×

Սյունե Միքայելյանը Լուսանկարը՝ Մեդիամաքս

Choco Syu. հոգեբան Սյունեի շոկոլադաթերապիան

Շոկոլադի դրական հատկություններն ավելի շատ են, քան բացասականները։ Ճիշտ չափաբաժնով օգտագործելու դեպքում՝ այն ոչ միայն կարող է չգիրացնել, այլեւ օգտակար լինել օրգանիզմի համար, լրացնել սիրո պակասն ու երջանկացնել. պնդում է հատուկ հոգեբան, արտ-թերապիստ Սյունե Միքայելյանը։

Օրվա մեծ մասը Սյունեն Երեւանի երկու տարբեր կենտրոնում օգտագործում է արվեստի բազմաթիվ ճյուղեր, որպեսզի զարգացման խնդիր ունեցող երեխաները հասնեն դրական հուզական վիճակի։ 


Սյունե Միքայելյանը Լուսանկարը՝ Մեդիամաքս

Երեկոյան, երբ ընտանիքի անդամները քնած են լինում, Սյունեն երաժշտություն է միացնում, սենյակում ապահովում շոկոլադի համար նպաստավոր ջերմաստիճան, դասավորում գույնզգույն բաղադրիչները, գործիքները, զինվում հատուկ ջերմաչափով ու սկսում է պատրաստել տարատեսակ շոկոլադե սալիկներ։

GastroVino-ի եւ Սյունեի հանդիպումը իսկական վարպետության դասի է վերածվում, նա ոչ միայն պատմում է, այլ սկզբից մինչեւ վերջ ցույց է տալիս շոկոլադի պատրաստման բոլոր մանրամասները՝ չպահելով ոչ մի գաղտնիք։


Լուսանկարը՝ Մեդիամաքս

Երբ միաձուլվում են արտ-թերապիան ու շոկոլադագործությունը

Երեք տարի առաջ մուսային տորթեր պատրաստելու մտադրություն ունեցա, դիմեցի հրուշակագործ քրոջս օգնությանը, բայց երբ հասկացա, որ Հայաստանում շատերն են զբաղվում այդ գործով, ոգեւորությունս մարեց։ Այդ օրերին Մոսկվայում էի եւ առաջին անգամ տեսա շատ հետաքրքիր hand made շոկոլադներ։ Հայաստան վերադառնալուց հետո տորթեր պատրաստելու գաղափարից վերջնականապես հրաժարվեցի։ 

Հաջորդեց ճգնաժամային մի փուլ, երբ մտածում էի, որ հոգեբանությունն իմ ոլորտը չէ։ Որոշեցի դադար տալ։ Կրկին մեկնեցի Մոսկվա, այս անգամ քույրս շոկոլադի պատրաստման վերաբերյալ մի քանի խորհուրդ տվեց։ Գնեցի շոկոլադ պատրաստելու համար անհրաժեշտ բոլոր գործիքներն ու վերադարձա Հայաստան։ 

Սկսեցի փորձարկումներ անել, մասնակցեցի վարպետության դասերի, վեբինարների, արժեքավոր խորհուրդներ ստացա մի հայտնի շոկոլադագործից։ Հետո թողեցի հոգեբանի աշխատանքն ու անցա շոկոլադի պատրաստմանը։ Կես տարի անց, սակայն, վերադարձա մասնագիտական աշխատանքին ու սկսեցի համատեղել արտ-թերապիան եւ շոկոլադագործությունը։ Քանի որ Հայաստանում շոկոլադի հումք չկար, առաջին երեք ամիսներին ստիպված էի գնել Մոսկվայից, հետո գտա կազմակերպություն, որը բելգիական պրեմիում դասի շոկոլադի հումք էր ներկրում Հայաստան։


Սյունե Միքայելյանը Լուսանկարը՝ Մեդիամաքս

Չիլի պղպեղն ու եգիպտացորենը՝ շոկոլադե սալիկում

 Շոկոլադե որակյալ սալիկ պատրաստելու համար հումքը նախ պետք է ճիշտ ջերմամշակում անցնի։ Յուրաքանչյուր տեսակի շոկոլադի համար սահմանված է հստակ ջերմաստիճան՝ սպիտակինն այլ է, մուգ շոկոլադինը՝ այլ։ Ջերմային մշակման ժամանակ շոկոլադի ջերմաստիճանը սկզբում պետք է բարձրացնել, ապա իջեցնել գրանիտի վրա կամ շոկոլադի հումքի օգնությամբ՝ ողջ ընթացքում ստուգելով հատուկ չափիչ սարքի օգնությամբ։ Երբ բոլոր քայլերը ճիշտ են արվում, արդյունքում ստացվում է փայլուն շոկոլադ, որը ձեռքում չի հալվում եւ կոտրելուց էլ հաճելի ձայն է գալիս։ Պետք է հետեւել նաեւ, որ շոկոլադի մեջ օդի պղպջակներ չլինեն եւ «բյուրեղացումը» ճիշտ կատարվի, այլապես այն կարող է դեֆորմացվել։ 


Լուսանկարը՝ Choco Syu

Ջերմամշակումից հետո գալիս է երեւակայության փուլը. լինում է, որ շոկոլադին ավելացրած բաղադրիչները հատ-հատ դասավորում եմ, պատահում է նաեւ, որ ավելի աբստրակտ մոտեցում եմ ցուցաբերում, սա է պատճառը, որ ինքս իմ պատրաստած սալիկները երբեմն նույնությամբ չեմ կարողանում կրկնել։


Լուսանկարը՝ Choco Syu

Իմ պատրաստած հատիկավոր շոկոլադները կամ սալիկները լինում են ոչ միայն դառը կամ քաղցր, ինչպես տարածված է, այլ նաեւ աղի ու կծու, համեմում եմ սուբլիմացված մրգերով, չրերով, ընդեղենով, եգիպտացորենով, չիլի պղպեղի թելերով, հիմալայան վարդագույն աղով, կոճապղպեղով։


Մեկ սալիկ կարող եմ պատրաստել մոտ մեկ ժամում, բայց եթե պատվիրատուն գունավոր շոկոլադ է ընտրում, ապա ճիշտ գույնը ստանալու համար կարող եմ աշխատել 1-2 օր։ Շոկոլադը գունավորում եմ բնական միջոցներով, օրինակ՝ կարկադեով։ Կոնսերվանտներ չեմ ավելացնում։


Լուսանկարը՝ Choco Syu

Յուրաքանչյուր սալիկ կշռում է 110-130 գրամ։ Իմ առաջին սկզբունքն այն է, որ զուտ շոկոլադը լինի 100 գրամ։ Սալիկների գինը տատանվում է 2500-4500 դրամի սահմաններում, հատիկավոր շոկոլադների արժեքը՝ 300-600 դրամի սահմաններում։

Օնլայն հարթակում շոկոլադ գնելու համար «համարձակություն» է պետք

 Choco Syu-ի շոկոլադները օնլայն հարթակում հայտնվեցին 2018 թվականի դեկտեմբերին։ Երեւանից ստացած առաջին մի քանի պատվերներն անձամբ առաքեցի պատվիրատուներին՝ նրանց հետ ծանոթանալու, զրուցելու, հասկանալու համար, թե շոկոլադն ինչ տեսքով է հասնում պատվիրատուին։ Հետաքրքիր էր նաեւ, թե ինչպես են համարձակվում օնլայն տարբերակով շոկոլադ գնել (ժպտում է- հեղ.)։


Լուսանկարը՝ Մեդիամաքս

Իսկական շոկոլադը սառնարանում չեն պահում, սենյակային ջերմաստիճանի պայմաններում էլ այն չի հալվում, բայց 22-25-ից բարձր ջերմաստիճանի դեպքում կարող է խնդիր լինել, այդ պատճառով ամռանը «ընդհատակ» եմ անցնում, հազվադեպ եմ պատվերներ ընդունում։ Ինքս չեմ կարող առաքել, անհանգիստ եմ լինում, որ շոկոլադը մինչ պատվիրատուին հասնելը կարող է կորցնել նախնական տեսքը։ Եթե, այնուամենայնիվ, ընդունում եմ պատվեր, ապա առաքումն արվում է երեկոյան ժամերին, ջերմակայուն տոպրակներով։ Հատկապես ուրախ եմ լինում, երբ արտերկրից եմ պատվերներ ստանում, ինձ ամենաշատը զարմացրել է Բելգիայում ապրող մեր պատվիրատուներից մեկը. այնպես ստացվեց, որ բելգիական շոկոլադը կրկին վերադարձավ այդ երկիր, պարզապես հայկական մշակմամբ։


Լուսանկարը՝ Մեդիամաքս

«Պատրաստ եմ կիսվել իմ փորձով»

Մտածում եմ մասսայական վաճառքի մասին, դեռ անցած տարի առաջարկներ եմ ստացել, բայց ուզում եմ վաճառքն այնպիսի վայրում կազմակերպել, ուր նաեւ ստուդիա կլինի ու ցանկացողներին շոկոլադ պատրաստել կսովորեցնեմ։

Շոկոլադի հետ կապված ծրագրերն այսքանով չեն ավարտվում. քանի որ աշխատանքս զարգացման խնդիր ունեցող երեխաների հետ է, նոր ծրագիր եմ մշակել, որի միջոցով երեխաները կծանոթանան տարբեր մասնագիտությունների, նաեւ կսովորեն շոկոլադ պատրաստել։

Անի Խչոյան

Լուսանկարները Էմին Արիստակեսյանի եւ Choco Syu-ի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին