×

Լուսանկարը՝ Մեդիամաքս Ստեփան Աբրահամյանը՝ «Խոհարարի պոչը» կոկտեյլը պատրաստելիս

Ստեփան Աբրահամյանի «Խոհարարի պոչն» ու «Քիմ Քարդաշյանը»

Երեւանի կոնյակի գործարանում վերջերս կայացած Ararat Craf t and Twist կոկտեյլների մրցույթում հաղթող էր ճանաչվել Ստեփան Աբրահամյանը՝ իր  Le Cook Tail կոկտեյլով: Մրցույթի գլխավոր մրցանակը մասնակցությունն է հոկտեմբերին Բեռլինում կայանալիք բարային մշակույթին վերաբերող Bar Convent Berlin ամենամյա հսկա էքսպոյին: 

GastroVino-ն այցելեց Ստեփան Աբրահամյանին Montmartre կոկտեյլ-բարում, որտեղ հետաքրքիր զրույցին զուգահեռ հնարավորություն ունեցավ  հետեւել կոկտեյլների պատրաստման գեղեցիկ գործընթացին: 

Բարմեն դառնալու դասական ուղին

Արդեն հինգ տարի է, ինչ բարմեն եմ եւ դա իմ հիմնական աշխատանքն է: Բարմեն դառնալու պատմությունս դասական է. ուսանող էի եւ լրացուցիչ գումար վաստակելու համար որոշեցի ինչ-որ տեղ գործի ընդունվել: Այդպես սկսեցի Սպորտ Բարում աշխատել: Ժամանակի ընթացքում հասկացա, որ բարմենի մասնագիտությանը վերաբերող կարդացածս գրականությունը գերակշռում է   տնտեսագիտության դասագրքերի քանակը եւ պարզապես սիրահարվել եմ այդ գործին:


Լուսանկարը՝ Մեդիամաքս Ստեփան Աբրահամյանը

Համալսարանը ավարտելուց  հետո, ընդունվեցի Բար Ակադեմիա, դարձա տարվա լավագույն ուսանող, այնուհետեւ՝ Բարմենների Հայկական ասոցիացիայի անդամ, Միջազգային ասոցիացիայի անդամ: Հետո եղան մի շարք հաղթանակներ, որոնցից ամենակարեւորը Ararat Craft and Twist-ն էր:

Այն երկու փուլից էր բաղկացած: Առաջին փուլում ավելի քան 30  մասնակից կար: Թեստային քննությունից հետո 15-ը անցան երկրորդ փուլ, որի ժամանակ ներկայացրեցի Le Cooktail-ը եւ հաղթեցի:


Լուսանկարը՝ Մեդիամաքս «Խոհարարի պոչը» կոկտեյլը

«Խոհարարի պոչը»՝ բարձր խոհանոցի չափանիշներին համապատասխան

Le Cook Tail-ի (բառացի՝ «խոհարարի պոչը») ընդհանուր կոնցեպտն ունեի, իսկ մանր բաղադրիչները եւ ձեւավորման տարրերը գտնվեցին փորձարկումների արդյունքում: 


Լուսանկարը՝ Մեդիամաքս Ստեփան Աբրահամյանը՝ «Խոհարարի պոչը» կոկտեյլը պատրաստելիս

Կոկտեյլի հիմնական բաղադրիչը, հիմքը, մակադամիա ընկույզով թրմած երկու տեսակի Արարատն էր՝ «Անի» եւ «Երեւան»:

«Անի»-ի թնդությունը 40 աստիճան է, որոնց մի մասն «անհետանում» թրմելու ընթացքում, իսկ բալանսը վերականգնվում է 57 աստիճան թնդություն ունեցող «Երեւան»-ի շնորհիվ:


Լուսանկարը՝ Մեդիամաքս Ստեփան Աբրահամյանը՝ «Խոհարարի պոչը» կոկտեյլը պատրաստելիս

Այլ բաղադրիչներն են կոկոսի կաթը, որը կոկոսի քերուկից ինքս էի պատրաստել, միկրոարեւածաղկի խոտի հյութ, վանիլային օշարակ:

Կոկտեյլը մատուցվում է կոկոսի մեջ, ձողիկի փոխարեն՝  համեմված սպագետի է: Կոկտեյլը anytime դասակարգում է, այն կարելի է ցանկացած ժամանակ ըմպել:

Քանի որ խոհարարություն շատ եմ սիրում (զուգահեռ սովորում եմ), ցանկանում էի Ararat-ը ներկայացնել շեֆ-խոհարարի աչքերով, կոկտեյլի բոլոր բաղադրիչները, մատուցումը նույնպես «խոհարարական են»: 


Լուսանկարը՝ Մեդիամաքս Ստեփան Աբրահամյանը՝ «Խոհարարի պոչը» կոկտեյլը պատրաստելիս

Օգտվել եմ նաեւ մերօրյա լավ բարերում եւ խոհանոցներում կիրառվող «zero waist» միտումից, երբ որեւէ բաղադրիչը կարելի է մի քանի անգամ օգտագործել: Իմ կոկտեյլի  դեպքում դա կոկոսն էր. քերուկից կաթը պատրաստեցի, իսկ կեղեւը հանդես եկավ բաժակի դերում: 

Craft and Twist մրցույթում բաղադրիչների քանակը անսահմանափակ էր: Ես օգտագործել եմ 5 բաղադրիչ: Առհասարակ, համամիտ եմ այն մտքի հետ, որ թե՛ խոհանոցում, թե՛ բարային մշակույթում բաղադրիչների քանակը պետք է շատ չլինի:

Բոլոր նորարարական գաղափարները գալիս են խոհանոցից եւ այսօր կոկտեյլի  պատրաստման մեջ նկատելի են  խոհարարական տարրեր, հատկապես զգացվում է  բարձր խոհանոցի ազդեցությունը:  

Հեղինակային կոկտեյլներ ստեղծելու նուրբ արվեստը

Հեղինակային կոկտեյլներ բարմենը սկսում է պատրաստել մասնագիտական ուղու կայացման սկզբից եւ այդ գործընթացն անվերջ է: Բաղադրիչների համադրումից բացի չափազանց կարեւոր է նաեւ ջրի/սառույցի դերը: Այսօր ունենք հեղինակային կոկտեյլներից բաղկացած երեք մենյու, շուտով կլինի նաեւ չորրորդը, որի կոկտեյլները լինելու են միայն տեղական բաղադրիչներից: 

Իհարկե, այստեղ շատ մեծ դեր կունենա նաեւ Ararat-ը: Պետք է ասեմ, որ հայ բարմենի համար Ararat-ից կարեւոր խմիչք պարզապես չի կարող լինել: 


Լուսանկարը՝ Մեդիամաքս Ստեփան Աբրահամյանը

Կան կոկտեյլներ, որոնք մատուցվում են հենց ուտեստի կամ աղանդի հետ:

Կա այդպիսի հասկացություն՝ food pairing/cocktail pairing, երբ ուտեստը եւ կոկտեյլը համահունչ ընտրված են: Որոշ կոկտեյլներ կարող են հիանալի այլընտրանք լինել գինուն, նաեւ պատրաստված լինեն գինու հիմքով: Նման կոկտեյլներ ընտրելիս ցանկալի է խորհրդակցել բարմենի հետ: 

«Քիմ Քարդաշյանը», ընկույզի մուրաբան եւ աշխարհի ամենաառաջին կոկտեյլի twist-ը

«Քիմ Քարդաշյան»-ը իմ հեղինակային կոկտեյլներից է: Տեսակով այն ապերետիվ կոկտեյլ է, չնայած նրան, որ օգտագործվում է բրենդի, որը համարվում է after dinner խմիչք: 


Լուսանկարը՝ Մեդիամաքս «Քիմ Քարդաշյան» կոկտեյլը պատրաստելիս

Այստեղ օգտագործել եմ նաեւ տոնիկ, պոպոքի մուրաբայի հյութ, պոպոքի բիտեր: Վերեւից  դրվում է մուրաբայի ընկույզի երկու մասի բաժանված հատիկը, որի շնորհիվ տեսանելի է դառնում ասոցիատիվ կապը Քիմ Քարդաշյանի հետ:


Լուսանկարը՝ Մեդիամաքս «Քիմ Քարդաշյան» կոկտեյլը

Old fashioned Syunik-ը Ararat-ի կոկտեյլային գրքից է: Սա աշխարհի ամենաառաջին կոկտեյլներից մեկի, հայտնի Old Fashioned կոկտեյլի «թվիսթ»-ն է: 


Լուսանկարը՝ Մեդիամաքս Ստեփան Աբրահամյանը՝ Old fashioned Syunik կոկտեյլը պատրաստելիս

Բարային մշակույթում twist-ը հատուկ տերմին է, որը նշանակում է որեւէ դասական բաղադրատոմսի մեջ բաղադրիչի փոխարինում մեկ ուրիշ նմանով, կատարելագործում: Այստեղ մենք դասական ամերիկյան վիսկին փոխարինել ենք հայկական կոնյակով` նախապես թրմված սալորաչրով: Ավելացվում է նաեւ նարնջի բիտերով բացված շաքարավազ, նարինջ, ընկույզի մուրաբա: 


Լուսանկարը՝ Մեդիամաքս Old fashioned Syunik կոկտեյլը

Այսօր Old Fashioned Syunik-ը Ararat-ի ամենահայտնի կոկտեյլներից է, անվանվել է Սյունիքի մարզի պատվին, որը հայտնի է իր ընկույզով: 

Աննա Բուբուշյան
Լուսանկարները՝ Էմին Արիստակեսյանի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին