Վրաստանի գյուղատնտեսության նախարար Լեւան Դավիթաշվիլին այցելել է ոստրեների եւ միդիաների արտադրությամբ զբաղվող «Maricultura Georgia» ձեռնարկություն:

Ինչպես հայտնում է «Նովոստի-Գրուզիա»-ն, ստորջրյա ֆերման սկսել է գործել 2020 թվականին՝ Աջարիայի Կվարիատի գյուղի մոտակայքում:

Ֆերման զբաղեցնում է 70 հա ծովային տարածք: Բերքատվությունը մեկ սեզոնի համար կազմում է 30 տոննա միդիա եւ 10-15 տոննա ոստրեներ: Միդիաները հասնում են երկու տարվա ընթացքում, ոստրեները՝ չորս:

Թարմ արտադրանքը վաճառվում է մայիսից հոկտեմբեր: Տարվա մնացած մասը ընկերությունն առաջարկում է շոկային մեթոդով սառեցված ծովամթերք:

Առայժմ արտադրանքը վաճառվում է տեղական շուկայում, սակայն նախատեսվում է նաեւ արտահանում. վրացական միդիաներով եւ ոստրեներով  հետաքրքրված են Ուկրաինան, Ռուսաստանը, Հոնկոնգը, Կանադան եւ Ադրբեջանը: