Աշխարհի հայտնի ապուրները փորձելու համար պարտադիր չէ ճամփորդել այլ երկրներ. Wine Republic Yerevan-ի թիմի մեջ մտնող ռեստորանները՝ Asador, Wine Republic Yerevan, Thaiwine Republic, Mao Ze Duck, առաջարկում են համտեսել իրենց էկզոտիկ ապուրներն ու լայնորեն ճանաչել այլ երկրների խոհանոցները: Այս ռեստորաններում ապուրները պատրաստվում են տարբեր ազգերի շեֆ-խոհարարների կողմից. նրանք իրական ու անսովոր համերը չեն փոխում եւ չեն հարմարեցնում հայերի քիմքին: 

Wine Republic Yerevan-ի թիմը GastroVino-ի համար իր ճաշացանկերից առանձնացրել է must-try ապուրներից մի քանիսը եւ ներկայացնում է դրանց պատրաստման եղանակները, պատմությունն ու յուրահատկությունը: 

Թոմ յամ 

Թաիլանդական խոհանոցի ամենաավանդական ու հայտնի կերակուրներից մեկը Թոմ յամ (Tom yum) ապուրն է. յուրահատուկ համ ունի, ե՛ւ թթու է, ե՛ւ կծու: 

8

Թոմ յամ ապուրը | Լուսանկարը՝ Wine Republic Yerevan

Թոմ յամ ապուրը պատրաստում է Thaiwine Republic-ի թաիլանդացի շեֆ-խոհարար Վիտայա Թոնգսոդսաենգը: Թոմ յամն ամենապահանջված կերակուրներից մեկն է՝ հատկապես զբոսաշրջիկների կողմից: Շեֆ-խոհարար Վիտայան ոչ մի համ չի փոխում, պատրաստում է այնպես, ինչպես Թաիլանդում էր պատրաստում: 

Այս ապուրի համար օգտագործում են ծովախեցգետին ու կոկոսի կաթ: Մյուս կարեւոր բաղադրիչներն են կիտրոնախոտը, գալանգալը, կաֆիր կրաքարի տերեւները, սունկը եւ լոլիկը, ավելացվում են նաեւ մի շարք համեմունքներ: 

8

Թոմ յամ ապուրը | Լուսանկարը՝ Wine Republic Yerevan

Թոմ յամը հարյուրամյակներ առաջ սկսել են պատրաստել կենտրոնական Թաիլանդում, այս հատվածում ծովախեցգետինն այնքան շատ է եղել, որ սկսել են օգտագործել նաեւ ապուրում՝ չգիտակցելով, որ այն տարիներ հետո դառնալու է իրենց ազգային կերակուրը: 

Թոմ խա գայ 

Այս թաիլանդական ապուրը շատ նման է Թոմ յամին, սակայն ավելի քիչ կծվություն ունի եւ պատրաստվում է հավի մսով: 

Թոմ խա գայ (Tom kha gai) արտահայտությունը եթե ուղիղ թարգմանենք, կստացվի հավով եւ գալանգալով ապուր: 

Չորս հիմնական բաղադրիչները կրկնվում են՝ կոկոսի կաթ, կիտրոնախոտ, գալանգալ, կաֆիր կրաքարի տերեւներ: 

Թոմ խա գայ ապուրը նույնպես ամենասիրելի ասիական ուտեստներից է, սակայն սրա մասին շատերը պարզապես չգիտեն: 

Կծու-թթու

Չինաստանի կծու-թթու ապուրը հայտնի Սիչուան շրջանից է: Այս ապուրը Wine Republic Yerevan-ի ռեստորաններում մատուցվում է նույնությամբ, ինչպես Չինաստանում կմատուցեն՝ այն պատրաստում է չինացի շեֆ-խոհարար Մաո Շունտաոն: 

8

Կծու-թթու ապուրը | Լուսանկարը՝ Wine Republic Yerevan

Պատրաստվում է հավով, սեւ ֆունգուսով, ավելացվում է գազար եւ ձու: Երբ այս ապուրն առաջին անգամ են փորձում, հաճախ անմիջապես չեն հավանում՝ կծու եւ թթու համադրության պատճառով: Մինչդեռ այն հաճախորդները, որոնք լավ ծանոթ են չինական կծու-թթու ապուրին, սկսում են այնքան սիրել, որ անգամ կախվածություն է առաջանում: 

Ֆո բո

Վիետնամական ապուր է Ֆո բոն (Pho Bo), Հայաստանում բավականին տարածված է: Այս ապուրը համարվում է Վիետնամի ազգային ուտեստը: 

8

Ֆո բո ապուրը | Լուսանկարը՝ Wine Republic Yerevan

Ամենակարեւոր բաղադրիչներն են՝ տավարի փափկամիս եւ բրնձե նուդլներ: Այս կերակուրը տավարի արգանակի հիման վրա է պատրաստվում: Օգտագործվում է նաեւ կոճապղպեղ, դարչին, մեխակ, անիսոն, սովորական եւ կանաչ սոխ: Տավարի մսի փոխարեն Ֆո բոն որոշ վայրերում պատրաստում են նաեւ հավի մսով: 

Աշխարհի տարբեր հատվածներում այս ապուրի մեջ օգտագործում են տարբեր հաստության եւ ձեւի նուդլներ, Wine Republic Yerevan-ի ռեստորաններում այն մատուցվում է տափակ ու բարակ նուդլներով: Ապուրի հետ առանձին մատուցվում են նաեւ սոյայի ծիլեր եւ չիլի: 

8

Ֆո բո ապուրը | Լուսանկարը՝ Wine Republic Yerevan

Պատրաստելիս քայլ առ քայլ հավաքում են բոլոր մթերքները, որից հետո վրան ավելացնում են թափանցիկ արգանակը: Մեկ ամբողջ օր է պահանջվում արգանակը ճիշտ եփելու համար, այսպիսով՝ ապուրը վերջնական պատրաստ է լինում հաջորդ օրը: 

Սոխով ապուր

Ֆրանսիական սոխով ապուրի (French onion soup) առաջացման հետ կապված մի շարք վարկածներ կան, ամենատարածված պատմությունը հետեւյալն է՝ այս ապուրը շատ հին ժամանակներում համարվել է աղքատ մարդկանց ուտելիք: Այսօր սոխով ապուրը Ֆրանսիայի ազգային ուտեստներից է:

Հայտնի ապուրը պատրաստում են տավարի արգանակով. մատուցելիս ավելացնում են չորահաց՝ պարմեզանով: 

8

Սոխով ապուրը | Լուսանկարը՝ Wine Republic Yerevan

Թվում է՝ ամբողջությամբ սոխով պատրաստված ապուրը ոչ այնքան հաճելի ուտեստ պետք է լինի, սակայն Wine Republic-ից վստահեցնում են՝ եթե այս ապուրը ճիշտ է եփվում, այն շատ համեղ ու յուրօրինակ կերակուր է դառնում՝ անգամ սոխ չսիրողների համար: 

Չաուդեր    

Չաուդերը (Chowder) միակ ապուրն է Wine Republic Yerevan թիմի բոլոր ռեստորաններում, որ մատուցվում է հացի մեջ: Ուտելու ընթացքում հացից նույնպես կարելի է օգտվել: Այս ապուրը տարբեր երկրներում տարբեր կերպ են առաջարկում՝ հացի մեջ, եւ առանց հացի:

8

Չաուդեր ապուրը | Լուսանկարը՝ Wine Republic Yerevan

Չաուդերը հայտնի է Հյուսիսային Ամերիկայից, այն իրենց հետ բերել են Ֆրանսիայի եւ Անգլիայի ներգաղթյալները: 

Կրեմային ապուր է, պատրաստում են միդիաներով եւ ծխեցրած ձկով, ավելացվում է նաեւ խոզի ապխտած միս, կարտոֆիլ, սպիտակ գինի, նեխուր եւ դարչին: 

Ամալի Խաչատրյան 

Լուսանկարները՝ Wine Republic Yerevan-ի