×

Արիս Բերբերյանը Լուսանկարը՝ Մեդիամաքս

Dargett-ը շշում է. գարեջրի ծննդյան ամբողջ շրջափուլը

Փոքր գարեջրատուն Dargett-ը 2018 թվականից փորձում է ավելի մոտ լինել գարեջրասերներին՝ միեւնույն ժամանակ հավատարիմ մնալով քրաֆթի գաղափարախոսությանը։

Dargett-ում վստահեցնում են, որ իրենց գարեջրի որեւէ տեսակ պաստերիզացված ու ֆիլտրված չէ. պատրաստում են ավանդական մեթոդով՝ հասնելով կատարելության։

«2016թ․-ին՝ Երեւանում մեր քրաֆթ գարեջրատան բացումից հետո, մեր գարեջրի պահանջարկը մեծացավ, եւ գործընկեր այլ ռեստորաններ առաջարկեցին իրենց մոտ փորձնական մատուցել մեր արտադրանքը։ Մի քանի ռեստորանում հաջողություն ունենալով՝ որոշեցինք մասսայական արտադրություն սկսել, որը ներկայացված կլիներ HoReCa (հյուրանոցներ, ռեստորաններ, սրճարաններ եւ այլն) ցանցում եւ շշալցված կվաճառվեր սուպերմարկետներում»,- GastroVino-ին պատմում է Dargett գարեջրի գործարանի մարքեթինգի ղեկավար Արիս Բերբերյանը։ 

2018թ․ աշնանն արդեն Dargett գարեջրի գործարանի շշալցված գարեջրերը կարելի էր ձեռք բերել մանրածախ վաճառքի կետերում եւ HoReCa ցանցում։ 


Արիս Բերբերյանը Լուսանկարը՝ Մեդիամաքս

«Մեր առաքելությունը կարելի է ամփոփել մի քանի բառով՝ հասցնել քրաֆթ գարեջրի մշակույթը հայ սպառողին՝ առաջարկելով հնարավորինս բարձր որակի գարեջրի մեծ տեսականի»,- ասում է Արիս Բերբերյանը:

Dargett-ում շշալցնում են 7 տեսակի գարեջուր։ Շատ մուգ եւ թանձր մարմնով ու հատուկ փափկությամբ «Stout», բաց գույնի, թարմացնող եւ արտահայտված արեւադարձային բույրով «Pale Ale», բավարական տիպի ցորենի գարեջուր «Weizen», ծաղկային նուրբ բույրով ու արտահայտիչ դառնությամբ «Pilsner», ծիրանի եւ ցորենի հաճելի համադրությամբ «Apricot Ale», բելգիացի վանականների հինավուրց բաղադրատոմսով պատրաստված «Belgian Tripel» եւ թարմ բոված հացի բույրով ու սաթե գույնով «Vienna Lager»։ 

GastroVino-ն շրջել է Dargett-ի գործարանում եւ հետեւել գարեջրի պատրաստմանը՝ ածիկի ընտրությունից մինչեւ շշալցում։ 


Լուսանկարը՝ Մեդիամաքս

Նախ` ընտրում են ածիկը

Գարեջրի հիմնական բաղադրիչներից մեկն ածիկն է, որը բազմաթիվ տարատեսակներ ունի՝ մուգ բովվածից մինչեւ շատ բաց։ Սկզբնական շրջանում գարու ածիկը բաց գույնի է, որը, ըստ բովվածության տարբեր աստիճանների, գարեջրին յուրահատուկ համ եւ հոտ է հաղորդում։ Գարեջրի գույնն էլ պայմանավորված է ածիկի բովվածությունից եւ համադրությունից։


Լուսանկարը՝ Մեդիամաքս

«Մենք օգտագործում ենք քրաֆթ գարեջրագործության լավագույն բելգիական եւ գերմանական արտադրողների՝ 25-ից ավելի գարու ածիկի տարատեսակներ»,- ասում է Արիս Բերբերյանը։


Լուսանկարը՝ Մեդիամաքս

Ապա` աղում են, շաղախում ու զատում

Գարու կամ ցորենի ածիկն ընտրելուց հետո աղում են այն, քանի որ աղացած վիճակում ջուրը շատ ավելի մեծ քանակությամբ է վերցնում ածիկի շաքարային զանգվածը։ 

Ածիկն աղալուց հետո զանգվածը տեղափոխվում է շաղախման կաթսա, որտեղ փորձում են մաքսիմալ քաղել շաքարային մասը։ Այս ընթացքում ջուրը խառնվում է մանրացված ածիկին եւ շաղախման արդյունքում շաքարային միացություններն ածիկից անցնում-լուծվում են ջրին։ 


Լուսանկարը՝ Մեդիամաքս

Ըստ գարեջրի բաղադրատոմսի՝ ջերմաստիճանային կարգավորումներ են արվում։

Հաջորդ կաթսայում ածիկն ու հեղուկը զատվում են միմյանցից. ծանր միացությունները նստում են կաթսայի հատակին, իսկ հեղուկ զանգվածը, որը կոչվում է «քաղցու», առանձնանում է եւ մնում վերին հատվածում։ 


Լուսանկարը՝ Մեդիամաքս

Քաղցուն եռման կաթսա է հասնում   

Ածիկից զատելուց հետո քաղցուն տեղափոխում են եռման կաթսա։ Այստեղ եռման ժամանակ իր կարեւոր գործն անում է «գայլուկը» (хмель): 

Գայլուկը բույս է, որի տարբեր տեսակներ գոյություն ունեն։ Դրա կարեւորագույն գործառույթներից մեկը գարեջրին դառնություն հաղորդելն է։ 


Լուսանկարը՝ Մեդիամաքս

«Գայլուկը, բացի դառնությունից, կարող է հետաքրքիր բույր տալ գարեջրին։ Տեսակներ ունենք, որ ցիտրուսային, անտառային կամ ծաղկային բույր ունեն։ Այդ բույրը հենց գայլուկի հատկությունից է գալիս, մենք գարեջրին որեւէ հավելումներ չենք անում։ Բացառություն է միայն Apricot Ale-ն»,- ասում է Արիս Բերբերյանը։ 

Գայլուկի փուլից հետո ստացված զանգվածին «մրրիկ» է սպասվում։ Կաթսայի աշխատանքը, որի մեջ տեղափոխվում է զանգվածը, պտտահողմ է հիշեցնում, ինչի արդյունքում ածիկից մնացած հատիկները հավաքվում են կաթսայի մեջտեղում։ 


Լուսանկարը՝ Մեդիամաքս

Վերջին՝ որոշիչ, «ակորդն» է տրվում

Վերջին կանգառում գարեջրի հումքին է միանում խմորասունկը։ Մինչ այդ զանգվածն արագ սառեցվում է եւ ուղարկվում խմորման կաթսաներ։ 

Խմորասունկն «ուտում է» շաքարը եւ այդ ընթացքում արտազատում ալկոհոլ։ Խմորման եւ հասունացման գործընթացը, կախված գարեջրի տեսակից, տարբեր տեւողություն է ունենում։ 

«Հասունացման ընթացում գարեջրի հիմնական հոտերն ու համերն ամբողջանում են։ Գարեջրերը երկու մեծ խմբի են բաժանվում՝ «էլ» եւ «լագեր», որոնք տարբերվում են խմորման ջերմաստիճանով։ «Էլ»-երը քրաֆթ գարեջրագործության հիմնաքարային առանցքն են, համային ու հոտային հետաքրքիր առանձնահատկություններ ունեն եւ ստեղծագործելու հնարավորություն են տալիս։ Մենք երկու տեսակի գարեջրերից էլ արտադրում ենք»,- ասում է Արիս Բերբերյանը։


Լուսանկարը՝ Մեդիամաքս

Dargett-ը շշում է

Հասունացած գարեջրին սպասում են մուգ գույնի շշերն ու կեգերը։ Գարեջուրը խողովակներով հասնում է շշալցման սրահ, մի մասը լցվում է կեգերի մեջ՝ լցնովի գարեջրի համար, մի մասն էլ՝ շշերի։


Լուսանկարը՝ Մեդիամաքս

«Շշալցված տարբերակի գարեջրին որեւէ հավելում չի արվում։ Մեր գարեջրի շիշը մուգ գույնի է, ինչը թույլ է տալիս պաշտպանել արեւի եւ լույսի ճառագայթների թափանցումից եւ երկար կյանք ապահովել գարեջրին»,- ասում է Արիս Բերբերյանը։  


Լուսանկարը՝ Մեդիամաքս

Այս սրահում նախ պիտակներն են փակցվում, ապա շիշն է ներսից կրկնակի մաքրվում։ 


Լուսանկարը՝ Մեդիամաքս

Շիշը հասնում է գարեջրի լցման թմբուկին, վերջում՝ վայրկենապես անցնում է բարակ շիթով հոսող ջրի տակով, փրփրում (այդ ընթացքում թթվածինը դուրս է գալիս եւ հասցվում նվազագույնի, ինչի արդյունքում մաքսիմալ ձգվում է շշալցված գարեջրի կյանքը), հետո անմիջապես խփվում է խցանը։


Լուսանկարը՝ Մեդիամաքս

Այստեղ գարեջրի ստեղծման շրջափուլն ավարտվում է ու այն արդեն պատրաստ է «փրփրել» գարեջրասերների բաժակներում։ 


Լուսանկարը՝ Մեդիամաքս

Մարի Թարյան

Լուսանկարները՝ Էմին Արիստակեսյանի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին