×
Հայաստանում առաջին քրաֆթ գարեջրատունը՝ Dargett Brewpub-ն արդեն վաղուց ոչ միայն ավանդական մեթոդով պատրաստված գարեջրի սիրահարների, այլեւ հագեցնող ընդմիջում եւ հաճելի ընթրիք նախընտրողների սիրելի վայրն է:
Dargett-ի որդեգրած սկզբունքն է՝ միշտ թարմություն ու նորություն առաջարկել հաճախորդին: Նոր եւ թարմացված մենյուով Dargett-ը կներկայանա մայիսի վերջին: Dargett Brewpub-ի շեֆ խոհարար Ֆելիքս Ավալյանը GastroVino-ին պատմել է սպասվող նորույթների մասին:
Շեշտը՝ տաք ուտեստների վրա
Dargett-ի նոր մենյուում շեշտը դրել են տաք ուտեստների վրա: Փորձը ցույց է տվել, որ հաճախորդները սիրում են ոչ միայն նախուտեստային տարբերակներ, այլ նաեւ հիմնական ուտեստներ:
Ֆելիքս Ավալյանը | Լուսանկարը՝ Մեդիամաքս
«Այս պահին նոր մենյուից երկու-երեք ուտեստ ունենք, որոնք արդեն հատուկ առաջարկի տարբերակով ներկայացնում ենք հաճախորդներին: Դրանցից մեկը հնդկահավի փափկամիսն է Ալֆրեդո սոուսով: Ընդհանրապես, հնդկահավի միսը Հայաստանում սպեցիֆիկ ընկալում ունի, մտածում են, որ այն չոր է եւ հնարավոր է մարդկանց այդքան էլ դուր չգա: Բայց հնդկահավի մսի հետ աշխատելու հետաքրքիր տարբերակներ ու պատրաստման ձեւեր կան: Մենք փորձել են այն մատուցել սերուցքային սոուսով եւ սիցիլիական ձիթապտղով: Հաջողված տարբերակ է ստացվել եւ արդեն սիրվել է»,- պատմում է Ֆելիքս Ավալյանը:
Հնդկահավի փափկամիսը | Լուսանկարը՝ Dargett
Նա ասում է, որ հնդկահավի միսը համադրելի է բաց գույնի եւ ոչ շատ ընդգծված դառնություն ունեցող, ինչպես նաեւ մրգային գարեջրերի հետ:
Dargett-ի նորույթներից է տավարի մսից պատրաստվող Դեստիֆադոն, որն այստեղ իսպանական եւ գերմանական համադրության տարբերակով է պատրաստվում:
«Պատմությունը ցույց է տալիս, որ այն սկզբում պատրաստել են իսպանացիները, հետո գերմանացիները մատուցել են նոր տարբերակով: Մենք այն մատուցում ենք դառգետյան ձեւով, բայց այս պարագայում ոչ թե գարեջրի, այլ գինու սոուսով: Դեռեւս նմանատիպ էքսպերիմենտ չէինք ունեցել»,- ասում է խոհարարը:
Ֆելիքս Ավալյանը | Լուսանկարը՝ Մեդիամաքս
Dargett-ում կլինի նաեւ ծխեցված մսի տեսականու մեծ ափսե՝ նախատեսված մինչեւ տասը հոգու համար: Դրա մեջ լինելու են 3-4 տեսակի միս՝ խոզ, տավար, հավ: Ծխեցման ամբողջ պրոցեսն անցկացվում է Dargett-ի խոհանոցում:
Լուսանկարը՝ Մեդիամաքս
«Բացի այն, որ սա լինելու է մեծ խմբերի համար, նախատեսված է նաեւ յուրահատուկ քիմքի տեր մարդկանց համար: Ծխեցված այս տարբերակները ավելի շատ համադրելի են Stout՝ մուգ տեսակի գարեջրի, ինչպես նաեւ ալկոհոլի ավելի բարձր պարունակությամբ գարեջրերի տեսակների հետ»,- ասում է շեֆը՝ նշելով, որ փորձարկումներ են անում նաեւ գառան մսի հետ:
Պաստաները վերադառնում են
Dargett-ի մենյու են վերադառնում սիրված պաստաները: Ցանկում կարելի է գտնել ծխեցված իշխանով պաստա, կապույտ պանրով պաստա, Կարբոնարա, պաստա բուսակերների համար, Պենե՝ դարգետյան «հոմ-մեյդ» կծու նրբերշիկով:
Ֆելիքս Ավալյանը | Լուսանկարը՝ Մեդիամաքս
Ֆելիքսն ասում է, որ Dargett-ում փորձում են հեռանալ ինդուստրիալ կիսաֆաբրիկատներից եւ ամեն ինչ տեղում պատրաստել.
«Նրբերշիկների ամբողջ տեսականին, բացի մեկից, պատրաստվում է Dargett-ի խոհանոցում՝ տեղական մսից: Սա մեր խոհանոցի գլխավոր հաջողություններից մեկն է: Սկսեցինք մեկ տեսակից եւ հիմա արդեն 6 տեսակի՝ տեղում պատրաստվող նրբերշիկ ունենք՝ խոզի, տավարի, հավի: Այսքանով կանգ չենք առնելու»:
Դառգետյան դեսերտը
Շոկո օթ, բիրամիսու, լավա քեյկ, բրաունի... աղանդերի շարքը Dargett-ում այս անուններով չի սահմանափակվում: Այստեղ եւս նորույթ կա։
«Շոկո օթը վարսակի հիմքի վրա պատրաստվող դեսերտ է: Վարսակը մոտավորապես 40 րոպե եփվում է կարագի մեջ, որ փափկություն ստանա, հետո խառնվում է 72 տոկոսանոց շոկոլադին: Շոկո օթի սոուսը կառամելային է՝ Մուսկովադո շաքարավազից պատրաստված: Այն բարձրակարգ շաքարավազների դասին է պատկանող մուգ շաքարավազ է»,- պատմում է խոհարարը:
Շոկո օթը | Լուսանկարը՝ Մեդիամաքս
Շոկո օթը մատուցվում է պիստակով եւ սպիտակ շոկոլադով պաղպաղակի հետ:
Dargett-ի պաղպաղակները եւս տեղում են պատրաստվում: Բալով, սուրճով պաղպաղակը օգտագործվում է դեսերտի հետ: Մենյուում կան հալվայով եւ պիստակով, շոկոլադով եւ վանիլային պաղպաղակներ: Շուտով կլինի նաեւ կարամելային:
Բիրամիսուն | Լուսանկարը՝ Մեդիամաքս
Իտալական տիրամիսուի դառգետյան տարբերակը բիրամիսուն է: Անունն արդեն հուշում է, որ գարեջրով է պատրաստված: Մասկարպոնե հայտնի պանրով տիրամիսույի թխվածքաբլիթները համեմված են Porter գարեջրով:
Ֆելիքս Ավալյանը խորհուրդ է տալիս աղանդերի այս տեսակների հետ փորձել Stout եւ Porter տեսակի գարեջուր:
18+ գարեջուր
Dargett-ի «ներկապնակում» 18 տեսակի հիմնական գարեջուր կա: Այս տեսակների կողքին միշտ կարելի է հանդիպել պահեստային ծորակների՝ հատուկ առաջարկների համար:
Լուսանկարը՝ Մեդիամաքս
«Հատուկ առաջարկվող գարեջրերն այն եփումներն են, որոնք պատրաստվում են ընդամենը 300-500 լիտր ծավալով եւ սովորաբար չեն կրկնվում: Հիմնական տեսակների մեջ բոլորն իրենց քիմքին հարմար գարեջուր գտնում են, բայց մարդիկ չպետք է վախենան նորություններ փորձարկել, այդպես նաեւ քիմքն է կրթվում»,- ասում է Ֆելիքս Ավալյանը:
Լուսանկարը՝ Մեդիամաքս
Նա հիշում է, երբ Dargett-ը բացվեց, հիմնական գարեջրերի շարքը 8-10 տեսակ էր, իսկ 18-ի է հասել հատուկ առաջարկները սիրվելու ու հիմնականների շարքը համալրելու ձեւով:
Dargett-ում չեն բացառում, որ հիմա եւս հնարավոր է շատ սիրված «սփեշլ» տարբերակ հայտնվի 18-ի շարքում կամ փոխարինի հիմնականներից մեկին. «Շատ հետաքրքիր գայլուկների (хмель) հետ ենք փորձարկումներ անում`ամերիկյան, եվրոպական, ավստրալիական, պատվիրում ենք քրաֆտային ակտիվ ուղղվածություն ունեցող երկրներից:
Լուսանկարը՝ Մեդիամաքս
Բայց այստեղ շատ կարեւոր փաստ պետք է ընդգծել, որ անկախ այս պատվերներից՝ հայկական ջուրն իր յուրահատուկ համային դերախաղը ունի գարեջրերի համի վրա, մասնավորապես բոլորի կողմից սիրված Pilsner տեսակում»:
Լուսանկարը՝ Մեդիամաքս
«Չունենք ինչ-որ սահմանափակումներ, այստեղ շատ ստեղծարար ընթացք է ամեն օր, բաց ենք ցանկացած փորձարկման առաջ, որպեսզի միշտ նորություններ հարցնենք մեր հաճախորդներին»,- ամփոփում է Ֆելիքս Ավալյանը:
Արփի Ջիլավյան
Լուսանկարները՝ Էմին Արիստակեսյանի
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: