×

Լուսանկարը՝ Մեդիամաքս Ստեփան Աբրահամյանը

Բարիստա Ստեփանի նռան սուրճը եւ պատրաստման եղանակը

Ստեփանն ապակե կոլբաները շարում է ըստ հերթականության, կարծես քիմիական փորձի է պատրատվում: Իրականում, բարիստա Ստեփանն իր հեղինակած նռան սուրճն է պատրաստում: Նա ապակյա տարայում առաջինը լցնում է նռան հյութ, այնուհետեւ՝ տաք ջուր, որ հյութը բացվի եւ սուրճի հետ համադրվելուց դրա բույրն ավելի լավ զգացվի, հետո սկսում տակից կրակով տաքացնել:

Ստեփան Աբրահամյանը, ով աշխատում է Brew սրճարանում, GastroVino-ի հետ զրույցում կիսվել է նռան սուրճ պատրաստելու իր տարբերակով:

Լուսանկարը՝ Մեդիամաքս Ստեփան Աբրահամյանը


«Երբ կրակով տաքացնում ենք նռան հյութը, այն սկսում է խողովակով բարձրանալ վերեւի տարայի մեջ, հետո ավելացնում ենք կոնյակի տակառի մեջ հնեցված սուրճը: 1-2 րոպե եփման պրոցես է լինում, դրանից հետո կրակը հանգցնում ենք եւ սկսվում է ֆիլտրացման ընթացքը: Ավելորդ մասը մնում է վերեւում, իսկ ֆիլտրված մասն իջնում է ներքեւ: Ընդամենը 3-4 րոպե եւ սուրճը պատրաստ է»,- ներկայացնում է Ստեփանը՝ նշելով, որ սուրճի պատրաստման այս մեթոդը սիֆոնային է կոչվում:

Լուսանկարը՝ Մեդիամաքս


Ոլորտում 12 տարվա աշխատանքային փորձ ունեցող բարիստայի մոտ նռան սուրճ պատրաստելու գաղափարն առաջացել է Brew սրճարանում աշխատանքի անցնելուց հետո:

«15 տարեկանից աշխատել եմ, ե՛ւ բարմեն եմ եղել, ե՛ւ բարիստա: Չէի կարողանում կողմնորոշվել՝ որն է իմ գիծը, բարմե՞նը թե՞ բարիստան: Երկու գործը միաժամանակ անելով ու չկենտրոնանալով, թե որն է իմը, աշխատել եմ այդպես մոտ 10 տարի: Հետո եկավ մի ժամանակ, որ ուզում էի դուրս գալ ոլորտից, սկսեցի տարբեր գործեր անել, բայց արդյունքում վերադարձա էլի այս գործին՝ դեպի սուրճն ավելի հստակ կողմնորոշմամբ: Սկսեցի գիտելիքներն ընդլայնել ու ավելի հմտորեն մոտենալ սուրճի գործին: Երբ աշխատանքի անցա Brew սրճարանում, որը սուրճի ուղղվածություն ունի, սկսեցի ստեղծագործել, նոր գաղափարների սկիզբ դնել: Այստեղ ինձնից պահանջվեց մրգային սուրճ ստեղծել: Երկար չմտածեցի, չգիտեմ էլ՝ ինչու միանգամից նուռը եկավ մտքիս եւ դրա համադրությունը սիֆոնի ու կոնյակի տակառի մեջ հնեցված սուրճի հետ»,- ասում է նա:

Լուսանկարը՝ Մեդիամաքս Ստեփան Աբրահամյանը


Կոնյակի բույր ունեցող սուրճն ու նռան հյութը յուրահատուկ համային համադրություն են ստանում: Ստեփանը նշում է, որ սուրճի հատիկները կոնյակի տակառի մեջ հնեցվում են մի քանի ամիս: Այդ ընթացքում սուրճն իր մեջ ներքաշում է կոնյակի բույրը, ինչն անմիջապես զգացվում է նաեւ եփված սուրճից:

«Չնայած՝ այն մատուցվում է տաք վիճակում եւ կարծում էինք, որ ձմռանն ավելի շատ պահանջարկ կունենա՝ որպես սառը եղանակին ըմպելու հարմար տարբերակ, բայց անգամ այս շոգ ամիսներին այն մեծ պահանջարկ է վայելում: Սրան առավել շատ նպաստեցին Երեւան եկած զբոսաշրջիկների ու բլոգերների հետաքրքրությունն ու թողած արձագանքները սուրճի մասին»,- նշում է նա:

Լուսանկարը՝ Մեդիամաքս


Սուրճի մեջ օգտագործվող նռան խտանյութը եւս Ստեփանի պատրաստածն է, ասում է, որ այն Մեղրիի կամ Արցախի նռից է. «Մեր նռան համահոտային հատկությունները շատ են տարբերվում եւ կարեւոր է ոչ միայն, որ անունը երեւա, այլ մարդիկ իմանան հայկական նռան հատկությունների մասին»:

Լուսանկարը՝ Մեդիամաքս Ստեփան Աբրահամյանը


Ստեփան Աբրահամյանն այժմ արտադրում է 10-ից ավելի տեսակի մրգային խտանյութ.

«Աշխատանքիս զուգահեռ պրպտում էի, թե ինչ կարող եմ ստեղծել, որը եւ ոլորտի հետ կապ կունենար, եւ ինձ եկամուտ կբերեր: Step խտանյութերը դարձան այն առաջին քայլը, որ արեցի արտադրության ոլորտում: Դրանք սկզբում արտադրում էի տանը, փոքր քանակությամբ, այնուհետեւ տեղափոխեցի արտադրամաս եւ ծավալներն ավելի մեծացրեցի: Բացի սրճարաններից եւ բարերից, խտանյութերը շուտով հասանելի կլինեն նաեւ խանութներում: Դրանք կարելի է օգտագործել սառը եւ տաք թեյեր, լիմոնադներ, սմուզիներ պատրաստելու համար»:

Արփի Ջիլավյան
Լուսանկարները՝ Էմին Արիստակեսյանի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին