×

Լուսանկարը՝ Մեդիամաքս

Միշլենյան վարպետության դաս՝ Ֆյուժնի կանոններով

15․30-ից Խոհարարական արվեստի եւ հյուրընկալության «Երեմյան ակադեմիա» -ի դուռն անընդհատ բացվում-փակվում է։ Ներս մտնողները մոտենում են մուտքի մոտ գտնվող սեղանին, լրացնում ներկայության հայտն ու առաջանում են ուղիղ խոհանոց։ 30 րոպե անց աչքի տակ ենք անցկացնում հյուրերի անունները՝ խոհարարներ են, շեֆ-խոհարարներ, ռեստորանի մենեջմենթով զբաղվողներ ու  խոհարարություն սիրողներ։

Այս ամբողջ ընթացքում խոհանոցում հետ-առաջ է քայլում իտալացի շեֆ-խոհարար Իտալո Բասին։ Հենց նրա վարպետության դասին են եկել խոհանոցում հավաքված ավելի քան երեք տասնյակ մարդիկ։ 


Լուսանկարը՝ Մեդիամաքս Իտալո Բասին

Միշլենյան աստղակիր ու հայտնի խոհարարը հարցազրույցից հրաժարվում է․

«Միայն ոչ հիմա, մտքերս պետք է հավաքեմ։ Վերջում կխոսենք», - ասում է Իտալոն, վերցնում կնոջ՝ Տատյանայի իրեն մեկնած ջրով լի բաժակը, համբուրում է նրան  ու մոտենում է խոհանոցի սեղաններից մեկին։

Ավելի իտալացի ուղղակի չի լինում

«Հավատացեք, ավելի իտալացի խոհարար ուղղակի գոյություն չունի։ Նա այնքան իտալացի է ու խոհարարությունն էլ այնպես է ներծծված մինչեւ ոսկորները, որ նրան հաջողվել է երեք Միշլենյան աստղ ստանալ,պատկերացնում ե՞ք» - Իտալո Բասիի կողքին կանգնած հայտարարում է նրա կինը, մինչ ամուսինը հասցնում է բարեւել ներկաներին։


Լուսանկարը՝ Մեդիամաքս Տատյանա Բասին

Իտալացի շեֆ խոհարարը ժպիտով նայում է կնոջը, ապա դեմքի լուրջ արտահայտությամբ ձեռքին է վերցնում մեծ դանակն ու ասում․ 

«Պարզ  ու ավանդական մի բաղադրատոմս եմ ներկայացնելու, որտեղ  խոհարարի երեւակայությունը հանդիպում է հմտություններին։ Ընթացքում հարցեր լինեն, դիմեք», -ասում է արդեն 35 տարվա խոհարարության փորձ ունեցող Իտալոն։

Սկսում է ձկան մարինացման համար նախատեսված սոուս պատրաստել։ Խոհանոցային տախտակին է հայտնվում մանգոն, հետո կոճապղպեղը, համեմը, դեղին պղպեղը, հետո այդ ամենը լայմի հյութի հետ միասին բլենդերում է հայտնվում։


Լուսանկարը՝ Մեդիամաքս

«Գիտե՞ք չէ, ինչու է նա նաեւ այսքան հայտնի,- ներկաներին է դիմում Իտալոյի կինը,- շնորհիվ անվան։ Տեսեք, ես գիտեմ, որ Հայաստանում Արմենիա բառի շնորհիվ  բազմաթիվ Արմեններ ու Արմինեներ կան, եւ այդ անվամբ ոչ ոքի այստեղ չես զարմացնի, իսկ Իտալիայում, մի ձեռքի մատների վրա կարելի է հաշվել, թե քանի Իտալո անվամբ մարդ կա», -ասում է կինը, մինչ ամուսինը զբաղված է ջուր եռացնելով։

Երեւակայություն + հմտություն՝ ստացվում է ֆյուժն

Դեկտեմբերի 12-ից «Երեմյան Փրոջեքթս»-ի հրավերով Հայաստանում գտնվող Իտալո Բասին հենց այնպես չէ պատրաստվող ուտեստը ներկայացնում որպես երեւակայության եւ հմտության միախառնում։ 


Լուսանկարը՝ Մեդիամաքս

Խոհարարության ամենաստեղծագործ ու երեւակայող ուղղություններից մեկը՝ Ֆյուժնը, ինչը թարգմանաբար նշանակում է հենց միախառնում, ազգային խոհանոցների ուտեստների ու դրանց պատրաստման տեխնոլոգիաների հավասարաչափ տեղաբաշխումն է մեկ ափսեի մեջ։

Ֆյուժն խոհանոցը հստակ կանոններ չունի, միակ եւ հիմնական պայմանն այն է, որպեսզի  մեկ ափսեում հավաքված մթերքները համատեղելի լինեն համով ու բաղադրությամբ, լրացնեն միմյանց, թեթեւ լինեն եւ շատ թարմ։


Լուսանկարը՝ Մեդիամաքս

Հենց այդ պատճառով էլ, օրինակ, Ֆյուժն բաղադրատոմսերի դեպքում մայոնեզի փոխարեն կիրառվում են  ընկույզի, կոկոսի, քունջութի, կամ էլ խաղողի կորիզներից պատրաստված բուսայուղեր, ցիտրուսային մրգահյութեր, կոճապղպեղ, կիտրոնի կամ նարնջի կեղեւ, համեմ, ռեհան։

Ֆյուժն խոհանոցը թեեւ ծագել է ԱՄՆ-ում, բայց իր աստղային ժամերը մինչեւ այսօր ապրում է Ճապոնիայում։ Այս երկրում, ի դեպ, Իտալոն աշխատել է 1992-ից եւ հենց նա է համարվում Ճապոնիայում՝ իտալական խոհանոցի ավանդույթները ներմուծողներից մեկը։


Բայց ճապոնական խոհանոցն էլ իր ազդեցությունը թողեց Իտալոյի վրա։

Իր արեւելյան փորձառությամբ նա այնպես յուրացրեց ճապոնական խոհանոցի տեխնիկաներն ու ավանդույթները, որ Իտալիա վերադառնալիս, արեւելյան գաստրոնոմիական մշակույթն իր հետ տարավ Ֆլորենցիա ու դարձավ առաջին խոհարարը ՝ «Enoteca Pinchiorri»-ում։

Որպես ամփոփում


Լուսանկարը՝ «Երեմյան Պրոջեքթս»

«Ակադեմիան 9 ամիս է, ինչ  մեկնարկել է իր գործունեությունը: Նմանատիպ միջոցառումն Ակադեմիայում առաջինն էր, բայց նոր չէր այն առումով, որ մենք մեր գործունեության հենց սկզբից մեզ համար ուղենշել եւ ծրագրել ենք նման միջոցառումների կազմակերպումը: Առաջիկայում սպասվում են տարբեր ձեւաչափերի նման միջոցառումներ. կունենանք  դասախոսություններ, վարպետության դասեր ինչպես տեղացի առաջատար, այնպես էլ օտարերկրյա հրավիրյալ հեղինակավոր խոհարարների մասնակցությամբ»,- ասում է «Երեմյան Փրոջեքթս» խոհարարարական արվեստի եւ հյուրընկալության ակադեմիայի տնօրեն Նազելի Նավասարդյանը: 


Հետո հավելում է, որ ներկա մասնակիցների թվում շատ էին ռեստորանային ոլորտի ղեկավարներ, շեֆ-խոհարարներ եւ խոհարարական արվեստի սիրահարներ:


Լուսանկարը՝ Մեդիամաքս

Ակադեմիայի խոհարարական ծրագրերի ղեկավար Կարեն Խաչատրյանն էլ ասում է, որ Իտալո Բասին չորս ու կես ժամ տեւողությամբ դասի ընթացքում մասնակիցներին ներկայացրեց ֆյուժն խոհանոցի հետ աշխատելու մի շարք նրբություններ: 

«Սա շատ լավ հնարավորություն էր «Երեմյան Փրոջեքթս» խոհարարարական արվեստի եւ հյուրընկալության ակադեմիայում սովորող ուսանողների, շրջանավարտների համար ծանոթանալու խոհարարական արվեստի միջազգային փորձին, հետեւել ոլորտի առաջադեմ, հետաքրքիր միտումներին ի հավելումն այն գիտելիքների, որոնք նրանք  ձեռք են բերել ակադեմիայում ուսանելու ընթացքում: Ակադեմիան այն հարթակն է, որն իր ուսանողների համար նման հանդիպումները հասանելի է դարձնում»:

Իտալո Բասին արտահայտվում է ամենավերջում.

««Երեմյան Փրոջեքթս»-ը շատ յուրահատուկ ընկերություն է թե՜ իր ռեստորանային նախագծերով, թե՜ գործունեության տեսլականով: Ինձ համար շատ անսպասելի էր եւ, իհարկե, հաճելիորեն զարմանալի՝ տեսնել այնպիսի կրթական հաստատություն  Երեւանում, ինչպիսին  «Երեմյան Ակադեմիան» է, որտեղ կրթությունը կազմակերպվում է միջազգային ստանդարտներին համապատասխան մեթոդաբանությամբ եւ մոտեցումներով: Խոհարարական արվեստում շատ կարեւոր է կրթությունը եւ ուրախ էի այստեղ վարպետության դաս անցկացնելու համար»:


Լուսանկարը՝ Մեդիամաքս Իտալո Բասին՝ «Երեմյան Պրոջեքթս»-ի խոհարարների հետ

Իտալո Բասին տպավորություններն ամփոփելով ասում է, որ Հայաստանում շատ են տաղանդավոր խոհարարները եւ նրանց հետ համագործակցելը շատ հաճելի է:

Լուսին Մկրտչյան

Լուսանկարները՝ Էմին Արիստակեսյանի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին