Մեծ Բրիտանիայում կառավարության կողմից իրականացվող կենդանիների բարեկեցության բարելավման ռազմավարության շրջանակներում կարգելվի կենդանի ծովախեցգետիններ եփել:

Ըստ կառավարության անդամների, խեցգետնակերպերի «կենդանի եռացումը ընդունելի սպանության մեթոդ չէ», փոխարենը կհրապարակվեն այլընտրանքային ուղեցույցներ, գրում է The Guardian-ը:

Կենդանի ծովախեցգետինների եփումն արդեն անօրինական է ճանաչվել Շվեյցարիայում, Նորվեգիայում եւ Նոր Զելանդիայում: Կենդանիների պաշտպանության կազմակերպությունները նշում են, որ ծովախեցգետիններին էլեկտրական ատրճանակով շշմեցնելը կամ եռացնելուց առաջ սառեցնելն ավելի մարդասիրական է:

Արգելքի հիմք կհանդիսանա 2022 թվականին Պահպանողականների կողմից ներկայացված օրենքը: Դրանում նշվում է, որ անողնաշարավորները, այդ թվում՝ ութոտնուկները, խեցգետինները եւ ծովախեցգետինները, զգայուն են եւ ցավ են զգում մյուս կենդանիների նման։