Նորաբաց Seasons-ը դարձել է Երեւանի այն եզակի ռեստորաններից, որտեղ շատերն այցելում են՝ հատկապես շեֆ-խոհարարին ճանաչելու ու նրա ճաշատեսակները փորձելու համար: Ռուսաստանից ժամանած հայազգի շեֆ-խոհարար Հայկ Վեյշտորտն անձամբ է հանդիպում ռեստորանի այցելուներին, առաջարկում իր յուրօրինակ ուտեստները, պատմում յուրաքանչյուրի նախապատմությունը, հուշում համադրությունները: Ռուսաստանում, Իսպանիայում, Ղազախստանում, Ուկրաինայում ապրելուց եւ աշխատելուց հետո Հայկը, Seasons-ի հրավերով, վերադարձել է Հայաստան, որպեսզի թարմություն բերի հայկական խոհանոցին:

8

Հայկ Վեյշտորտը

Seasons Armenia-ի ճաշացանկում խոհանոցի պատասխանատուն առաջարկում է շատ հայկական ուտեստներ՝ պատրաստված ոչ ավանդական եղանակներով: Հայկը շատ անգամներ է արտասահմանում հայկական ընթրիքներ կազմակերպել ու ներկայացրել հայկական ժամանակակից խոհանոցը՝ ռավիոլի տժվժիկով կամ հարիսա՝ որպես ռիզոտո: Seasons-ի ճաշացանկը համալրվել է նման եզակի ուտեստներով, որոնցից մի քանիսը GastroVino-ի համար ներկայացնում է Հայկ Վեյշտորտը:

Տարտար տոլմա

Փոքր ժամանակ տոլմայի ֆարշն էի շատ սիրում. երբ տատիկս տոլմա էր փաթաթում (իսկ նա անմահական տոլմա էր պատրաստում), սովորություն ունեի գդալով կողքից ուտել: Ասում էի՝ ես չեմ, այլ փափուկ խաղալիք գայլն է ուտում. մինչեւ հիմա կա այդ խաղալիքը, կարմիր գծերով կանաչ գայլուկ է: Տարիներ անց հասկացա, որ այն ինչ ինձ դուր էր գալիս, կարող է վերածվել տարտարի:

Տարտար տոլման պատրաստում ենք այն ամենով, ինչ օգտագործվում է տոլմայի ֆարշի մեջ, բայց ամբողջովին այլ կերպ:

8

Տարտար Տոլմա

Բրինձն առանձին պոպկորնի նման խրթխրթան ենք սարքում: Խաղողի թփերը երկար ժամանակ չորացնում ենք, մտցնում ենք եռացող խաղողի ձեթի մեջ, ապա չորացնում ենք. դառնում է տապակած խաղողի տերեւ: Սկզբում տարտարն ենք դնում, հետո «բրնձե պոպկորնը» ու խաղողի թերթիկները:

Տարտար մարինացված իշխանով եւ ծիրանի կրեմով

Տարտարը պատրաստում ենք իշխան ձկից:

Ցոգոլը եւ ավոկադոն հարում ենք ու «պաղպաղակ» սարքում, ավելացնում ենք լոմո սոուս:

8

Տարտար մարինացված իշխանով եւ ծիրանի կրեմով

Տարտարը լցնում ենք թարմ սպանախի տերեւների մեջ, վրան ավելացնում ցոգոլի կրեմը. դառնում է «հայկական տակո»:

Գառան մեջք կոտեմով եւ կարտոֆիլի մուսով

Գառան մեջքի հատվածից ռուլետ ենք սարքում, հատուկ ջերմաստիճանով եփում ենք, այնուհետեւ հալած յուղի մեջ տապակում:

8

Գառան մեջք կոտեմով եւ կարտոֆիլի մուսով

Տապակած կարտոֆիլից սոուս ենք պատրաստում, մատուցում ենք նաեւ կարտոֆիլի պլեճ, վրան ավելացնում կոտեմ: Ի դեպ, գառան միսը եւ կոտեմը շատ լավ համադրելի են:

Ֆիլե մինյոն

Տեղական տավարի միս է, այնպիսի հատուկ եղանակով ենք պատրաստում, որ պահպանի կարմիր գույնը:

8

Ֆիլե մինյոն

Ոսկորը եփում ենք 48 ժամ, որ սոուս դառնա, խակ խաղողից ձեթ ենք պատրաստում ու երկուսը միասին հարում ենք. ստանում ենք այս կանաչ զանգվածը:

Կողքը դնում ենք ոսկրածուծից սուֆլե, վրան՝ խոզի կաշի, որը եփում ենք, չորացնում ու տապակում այնպես, որ խրթխրթան դառնա:

Հայկական բադ (գյուղական)

Միսը պատրաստում ենք կոնֆի եղանակով (միսը ամբողջովին յուղի մեջ՝ ցածր կրակի վրա երկար եփված): Առանձին պատրաստում ենք եգիպտացորենի շիլա եւ գարնիր: Բազուկի ճավը մարինացնում ենք՝ տատիկիս բաղադրատոմսով, ու վերջում թեթեւ տապակում ենք:

8

Հայկական բադ

Մատուցում ենք երկու սոուսով՝ խողովակաձեւ ոսկորներից պատրաստված սոուս եւ հնեցված պանրի սոուս:

Միկադո

Համարձակվել ենք ոտքից գլուխ քանդել ու նորից հավաքել Հայաստանում ավանդական դարձած Միկադո աղանդերը, որը գրեթե բոլոր ընտանիքներում պատրաստվում է:

8

Միկադո

Կիսել ենք երեք մասի. Միկադո պաղպաղակ, դասական Միկադոյի փոքրիկ կտոր եւ Միկադո սոուս: Արդյունքում՝ սիմֆոնիա եւ գերհզոր համ:

Ամալի Խաչատրյան

Լուսանկարները՝ Seasons Armenia-ի