Ֆրանսիական հանրահայտ Petrus գինու շիշը, որն ավելի քան մեկ տարի գտնվում էր Միջազգային տիեզերական կայանում (ՄՏԿ), կհանվի աճուրդի: Ինչպես հայտնում է BBC-ն, Christie's աճուրդի տան ներկայացուցիչները ակնկալում են, որ վաճառքի գինը կկազմի մոտ 1 միլիոն դոլար:

2000 թվականի բերքի «սովորական» (տիեզերք չայցելած) Petrus-ի շշի գինը մոտ 6 հազար դոլար է:

2019 թվականի նոյեմբերին 2000 թվականի բերքի 12 շիշ Petrus-ը ուղարկվել էր ՄՏԿ, որտեղ մնացել էր ավելի քան 400 օր:

Նախագիծը ֆինանսավորվել էր Space Cargo Unlimited ընկերության կողմից, որն ուսումնասիրում է անկշռության ազդեցությունը սննդի վրա:

«Տիեզերական շշերից» երեքն ավելի վաղ բացվել էին համտեսման համար, իսկ մնացած ութը որոշվել է պահել հետագա ուսումնասիրության նպատակով:

Christie's-ի ներկայացուցիչ Թիմ Թրիփթրին պատմել է, որ տիեզերք այցելած գինու հետ միասին կվաճառվի 2000 խաղողի բերքի Petrus-ի սովորական շիշ, «որպեսզի երջանիկ գնորդը համեմատելու հնարավորություն ունենա»:

Մարտին Բորդոյի համալսարանի գինու եւ խաղողագործության ինստիտուտի մասնագետներն արդեն անցկացրել էին նման համեմատություն: Համտեսողներից մեկը լրագրող Ջեյն Էնսոնն էր՝ «Բորդոյում» (Inside Bordeaux) գրքի հեղինակը: BBC-ին տված հարցազրույցում նա այսպես էր նկարագրել «տիեզերական գինու» համը.

«Ես դժվարանում եմ ասել` այն տարբերվում էր դեպի լավը, թե՝ դեպի վատը: Սակայն համն հաստատ ուրիշ էր: Բուրմունքի մեջ ավելի շատ էին ծաղկային եւ ապխտած երանգները»:

Էնսոնը վստահ չէ, թե կոնկրետ ինչն էր փոխել գինու համը. անկշռության մեջ գտնվելը, թե երկիր վերադառնալը: «Սակայն տարբերությունն ակնհայտ էր», - ասում է նա:

Space Cargo Unlimited կազմակերպության ղեկավար Նիկոլաս Գոմը տեղեկացրել է, որ գինու վաճառքից ստացված հասույթը կուղղվի տիեզերքում նոր փորձերի ֆինանսավորմանը:

Petrus ֆրանսիական գինոգործության տնտեսությունը տարեկան արտադրում է մոտ 30 հազար շիշ: Այս գինին աշխարհի ամենաթանկ եւ հեղինակավոր գինիներից է: