×

Լուսանկարը՝ Մեդիամաքս

The Kond House՝ հին երեւանյան մեծ տուն-ռեստորանը

Հին երեւանյան բակ ու այդ բակում ծվարած մի տնակ: Կոնդի նեղլիկ աստիճանները բարձրանալիս գլխում Երեւանի երգչի՝ Ֆորշի երգերն են հնչում, The Kond House-ին մոտենալիս՝ հասկանում ես, որ ոչ թե հատուկ ստանդարտներով ռեստորան, այլ կոնդեցու հին ու բարի տուն ես մտնելու, որտեղ կարելի է ընկերանալ տանտերերի հետ ու համեղ սնվել:

3-ամյա The Kond House-ի հիմնադիր Նարեկ Բախտամյանն ասում է՝ «այն երեւանյան մեծ տուն է», որտեղ կարելի է գտնել ընտանեկան ռեստորան, բացօթյա սրճարան, գրիլ բար ու պարային ակումբ»:

Մոտիվացնողն այցելուներն են

«Ամեն ինչ սկսվել է փաբային ֆորմատ ունեցող փոքրիկ սրահից, որին հետագայում տարբեր նախագծեր ավելացնելով՝ ամբողջացրեցինք The Kond House-ը»,- GastroVino-ին պատմում է Նարեկ Բախտամյանը:

Լուսանկարը՝ Մեդիամաքս


Այսօր The Kond-ն իր հիմնական սրահից բացի՝ «Սարտր», «Ուրիշ տեղ», «Moyka Garage Bar» սրահներ ունի, որտեղ այցելուներին առաջարկում է ավանդական խոհանոցի ճաշատեսակներից մինչեւ հեղինակային ուտեստներ ու խմիչքներ:

«Ի սկզբանե մեծ խոհանոց չունեինք, բրդուճներ էինք պատրաստում, որոնք համադրելի էին բարում առաջարկվող տարբեր խմիչքների հետ, հետո մանղալ դրեցինք, որոշեցինք «սթրիթ ֆուդ» տարբերակով կրակի վրա բուրգերներ ու հոթ-դոգեր պատրաստել»,- ասում է հիմնադիրն ու ավելացնում, որ ավելի մեծ ու բազմազան խոհանոց ունենալու համար այցելուներն են մոտիվացրել:

Լուսանկարը՝ Մեդիամաքս Նարեկ Բախտամյանը


«Գալիս հարցնում էին՝ ինչու՞ սթեյք կամ աղցաններ չունեք: Այսպես՝ իրենց պատվերներով, մեզ առաջ տարան ու փոքր մանղալից հասանք այն ամենին, ինչն այսօր ունենք: Ձեւավորվեց մեր խոհանոցը՝ իր սեզոնային մենյուով, որտեղ կարելի է գտնել ապուրներ, հարիսա, ջայլամի մսի սթեյք, պաստա, բուրգերներ, ծովամթերք ու աղցաններ»,- ասում է նա։

«Տնական» ֆորմատը պահպանելով

The Kond House-ը, նախագծերի ավելացման հետ մեկտեղ, չի շեղվել խոհանոցի համար ի սկզբանե ընտրված գաղափարից՝ պահպանել բարի ու տնական ֆորմատը, մի քիչ էլ ստանդարտներից «ծուռ» լինելը:

Լուսանկարը՝ Մեդիամաքս


«Մեր խոհանոցի վրա ազդեցություն են ունեցել նաեւ ճանապարհորդությունները՝ իրենց հետո բերելով տարբեր խոհանոցների համեր: Մենյուում ներկայացված են սովետական, իտալական, ֆրանսիական անկյուններ:

Ավելի պարզ ասած՝ ներառել ենք այնպիսի ուտեստներ, որոնք կարող ես համտեսել ցանկացած սովորական ֆրանսիացու կամ իտալացու տուն հյուր գնալիս: Այս տրամաբանությամբ գնացինք, ու արձագանքը շատ հետաքրքիր եղավ»,- պատմում է Նարեկը:

Լուսանկարը՝ Մեդիամաքս


Ինչ վերաբերում է շեֆ-խոհարարի աշխատանքային առանձնահատկություններին՝ հիմնադիրն ասում է.

«Մեզ մոտ շեֆի աշխատանքի կարեւորագույն մաս է մթերքի գնումը: Առավոտյան՝ ժամը 7-ից նա շրջում է շուկաներով, ընտրում որակյալ ու թարմ մթերք: Կարող է 10 հոգու մոտ պոմիդոր փորձել ու ընտրել, թե որը գնի: Այս պրակտիկան Հայաստանում գրեթե չկա: Այն ֆրանսիական մոդել է՝ որ շեֆն առաջինն է հասնում շուկա, նա ամենալավ մթերքն է վերցնում: Այս ձեւով ենք մենք փորձում լինել ու մնալ համով ու որակով ուտելու տեղ»:

Լուսանկարը՝ Մեդիամաքս


Հայաստանում կարանտինային օրերից հետո բացվել է The Kond House-ի ամառային բացօթյա սրահը՝ «Ուրիշ տեղ»-ը:

Լուսանկարը՝ Մեդիամաքս


«Սրահի ամառային ճաշացանկում առաջարկում ենք կրակի վրա պատրաստված մսի տեսականի: Այս տարի մեզ մոտ իր ուրույն տեղն ունի նաեւ ծովամթերքը՝ թունա, լոքո, սազան, սիբաս, դորադո ձկնատեսակները»,- ասում է Նարեկ Բախտամյանը:

Լուսանկարը՝ Մեդիամաքս


The Kond-եցիներին եւս մեկ բացօթյա անկյուն է սպասում՛ «Թարմի տակ» անունով:

The Kond House-ի հեղինակայինները

«Կոնդի տան» շեֆ խոհարար Վաչագան Պողոսյանը GastroVino-ի խցիկի առաջ կրակի վրա պատրաստվող տավարի սիրտը, լոքոն ու գարեջրի մեջ հնեցված խոզի միսն է ներկայացնում, իհարկե, դրանց՝ նախօրոք համեմելու գաղտնիքները չբացահայտելով:

Լուսանկարը՝ Մեդիամաքս


 «Ընդհանրապես, գարեջրի համը մսի հետ հետաքրքիր համադրություն է դառնում, միեւնույն ժամանակ տարբեր գարեջրերով տարբեր համեր կարելի է ստանալ»,- արդեն հնեցված միսը կրակին դնելով՝ ասում է շեֆը:

Լուսանկարը՝ Մեդիամաքս Վաչագան Պողոսյանը


Նա նշում է, որ խոզի միսը կարելի է հնեցնել նաեւ գինու ու ռոմի մեջ.

«Մեր խոհանոցում բացառել ենք սառցարանը: Ծովամթերքից բացի՝ ոչնչի համար սառցարան չենք օգտագործում, մսամթերքը երբեք խորը սառեցման չենք դնում, որի շնորհիվ պահպանվում են համային նոտաները»։

Լուսանկարը՝ Մեդիամաքս


Կոկտեյլները

Մինչեւ մսային տարբերակները կրակի վրա կհասնեն եփվածության անհրաժեշտ աստիճանի՝ բացօթյա բարում զրուցում ենք The Kond House-ի բար-մենեջեր Մհեր Գաբրիելյանի հետ:

«Ուզում ենք գնալ նրան, որ ոգելից ու ոչ ոգելից խմիչքների դասական առաջարկեներից բացի՝ ունենանք նաեւ մեր ֆիրմայինը: Եթե ստացվում է ստեղծել սեփականը, ուրեմն պետք է փորձել»,- ասում է Մհերն ու առաջարկում պատրաստել «Ալիսա» ու «Լոլիտա» կոկտեյլները:

Լուսանկարը՝ Մեդիամաքս


Զրույցին է միանում Նարեկն ու ասում, որ հեղինակային կոկտեյլների անունները պատահական չեն ընտրված, դրանք իրենց պատմություններն ունեն:

«Այս անունները մեր ճամփորդությունների ընթացքում հանդիպած օտարազգի աղջիկների անուններ են»,- ասում է նա (ծիծաղում է, հեղ.):

«Ալիսա» կոկտեյլի հիմք են կազմում կարկադեի սառույցն ու ալոե վերայի հյութը, իսկ Լոլիտայինը՝ կամպարին, օղին, մանգոյի հյութն ու տոնիկը:

The Kond House-ում ստեղծված խմիչքներից բար-մենեջերն առանձնացնում է «Սալթին», «Sweet Tiramisu»-ն, «Լիմոնչելո»-ն:

Լուսանկարը՝ Մեդիամաքս


«Օրինակ՝ «Սալթի»-ի պատրաստելու համար տեկիլան մոտ 20 օր հնեցնում ենք ծիծակի մեջ: Մեր կոկտեյլների համար օգտագործում ենք նաեւ Bakhtamyan Distillery-ի մրգօղիները, շուտով կունենանք նաեւ մեր սեփական մուրաբաները, որոնց հյութը եւս կօգտագործենք կոկտեյլների համար»,- ասում է Մհեր Գաբրիելյանը:

Ոգելից խմիչքներից բացի՝ այստեղ կարելի է գտնել նաեւ թարխունից, նանայից ու ռեհանից տեղում պատրաստված լիմոնադներ:

Հ.Գ. Զրույցի ողջ ընթացքում Նարեկը դիմավորում է հաճախորդներին վաղեմի ծանոթի պես, տեղավորում սեղանի շուրջ, կատակում ու որպիսություն հարցնում:

Արփի Ջիլավյան

Լուսանկարները՝ Էմին Արիստակեսյանի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին