթի գարնանային համտեսում Van Cat Արենին արժանացել են արծաթե մեդալի:


Լուսանկարը՝ Մեդիամաքս

«Մենք նոր ենք սկսում թե տեղական, թե դրսի շուկան հագեցնել մեր գինով: Van Cat-ն այժմ ներկայացված է InVino Երեւան գինետանը, Wine Republic Yerevan ռեստորանում եւ մի քանի այլ խանութներում: Աշխատանքներ ենք տանում՝ ավելի շատ վաճառքի կետերում հասանելի դառնալու համար»,- ասում է գինեգործը ու ավելացնում, որ եվրոպական շուկայից եւս պատվեր ունեն ու պատրաստվում են առաջին խմբաքանակն ուղարկել:

«Ամեն երկրի համար փորձելու ենք հասկանալ իր քիմքին հաճելու գինու տեսակն ու աշխատել կոնկրետ այդ տեսակն արտահանելու ուղղությամբ»,- նշում է նա:


Լուսանկարը՝ Մեդիամաքս

Ինչ վերաբերում է Հայաստանում գինեգործության զարգացմանը՝ Արեգ Խոջոյանը նկատում է, որ հայաստանցի սպառողն այսօր հնարավորություն ունի գտնել տարբեր տեսակի գինիներ, թեկուզ խաղողի նույն տեսակից պատրաստված, բայց տարբեր մոտեցումներով. «Ոլորտում պայքար է առաջանում, ինչի արդյունքում սկսում են նորամուծություններ անել, փոփոխություններ մտցնել, ինչն էլ իր հերթին արտադրվող գինիների որակն է բարձրացնում: Այսօր արդեն գինու քննադատները խոսում են հայկական գինու մասին ու դրական արտահայտվում»:

Գինի խմող գինեգործը

Արեգ Խոջոյանի հետ զրույցն ավարտում ենք մասնագիտության ընտրության ու գինու նկատմամբ նրա ունեցած վերաբերմունքի մասին խոսելով:

Ասում է՝ մասնագիտության ընտրության հարցում երբեք կասկածներ չի ունեցել, համոզված է՝ ճիշտ ընտրություն է արել, ընտրել է ներսից եկող այսպիսի զգացողությամբ՝ «այն իմն է»:


Լուսանկարը՝ Մեդիամաքս Արեգ Խոջոյանը

«Այս գործը շատ էմոցիաներ է կրում իր մեջ: Այն ինձ համար պատմություն է, կիրք, սեր, կենսակերպ: Իմ աշխատանքով ուզում եմ ուրախություն տալ մարդկանց, որ այն գեղեցիկ եւ ուրախ առիթների համար օգտագործեն, բավականություն ստանան, գինու սեղանի շուրջ նոր ընկերներ ձեռք բերեն: Ինքս էլ մեծ սիրահար եմ ոչ միայն գինի ստեղծելու, այլեւ՝ խմելու»,- ասում է գինեգործն ու ավելացնում՝ այս խմիչքի մեջ ռոմանտիզմ կա:

Արփի Ջիլավյան

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին