×
Իվան Լազարեւի սոմելյեների դպրոցի հիմնադիր Իվան Լազարեւը Գինու ազգային կենտրոնի նախաձեռնությամբ անցկացվող Wine Open բաց դասընթացների շարքի հյուրն է եղել: HoReCa (hotel/restaurant/cafe) սպասարկման ոլորտի մասնագետների համար մայիսի վերջին սոմելյեն երեք մասից բաղկացած դասընթաց է անցկացրել՝ գինու մատուցման տեխնիկայի, հին աշխարհի գինիների եւ նոր աշխարհի գինեգործության մասին։
GastroVino-ն Իվան Լազարեւի հետ զրուցել է դասընթացի, սպասարկման ոլորտի նրբությունների եւ տեղի լսարանի առանձնահատկությունների մասին:
«Այստեղ մարդիկ բաց են նորությունների համար»
Հայաստան հաճախ եմ գալիս: Եղել եմ ինչպես փոքր, ընտանեկան գինեգործարաններում, այնպես էլ մեծ ընկերություններում, բայց սա առաջին մասնագիտական հանդիպումս էր սպասարկման ոլորտի աշխատակիցների հետ: Տպավորություններս շատ լավն էին, հանդիպեցի մարդկանց, որոնք բաց են նորությունների համար:
Հաճախ եմ հանդիպել սնոբերի, մարդկանց, որոնք ինչ-որ մի տեղ ինչ-որ մի բան կարդում են եւ վերջ, գտնում են, որ իրենց իմացածը լրիվ բավրար է: Այստեղ չհանդիպեցի դրան, Հայաստանում մարդիկ պատրաստ են զարգացնել գիտելիքները, կիսվել, հարցեր տալ:
Ոլորտում աշխատողներս պետք է հիշենք՝ մարդը գալիս է ռեստորան՝ ծառայություն ստանալու: Նա հասկանում է, որ նույն գինին ռեստորանում ավելի թանկ է, քան խանութում, իսկ ռեստորանում կա ծառայություն, որը սկսվում է ճիշտ մատուցումից։ Գինու մատուցումը միայն շիշը բերելը եւ բացելը չէ:
«Հայաստանը ֆավորիտ է խաղողի սորտերով»
Այստեղ գինու արտադրության շատ մեծ ավանդույթ ու մշակույթ կա: Հայաստանը գինեգործական երկրների շարքում ֆավորիտ է այն առումով, որ ունի այնպիսի սորտեր, որոնք կարելի է ճիշտ ներկայացնել ու զարմացնել հյուրերին:
Ֆրունզ Հարությունյանը եւ Իվան Լազարեւը | Լուսանկարը՝ Մեդիամաքս
Հայ գինեգործների եւ մասնագիտական կազմակերպությունների ակտիվության շնորհիվ շատ երկրներում, այդ թվում՝ Ռուսաստանում սկսել են հասկանալ ու գնահատել հայկական գինին, խոսել հայկական սորտերից: Արտասահմանցի սպառողը հետաքրքրություն է ցուցաբերում հայկական գինու հանդեպ՝ չնայած դեռ պահպանվում է հայտնի կարծրատիպը, թե Հայաստանը կոնյակն է, Վրաստանը՝ գինին:
Գինու լայն ընտրություն ապահովող հրաշալի ռեստորաններ կան Երեւանում, բայց դրանց վաճառքի ծառայությունը, հյուրերի հետ աշխատանքը, գինին ճիշտ մատուցելը, ներկայացնելը հյուրերին, գաստրոնոմիական համապատասխանեցումը դեռ սկզբնական փուլում է գտնվում:
Իվան Լազարեւը | Լուսանկարը՝ Մեդիամաքս
Ազգային խոհանոցի ուտեստների եւ գինու համադրության օրինակներից մեկը նշեմ՝ քյուֆթան: Մտածում ես՝ միս է եւ պետք է ընտրել կարմիր գինի, սակայն կարմիր գինին «կսպանի» այս ուտեստը: Նրա համի եւ կարագի հետ համադրելի է սպիտակ տակառային գինին, որը եւս ունի սերուցքային երանգ եւ թույլ թթվաշություն: Իսկ սպիտակ եւ վարդագույն գինու ընտրության համար խորհուրդ կտամ՝ ինչքան երիտասարդ՝ այնքան լավ:
Արփի Ջիլավյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: