Ռեստորանների հայկական միությունն այսօր հանդես է եկել հայտարարությամբ՝ կառավարության կողմից առաջարկվող հարկային փոփոխությունների վերաբերյալ:

Հայտարարության մեջ, մասնավորապես, ասված է.

«Միությունը կտրականապես դեմ է կառավարության կողմից առաջարկվող, ֆինանսների ու էկոնոմիկայի նախարարությունների կողմից նախնական քննարկման դրված ընդհանուր ԱԱՀ համակարգի ներդրման հայեցակարգին, որով վերացվում է նաեւ շրջանառության հարկի տեսակը, ի մասնավորի, հանրային սննդի ոլորտում աշխատող ընկերությունների համար։

2020-ին համավարակի եւ պատերազմի ճգնաժամերից դեռեւս լիովին դուրս չեկած եւ նոր վերականգնվող տնտեսության ոլորտների, մասնավորապես հանրային սննդի բնագավառի համար առաջարկվող հարկային փոփոխությունների արդյունքում մի քանի՝ 3-4, անգամ կավելանա հարկային բեռը եւ կունենա ծանր հետեւանքներ՝

- անհամեմատ կբարձրանան մատուցվող ծառայությունների արժեքները,

- կառաջանա անհավասար մրցակցություն,

- կփակվեն հարյուրավոր ձեռնարկություններ,

- կկորսվեն հազարավոր աշխատատեղեր։

Սա իր հերթին բերելու է նաեւ հանրային սննդի կողմից վճարվող հարկերի կրճատման։

Միաժամանակ հիշեցնում ենք, որ 2018-ին արդեն իսկ երեք անգամ ավելացել է հանրային սննդի ոլորտի հարկային բեռը, ինչը նշանակում է, որ առաջարկվող հայեցակարգի ընդունման դեպքում ընդամենը 3 տարում մեր բնագավառի բիզնեսի հարկումը ավելանում է 10 անգամ։

Սա անթույլատրելի է։

Ելնելով վերոնշյալից՝ պահանջում ենք պահպանել շրջանառության հարկը առկա կարգավորումներով, բարելավել հարկային վարչարարությունը եւ չխոչընդոտել այս հետճգնաժամային իրավիճակում հանրային սննդի ոլորտի վերականգնմանը»։