×

Վահե Բալուլյանը Լուսանկարը՝ Մեդիամաքս

«Սթեյքարար». Քարի վրա պատրաստվող սթեյքը եւ ամեն օր փոխվող մենյուն

Սարյան 6 հասցենում՝ InVino-ի եւ «Տապաստանի» արանքում, նոր «սթեյք հաուս» է բացվել։ «Սթեյքարար» փոքրիկ ռեստորանն առաջնորդվում է զրո թափոն, կլիմայական չեզոքություն եւ այգուց սեղան սկզբունքներով։ Այն նույն խմբի մեջ է, ինչ The Club ռեստորանը, InVino-ն, «Տապաստանը» եւ «Տրինիտի Կանյոն Այգիներ» գինեգործարանը։

Նոր գաստրո-նախագծի մասին GastroVino-ին պատմել է «Սթեյքարարի» հիմնադիր Վահե Բալուլյանը։

Ռեստորանի սկզբունքները

The Club-ում մենյուն փոխեցինք եւ շատ սիրված ուտեստներ դուրս մնացին, որից հետո մեր այցելուներն անընդհատ հարցնում էին, պահանջում, որ վերադարձնենք։ Երբ նախկինում այս վայրում գործող ռեստորանը փակվեց եւ տեղն ազատվեց, միանգամից որոշեցինք վերցնել, թեպետ պատրաստ չէինք, այլ գործերով էինք զբաղված։ Իրականում, «Սթեյքարարը» նաեւ գործիք դառավ մի գաղափար իրագործելու համար, որ ուզում էինք անել, բայց մեր ուժը չէր հերիքում։ Խոսքը Հայաստանում առաջին առանց թափոն եւ հնարավորինս կլիմայական չեզոք ռեստորան բացելու մասին է։

Վահե Բալուլյանը Լուսանկարը՝ Մեդիամաքս


«Սթեյքարարն» այժմ հենց այդ սկզբունքներով է աշխատում: Մենք օրական մոտ 500 գրամ աղբ ենք թափում եւ դրանք այնպիսի նյութեր են, որոնք Հայաստանում դեռ չեն վերամշակվում, մնացած ամեն ինչ տեսակավորվում եւ գնում է վերամշակման։

Մեր աշխատակիցները եւս հավատում են այն գաղափարին, որ Հայաստանում աղբը որքան հնարավոր է պետք է նվազեցնել։ Ապագայում նաեւ The Club-ը, InVino-ն եւ «Տապաստանը» կփորձեն անցնել այդ նույն սկզբունքին։ Զրո թափոնով աշխատելն ամբողջ աշխարհում բարդ գործ է համարվում եւ մենք ուզում էինք հասկանալ՝ հնարավո՞ր է իրականացնել, թե՝ ոչ։

Մեր հյուրերին չենք ծանրաբեռնում այս ամենով: Ես պարզապես ասում եմ, որ եթե ինչ-որ մեկը եւս աղբի հետ կապված մտահոգություն ունի, ապա թող իմանա, որ կարող է հաճույք ստանալ առանց մեղքի զգացումի։

Մենք նաեւ հաշվարկել ենք, թե մթերքն աճեցնելու եւ մյուս աշխատանքների ժամանակ որքան ջերմոցային գազեր են արտանետվում, այդ վնասը զրոյացնելու համար ծառեր ենք տնկում։

Լուսանկարը՝ Մեդիամաքս


Այն սկզբունքներով, որոնց մենք ենք հետեւում, սովորաբար աշխատում բուսակերային ռեստորանները։ «Սթեյքարարը» «սթեյք հաուս» է, բայց խտրականություն չենք դնում, նաեւ բանջարեղենային ուտեստներ ունենք, որոնց մեծ մասն աճեցնում ենք մեր այգիներում։

«Արարել» սթեյք

Ավելորդ սնունդ չթափելու համար մենյուն այնպես ենք կազմել, որ այցելուները կարողանան ընտրել իրենց նախընտրած չափով, ուտեստների մեծ մասը ունեն փոքր եւ մեծ չափաբաժիններ։

Մեր մենյուն, հավանաբար, Հայաստանում ամենակարճն է եւ ամեն օր փոխվում է։ Ամեն երեկո որոշվում է, թե հաջորդ օրն այցելուներին ինչ ուտեստներ ենք առաջարկելու եւ առավոտյան վերամշակված թղթի վրա տպվում է նոր ճաշացանկ։ Մենյուի վրա գրված է նաեւ, թե ով է սպասարկում հաճախորդներին եւ ով աշխատում խոհանոցում։

Լուսանկարը՝ Մեդիամաքս


Բացի սթեյքերից, երեք հիմնական ուտեստների անուններն են Կանաչ, Դեղին և Կարմիր։ Անունները նույնն են, պարզապես բաղադրիչներն են փոխվում։ Կանաչ ուտեստը հիմնված է բանջարեղենի վրա, դեղինը՝ ածխաջրերի, կարմիրը՝ պրոտեինի։

Հյուրը գալիս է մեր ռեստորան, մենք նրան արագ բացատրում ենք՝ մենյուն ինչպես է կազմված, նկարագրում ենք ուտեստները, որ կարող են ընտրել, եթե հյուրը բուսակեր է, վերցնում է մեր այգու բանջարեղենը եւ պատրաստում քարի վրա։ Օգտագործում ենք հետաքրքիր բույսեր, օրինակ՝ խթա, որն ամբողջ աշխարհում հայտնի է որպես հայկական վարունգ։ Այն կարելի է տապակել, խորովել կամ էլ հում ուտել։

Լուսանկարը՝ Մեդիամաքս


«Սթեյքարար» անունը գալիս է երեք բառից՝ սթեյք, քար, արարել։ Սիրում եմ անունների հետ խաղալ։ Այստեղ առաջարկում ենք մեր հայտնի սթեյքը քարի վրա, որը 15 տարուց ավելի է, ինչ սիրում են Тhe Club-ի հյուրերը եւ պահանջում էին վերաներկայացնել։ Սթեյք պատվիրողներին առաջարկում ենք մսեղենի երկու տարբերակ, մեկը՝ մարինացված եւ թաց հնեցված, մյուսը՝ պարզապես սեւ պղպեղով պատած։ Մոտեցնում ենք ոչ պատրաստի մսի երկու տախտակ՝ իրարից տարբեր վեց կտորով, որոնք կշռում են 200-500 գրամ եւ այցելուն ընտրում է այն կտորը, որը ցանկանում է պատրաստել քարի վրա։ Եթե ուզում է, ապա կարող ենք օգնել, հուշել, թե ինչպես անել, եթե ոչ՝ ապա չենք միջամտի։

Օգտագործում ենք միայն հայկական մսամթերք։ Չենք ուզում դրսից միս ներմուծել, նախ, որովհետեւ ավելի թանկ կլինի, քան հայկականը, երկրորդ, որպեսզի մեր գյուղացիներն ու ֆերմերները հասկանան, որ իրենցից գնող կա եւ սկսեն ավելի ճիշտ վերաբերվել կենդանուն։

Մեր օգտագործած ապրանքների 95%-ը տեղական է։ Որոշ բաղադրիչներ, իհարկե, չկան Հայաստանում եւ շատ խոհարարներ հրաժարվում են աշխատել առանց դրանց, բայց, եթե սահմանները փակվեն, ապա պետք է օգտագործենք այն, ինչ ունենք։

Հիմնական խնդիրը համեմունքների հետ է, մնացածը հնարավոր է աճեցնել։ Մարդիկ տարբեր մրգեր ու բանջարեղեն աճեցնելու փորձեր են անում, բայց պետք է պահանջարկ լինի։ Նախկինում բրոկոլի, քինուա չկար Հայաստանում, հիմա կա, որքան յուրահատուկ բաղադրիչների պահանջ ստեղծվի, այնքան տեսականին կավելանա։

Վահե Բալուլյանը Լուսանկարը՝ Մեդիամաքս


Քանի որ մենյուն ամեն օր տպվում է, ապա եթե հաճախորդը օրվա ճաշացանկից որեւէ բան հավանել է, կարող է մենյուն տանել իր հետ եւ հետագայում դրանով գալ ու նորից պատվիրել: Եթե բոլոր բաղադրիչներն ունենանք, կպատրաստենք, եթե ոչ՝ կառաջարկենք մոտ օրերին կրկին գալ։

Հին ու նոր աղանդեր, գինի

The Club-ից «Սթեյքարար» բերել ենք շատ սիրված պրոֆիտրոլները, «Անուշ գաթան» եւ 1+3 պաղպաղակը՝ ընկույզով, հատապտուղներով եւ նարնջի ջեմով։ Պանրաբլիթը, այսինքն չիզքեյքն, ու «Երջանկության երեք շերտը» նոր են։ Վերջինը պատրաստվում է թխվածքաբլիթով, շոկոլադով ու թահինի հալվայով։

Ռեստորանում մատուցում ենք մեր գինիները, Հայաստանում արտադրված առաջին օրգանական գինի արտադրողն ենք։ Առանձին մենյուով առաջարկում ենք նաեւ «Տրինիտիի» հետ կապված գինիները։ Ծրագիր ունենք, որտեղ գյուղացիներին փորձում ենք ուղղորդել, որ դառնան գինեգործ, ոչ թե միայն խաղող վաճառեն։ Ծրագրի ընթացքում ինչ-որ ձեւով մասնակցում ենք թե՛ նրանց այգիների մշակմանը, թե՛ օգնում ենք գիտելիքով ու սարքավորումներով։ Ռեստորանում ներկայացնում ենք նաեւ արտասահմանից մեր որոշ ընկերների գինիներ, մի քանի իսպանական ու ֆրանսիական գինի։

Լուսանկարը՝ Մեդիամաքս


Նախընտրելի է, որ այցելուները խմեն մեզ մոտ առկա գինիները, բայց եթե ուզում են դրսից բերել, ապա դեմ չենք, պարզապես յուրաքանչյուր շշի խցանահանման եւ սպասարկման համար պետք է վճարեն 3 000 դրամ։

Այլ ոգելից խմիչքներից ունենք նաեւ «Տրինիտիում» պատրաստված խաղողի օղի եւ գինու լիկյոր։

Միջնաճաշ եւ համագործակցություն հարեւանների հետ

Մեր առավելությունն այն է, որ հարեւանությամբ են InVino-ն ու «Տապաստանն» են, եւ եթե այցելուները որեւէ բան են պատվիրում, որ չունենք, կարող են վերցնել այնտեղից։

Կեսօրից մինչեւ 17։00-ն «Սթեյքարարում» միջնաճաշ է։ Նոր ենք սկսել, դեռ չենք զարգացրել, բայց այդ ժամերին այցելուները կարող են ուտել արիշտա, բրդուջներ, սպաս եւ այն ամենը, ինչ արդեն հասցրել են սիրել The Club-ում։

Լուսանկարը՝ Մեդիամաքս


Անընդհատ աշխատում ենք նորությունների ուղղությամբ, օրինակ՝ ձկնային ուտեստներ շատ չունենք, այժմ փորձում ենք լրացնել, մսային ուտեստները եւս կավելանան, մասնավորապես՝ գառան, բայց ոչ խոզի, որովհետեւ այն ուտելու համար պետք է ամբողջությամբ եփված լինի, իսկ մենք չենք կարող հետեւել՝ հաճախորդն այն լավ պատրաստեց, թե՝ ոչ։

InVino-ն այստեղ գինու համտեսներ է կազմակերպում, գինեգործները բերում են իրենց արտադրանքը, մեր խոհարարն էլ պատրաստում է դրանց համապատասխան ուտեստներ։

Լուսանկարը՝ Մեդիամաքս


«Սթեյքարարը» նաեւ մշակութային կյանք է ունենալու, շուտով հայտարարելու ենք լուսանկարչական մրցույթներ։ Լուսանկարները կախվելու են այստեղ եւ The Club-ում, որ հաճախորդները կարողանան գնահատական տալ, եւ մարդիկ մրցանակներ են շահելու։ Մշակութային կյանքն այստեղ հիմնականում լինելու է պատերի շնորհիվ, որովհետեւ տարածքը փոքր է, համերգ կամ երաժշտություն չի կարող լինել։

Անի Խչոյան

Լուսանկարները՝ Էմին Արիստակեսյանի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին