Օգոստոսի 27-ին կայացած Հայաստանի խաղողագործության և գինեգործության հիմնադրամի (ՀԽԳՀ) հոգաբարձուների խորհրդի նիստում քննարկվել են 2026 թվականին Հայաստանում անցկացվելիք Concours Mondial de Bruxelles գինու միջազգային մրցույթի կազմակերպչական հարցերը եւ բյուջեն։

«Հիմնադրամի հոգաբարձուների խորհրդի նախագահ, ՀՀ էկոնոմիկայի նախարար Գևորգ Պապոյանը ընդգծել է մրցույթը բարձր որակով կազմակերպելու անհրաժեշտությունն ու դրա կարևորությունը՝ որպես հարթակ հայկական գինեգործությունն ու գինու տուրիզմը համաշխարհային մակարդակով առաջ մղելու համար։ Մրցույթը Հայաստանում անցկացնելը բացառիկ հնարավորություն է աշխարհին ներկայացնելու երկրի հազարամյա գինեգործական ժառանգությունը, եզակի տերուարներն ու հազվագյուտ խաղողի սորտերը», - ասված է հիմնադրամի հաղորդագրության մեջ:

Concours Mondial de Bruxelles-ը խոշորագույն միջազգային հարթակ է, որտեղ տարբեր երկրներից մոտ 400 պրոֆեսիոնալ գնահատողներ համտեսում են կարմիր եւ սպիտակ շուրջ 7 500 գինիներ՝ մոտ 50 երկրից։ 

Վերջին տարիներին մրցույթը հյուրընկալող երկրներից են եղել Չեխիան, Լյուքսեմբուրգը, Իսպանիան, Իտալիան, Ֆրանսիան, Խորվաթիան, Մեքսիկան, Չինաստանը: