×

Լուսանկարը՝ Մեդիամաքս

Թումանյանական գինիներ «Takar»-ից՝ հուշերով ու քառյակներով

Թումանյանի 150-ամյակին նվիրված միջոցառումների շրջանակներում «Արմենիա Վայն» ընկերությունը եւ Հ. Թումանյանի թանգարանը թողարկել են «Տակառ» գինիների հատուկ շարք: Գինիները փաթեթավորված են հոբելյանական դիմապիտակով, թումանյանական քառյակով ու գրողի մասին հուշերի գրքույկով: 

Թումանյանական գինիների շարքի նպատակն է Հովհաննես Թումանյանին ներկայացնել նաեւ որպես մի մարդու, ում տանից անպակաս է եղել խնջույքը եւ գինին: «Թումանյանը սիրում էր գինին եւ տոնը. նա ոչ միայն «Ամենայն հայոց բանաստեղծն» էր, այլեւ առաջին «Ամենայն հայոց թամադան»,- ասում են Հ. Թումանյանի թանգարանի աշխատակիցները: 


Լուսանկարը՝ Մեդիամաքս

Նախաձեռնության հեղինակները հույս ունեն, որ հուշանվեր գինիներն այսօրվա մարդկանց կփոխանցեն Թումանյանի՝ գինի խմելու յուրահատուկ մշակույթը եւ մեծ սերը գինեգործության նկատմամբ: 

«Թումանյանին «Ամենայն հայոց թամադա» են անվանել իր ընկերները՝ շնորհիվ իր անզուգական կենացների ու ճառերի, որոնցով արբեցնում էր սեղանակիցներին իր խնջույքների ժամանակ: Քեֆը Թումանյանի համար պարզ կերուխում չէր, այլ հոգեւոր ու մտավոր վայելքի մթնոլորտ ձեւավորելու միջոց: 


Լուսանկարը՝ Մեդիամաքս

«Տակառ» գինիների հատուկ շարքով ուզում ենք հանրության լայն շերտերին ներկայացնել թումանյանական աշխարհը մեկ այլ տեսանկյունից»,- ասում է նախաձեռնության գաղափարի հեղինակ եւ թանգարանի էքսկուրսավար Մարիա Ադամյանը: 

Ուղեկցող գրքույկի մեջ տեղ են գտել Թումանյանի ժամանակակիցներից հետաքրքիր հուշեր՝ Թումանյանի գինի խմելու եւ քեֆ-ուրախություն կազմակերպելու վարպետության մասին: 


Լուսանկարը՝ Մեդիամաքս Անի Եղիազարյանը եւ «Արմենիա Վայն»-ի մարքեթինգի եւ հաղորդակցության տնօրեն Քրիստինե Վարդանյանը

«Ցանկանում ենք, որ մեծ վայելքների, ընկերական հավաքույթների ժամանակ գինին ընկալվի ոչ որպես պարզապես խմիչք, այլ՝ որպես փոքրիկ համեմունք, եւ մատուցվի այնպես, ինչպես Թումանյանն էր օգտագործում», -ասում է Հովհաննես Թումանյանի թանգարանի տնօրենի ժամանակավոր պաշտոնակատար Անի Եղիազարյանը:


Լուսանկարը՝ Մեդիամաքս

Հուշանվեր գինիները հնարավոր է ձեռք բերել թանգարանի հուշանվերների բաժնում: Շուտով դրանք սահմանափակ քանակությամբ հասանելի կլինեն նաեւ առեւտրային եւ ժամանցային կենտրոններում:

Ամալի Խաչատրյան 
Լուսանկարները՝ Էմին Արիստակեսյանի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին