HoReCa ոլորտում հաջողության կարեւորագույն գործոններից մեկը հաճախորդների վերադարձելիության բարձր ցուցանիշն է: Ըստ համաշխարհային տվյալների՝ այն կարող է մոտ 40 տոկոսով ավելացնել ռեստորանի, սրճարանի կամ հյուրանոցի եկամուտը: Սեփական հաճախորդներին առավել լավ ճանաչելու, նրանց հետ կապի մեջ լինելու համար հայկական Wimedia ընկերությունն առաջարկում է WiFi մարքեթինգի գործիք, որի հիմնական, բայց ոչ միակ շահառուն HoReCa ոլորտն է:

Ընկերության տնօրեն Հարություն Նահապետյանը GastroVino-ին պատմել է դրա հիմնական գործառույթների եւ մրցակցային առավելությունների մասին:

Տվյալների ավտոմատացված հավաքագրումն ու անհատական մոտեցումը հաճախորդին

HoReCa ոլորտում կարեւոր է ոչ միայն նոր հաճախորդների ներգրավումն, այլեւ՝ սրճարան կամ ռեստորան արդեն իսկ այցելած մարդուն «վերադարձնելը»: Ըստ միջազգային ցուցանիշների՝ սա կարող է մոտ 40 տոկոսով ավելացնել բիզնեսի եկամտաբերությունը, հատկապես, որ տվյալ ռեստորանում գոնե մեկ անգամ եղած հաճախորդին վերադարձնելը ֆինանսապես մոտ 60 տոկոսով ավելի էժան է, քան նոր հաճախորդի ներգրավումը:

4

Հարություն Նահապետյանը | Լուսանկարը՝ Մեդիամաքս

Միեւնույն ժամանակ, ռեստորանային ոլորտն այս ուղղությամբ աշխատելու համար կամ առհասարակ չունի գործիքակազմ, կամ կիրառում է ոչ այդքան արդյունավետ մեթոդներ: Այս նպատակով մենք ստեղծել ենք գործիք, որի միջոցով ռեստորանը կարողանում է ավտոմատացնել հաճախորդների տվյալների հավաքագրումը, բնականաբար, նրանց ցանկությամբ եւ թույլտվությամբ: Հետագայում այդ տվյալները կարող են օգտագործվել ռեստորան-հաճախորդ կապի ամրապնդման, այցելուին անհատական մոտեցում ցուցաբերելու նպատակով:  

Wimedia-ի WiFi մարքեթինգային գործիքն աշխատում է հետեւյալ կերպ: Երբ հաճախորդը գալիս է ռեստորան եւ ցանկանում է միանալ WiFi-ին, բացվում է Sign-up պատուհան, որում պետք է լրացնել որոշակի անհատական տվյալներ՝ ըստ ցանկության. անուն-ազգանուն, հեռախոսահամար կամ էլեկտրոնային հասցե: Այս տեղեկատվության հիման վրա մեր համակարգում ստեղծվում է պատուհան, որին հասանելիություն ունի ռեստորանը: Այսպիսով` հնարավոր է դառնում ստացված տեղեկատվությունը ներմուծել CRM (customer relationship management) համակարգ եւ այն կիրառել մարքեթինգային նպատակներով: Շատ կարեւոր է, որ այս տվյալները չդառնան հաճախորդին անընդհատ «սփամային» նամակներ ուղարկելու միջոց, այլ կիրառվեն նպատակային: Օրինակ՝ ամեն հաճախորդին անհատական մոտեցում ցուցաբերելու համար: Հաճելի է, երբ զանգահարում ես որեւէ ռեստորան, որտեղ արդեն եղել ես ու քեզ դիմում են անունով կամ ամրագրման համար առաջարկում քո սիրելի սեղանը:

Այսօր արդյունավետ չէ հաճախորդների մասին տվյալներ ստանալ, օրինակ, ամրագրումների գրքույկից: Սա ժամանակատար է ու ոչ ճշգրիտ: Տվյալների հավաքագրման մեր համակարգը ոչ միայն հնարավորություն է տալիս այս ամենն իրականացնել ավտոմատացված կերպով, այլեւ թույլ է տալիս ստանալ մոտավոր պատկեր, թե միեւնույն հաճախորդը որքան հաճախ է վերադառնում ձեր ռեստորան: Երբ նա արդեն երկրորդ անգամ է միանում WiFi-ին, այլեւս չի տեսնում Sign-up-ի պատուհան: Փոխարենը նրան «ցուցադրվում է» տեղեկատվություն սպասվող միջոցառումների կամ, օրինակ, հատուկ առաջարկների մասին:

Միեւնույն ժամանակ, Wimedia-ն ոլորտին առաջարկում է ոչ միայն գործիքը, այլեւ՝ պատրաստ է մասնակցել դրա ընթացիկ կիրառմանը: Բոլոր ռեստորանները չէ, որ ունեն մարքեթինգի ուղղությամբ աշխատող առանձին թիմ, եւ մենք առաջարկում ենք համագործակցություն «փակ շրջանով»: Երբ այս գործիքի միջոցով հաճախորդների տվյալները ստանալուց հետո ռեստորանի հետ գծում ենք համապատասխան ռազմավարություն, որոշում՝ ինչ տեղեկատվություն ենք ցանկանում ուղարկել այցելուին եւ ինչ հաճախությամբ: Այսպիսով, մեր համակարգը սկսում է ինքնուրույն ուղարկել էլեկտրոնային նամակներ ու ամենակարեւորն անում է այնպես, որ դրանք չունենան սփամի տեսք ու չհայտնվեն էլփոստի «սփամ» բաժնում:

200-ից ավելի գործընկեր ու մրցունակություն միջազգային շուկայում

Հայաստանում մեր մարքեթինգային գործիքից օգտվում են HoReCa ոլորտի գրեթե բոլոր մեծ ցանցերը. 200-ից ավելի գործընկեր ունենք: Այս համակարգը բավականին պահանջված է նաեւ բանկերի կողմից:

Պայմանավորվածությունների փուլում է համագործակցությունը մի շարք միջազգային ընկերությունների հետ: Արտերկրի շուկայում բազմաթիվ դերակատարներ կան ու փորձում ենք մեր համակարգը դարձնել առավել արդյունավետ եւ մրցանակ՝ հիմնվելով մրցակիցների բացթողումների վրա:  

Այս առումով, առաջարկում ենք լայն գործիքակազմ, որը կարելի է օգտագործել տարբեր նպատակներով: Շատ ընկերություններ ռեստորանին առաջարկում են, օրինակ, միայն Sign-up-ի միջոցով տվյալների հավաքագրումը: Մեր դեպքում ռեստորանն այդ առաջնային էջի հիման վրա կարող է ստեղծել նաեւ հարցման ձեւաչափեր: Հաճախորդը, որը ձեզ մոտ է գալիս երկրորդ, երրորդ անգամ, արդեն կարող է որոշակի կարծիք կազմել սպասարկման, միջավայրի, ուտեստների մասին: Նրա կարծիքը հարցնելով եւ հաշվի առնելով՝ կարելի է բազմաթիվ բացեր լրացնել:

4

Հարություն Նահապետյանը | Լուսանկարը՝ Մեդիամաքս

Բացի այդ, հաճախորդի վերաբերմունքը ռեստորանի հանդեպ եւս փոխվում է, որովհետեւ նրան տրվում է կարծիքն արտահայտելու հնարավորություն:

Արդյունավետ աշխատանք՝ առանց ավելորդ ծանրաբեռնվածության

Հետաքրքիր է, բայց իմ դիտարկումներով ռեստորանային ոլորտը բավականին կոնսերվատիվ է: Նորարարությունն այստեղ դժվար է տրվում:
Սա գիտակցելով՝ փորձել ենք մեր WiFi մարքեթինգային գործիքը դարձնել առավելագույնս պարզ, որն ավելորդ ծանրաբեռնվածություն չի ստեղծի աշխատակիցների համար:

Մեր գործընկերների համար ինքնուրույն պատրաստում ենք թե՛ բոլոր էջերի դիզայնը, թե՛ սովորեցնում ենք՝ ինչպես է աշխատում ողջ համակարգը: Այլ կերպ ասած՝ ռեստորանին համակարգի հետ միայնակ չենք թողնում: Օրվա ցանկացած պահին մեր մենեջերը կապի մեջ է ու պատրաստակամ օգնելու ցանկացած հարցում:

4

Լուսանկարը՝ Wimedia

Առհասարակ գործընկերների հետ աշխատում ենք երկու մոտեցմամբ: Առաջինի դեպքում ռեստորանը ցանկանում է, որպեսզի տեղի WiFi-ից օգտվելու համար գրանցումն, այսինքն՝ Sign-up-ի պատուհանը լինի պարտադիր: Այս դեպքում,  բնականաբար, տվյալների հավաքագրման ցուցանիշը 100 տոկոս է. WiFi-ին միացող յուրաքանչյուր անձ թողնում է տվյալներ:
Երկրորդ դեպքում ռեստորանը բաց է թողնում գրանցման պատուհանն ու թույլ տալիս հաճախորդին միանալ համացանցին առանց պարտադիր գրանցման: Այս դեպքում հաճախորդը տվյալներ է թողնում միայն, եթե ցանկանում է: Արդյունքում WiFi-ին միացողների 30 տոկոսը տրամադրում է տվյալներ, ինչը եւս շատ լավ ցուցանիշ է: Այն կարող է լինել շատ ավելի բարձր, եթե ռեստորանն ինչ-որ կերպ մոտիվացնի հաճախորդին: Պարտադիր չէ առաջարկել որեւէ զեղչ: Հնարավոր է ուղղակի նշել, որ գրանցվելով՝ նա առաջինը կտեղեկանա հատուկ առաջարկների կամ սպասվող միջոցառումների մասին:

Ռեստորանին գրավում են հենց այս ցուցանիշները: Երբ գործընկերը տեսնում է, որ գործիքի կիրառման առաջին օրից այցելուները թողնում են իրենց տվյալները, հասկանում է՝ որքան արդյունավետ է այս մոտեցումը:

Յանա Շախրամանյան

Լուսանկարները՝ Ագապե Գրիգորյանի