Արդեն պատմել ենք, որ ռուսաստանցի սոմելյե Իվան Լազարեւը Գինու ազգային կենտրոնի նախաձեռնությամբ անցկացվող Wine Open բաց դասընթացների շարքի հյուրն է եղել: Այսօր ներկայացնում ենք Իվան Լազարեւի մի քանի խորհուրդները հայ սպառողներին:

Գինու մատուցման 6 կարեւոր կետ կա, որոնք մինչ շշի բացելը պետք է ներկայացնել հյուրին. գինու գույնը, շաքարի տիպը, խաղողի սորտը կամ աշխարհագրությունը, գինու արտադրության երկիրը, շրջանը կամ արտադրողի անունը եւ վերջինը՝ լրացուցիչ ինֆորմացիա, որը չկա պիտակի վրա: Հենց այստեղ է, որ երեւում է մատուցողի կիրթ լինելը:

6-րդ կետում կարելի է խոսել գինու վարկանիշի, պարգեւների, գնահատականների, թե ինչ տեսակի տակառում կամ կարասում է այն հնեցվել: Անհրաժեշտության դեպքում կարելի է պատմել գինու ջերմաստիճանային ցուցիչների, դեկանտերների, գավաթների հատուկ ձեւերի, աէրատորների, մատուցման զամբյուղների եւ գնչուական բացիչների մասին:

Երբ սոմելյեն կատարում է իր գլխավոր առաջադրանքը՝ նախօրոք իմանում է հյուրի նախասիրությունները, գինին մատուցելիս խոսում է վերոնշյալ կետերի մասին, ապա բացված գինուց այցելուն կարող է հրաժարվել միայն այն դեպքում, երբ գինին փչացած է:

3

Իվան Լազարեւը | Լուսանկարը՝ Մեդիամաքս

Բայց այստեղ կրկին առաջնային է սոմելյեի ճիշտ աշխատանքը, որ փչացած գինին չհասնի հյուրին. նա գինու որակը պետք է հասկանա խցանից հոտ քաշելով եւ գույնից: Սոմելյեն գինին գնահատում է աչքով, քթով, հետո բերանով, իսկ հաճախորդի մոտ հիմնականում ընթացքը հակառակն է:

Հին աշխարհի գինիներն ու նոր աշխարհի գինեգործությունը

Խաղողագործության եւ գինեգործության ամենամեծ մարտահրավերներից մեկն այսօր գլոբալ տաքացումն է: Եվրոպան երկու հիմնական խնդրի առջեւ է կանգնած՝ ինչպես պահպանել հին աշխարհի գինեգործությունը, ինչի հնարավորությունն ավելի է դժվարացնում կլիման, եւ վերանայել վերաբերմունքը հիբրիդների նկատմամբ:

Սոմելյեների ու գինեգործների մոտ այսպիսի ընկալում կա, որ հիբրիդներից լավ գինի չես կարող ստանալ: Կարծում եմ՝ սխալ մոտեցում է: Հիբրիդները եւս կյանքի իրավունք ունեն եւ կարող են լավ գինի տալ: Եվրոպան արդեն գալիս է այս մտածելակերպին, ինչի մասին են վկայում գինեգործության մեջ խաղողի նոր սորտերի, նոր անունների ու միտումների ի հայտ գալը:

3

Իվան Լազարեւը | Լուսանկարը՝ Մեդիամաքս

Ի տարբերություն Եվրոպայի, Չիլին, Արգենտինան, Ավստրալիան, Ամերիկան, Նոր Զելանդիան փորձարկումներ անողներ են, ուստի գյուղատնտեսական, տեխնիկական, գինեգործական ինովացիաները գալիս են նրանցից: Կրթական ոլորտում փոփոխություն եւս կա: Եթե նախկինում գինեգործները սովորում էին Ֆրանսիայում, հիմա լավագույն գինեգործական կրթություն տվողներ կարող են համարվել Կալիֆորնիայի Ֆեյվիսի համալսարանը, Ավստրալիայի Ադելաիդայի համալսարանը:

Ապագայում նորաձեւ կլինեն օրգանական, թույլ եւ ընդհանրապես առանց ալկոհոլի գինիները: Դրանք լայն պահանջարկ ունեն այն մարդկանց մոտ, որոնք կրոնական, առողջական կամ ինչ-ինչ այլ պատճառներից ելնելով ալկոհոլ չեն խմում:

Թույլ ալկոհոլային գինի ստանալու համար պետք է խաղողի այգիներն ավելի բարձրադիր գոտում լինեն: Կարծում եմ՝ 10 տարի հետո Արարատյան դաշտում աճող խաղողի գինին ավելի թունդ կլինի: Թեթեւ գինիների համար խաղողագործները կբարձրանան բարձրադիր գոտիներ:

Արփի Ջիլավյան