«Կարաս» գինիների ընտանիքը վերջերս համալրվել է A Tale Of 2 Mountains գինով, որը տարբերվում է ե՛ւ բույրով, ե՛ւ դիզայնով, ե՛ւ գնով: 

«Արմավիրի մարզում գտնվող մեր խաղողի այգիները ձգվում են Արարատ լեռան լանջի ստորոտում, եւ Արարատը հատուկ ինքնություն եւ բնավորություն է փոխանցում մեր այգիներին: Մտածեցինք գինու միջոցով նոր սերնդին փոխանցենք Արարատ լեռան «տեսած եւ լսած» պատմությունները: 

3

Լուսանկարը՝ Karas Wines

Համարում ենք, որ այս գինին ներկայացնում է մարդկանց պատմությունները, մշակույթը, ապրելակերպը: Վերջին տարիներին Հայաստանում շատացել են գինու երիտասարդ սիրահարները: Հենց նրանք են սիրում նոր սորտեր փորձել, ուստի որոշեցինք հատուկ նրանց համար գինու նոր տեսակ առանձնացնել»,- GastroVino-ին պատմել է Karas Wines-ի մարքեթինգի եւ հաղորդակցման մենեջեր Բեատրիս Արզլանյանը: 

A Tale Of 2 Mountains գինին ունի երկու տարբերակ՝ կարմիր եւ սպիտակ: Յուրաքանչյուրը խաղողի երկու տեսակի խառնուրդ է, հայկական տեսակը գերակշռում է: Կարմիրը Արենի (60 %) եւ Malbec (40 %) սորտերից է պատրաստված, սպիտակը՝ Կանգուն (60 %) եւ Chenin Blanc (40 %): 

3

Լուսանկարը՝ Karas Wines

Նոր գինին «Կարասի» ամենամատչելի գինիների շարքում է, քանի որ թիրախը երիտասարդությունն է: «Ոչ բոլորը մշտապես կարող են, օրինակ, «Կարաս Ռեզերվ 2013» խմել, իսկ A Tale Of 2 Mountains-ը ամենօրյա գինի է»,- ասում է Բեատրիսը: 

Մինչ Հայաստանում վաճառքը սկսելը գինին ուղարկվել է նաեւ Ռուսաստան, ԱՄՆ: Karas Wines-ի մարքեթինգի եւ հաղորդակցման մենեջերի խոսքով՝ արտասահմանում շատ պահանջված են հայկական տեղական սորտերի խառնուրդների գինիները, իսկ A Tale Of 2 Mountains -ը կարելի է նաեւ էկզոտիկ խառնուրդ համարել: 

Ամալի Խաչատրյան

Լուսանկարները՝ Karas Wines-ի