×
Սիսեռից եւ ոսպից քյուֆթաներ, հոմուսով խոզի փափկամիս, ծովամթերքի պաելյա, պիստակով, ընկույզով եւ թխկենու օշարակով փախլավայի ռոլեր. «Մայրիկ» ռեստորանում կանադական ընդեղենը, ծովամթերքն ու մսամթերքը ներկայացվել է հայկական համերով եւ բաղադրատոմսերով:
Կանադայում արտադրվող սնունդը ռեստորանային բիզնեսի ներկայացուցիչներին, ներմուծողներին եւ հայ սպառողներին ներկայացնելու նպատակով «Մայրիկ» ռեստորանում Ռուսաստանում Կանադային դեսպանատունը՝ կանադական առեւտրային ընկերությունների հետ համագործակցությամբ, կազմակերպել էր կանադական սննդի ներկայացման միջոցառում:
Աննա Համբարձումյանը | Լուսանկարը՝ Մեդիամաքս
Կանադական սննդամթերքը հայկական քիմքին էին համապատասխանեցրել «Մայրիկ» ռեստորանի շեֆ-խոհարար Աննա Համբարձումյանը եւ նրա թիմը:
«Կանադական հումքն օգտագործելով՝ փորձել ենք հայկական համեր ստանալ: Օրինակ՝ դեղին ոլոռից կրեմ-ապուր ենք պատրաստել, պիստակից, ընկույզից եւ թխկենու օշարակից էլ՝ փախլավայի ռոլեր: Կարծում եմ՝ Հայաստանում կանադական մթերքը կարելի է հայկականացնել եւ օգտագործել մեր քիմքին համապատասխան, որը Հայաստանում եղած կանադացիների համար էլ նոր համի բացահայտում կարող է դառնալ»,- նշեց շեֆ-խոհարարը:
Լուսանկարը՝ Մեդիամաքս
Միջոցառմանը ներկա կանադական «truLocal» առեւտրային կազմակերպության ներկայացուցիչ Կամո Մայիլյանի խոսքով՝ հայկական ռեստորաններին, ներմուծողներին եւ սպառողներին մասնավորապես կարող են հետաքրքրել կանադական ոստրեները, օվկիանոսային ձուկը, ոսպը, սիսեռն ու օշարակները:
Կամո Մայիլյանը | Լուսանկարը՝ Մեդիամաքս
«Կանադական սննդի ոլորտի ապրանքներն աշխարհում աչքի են ընկնում իրենց բարձր որակով: Աշխարհի տարբեր երկրներին Կանադան առաջարկում է այն ամենն, ինչն իրեն թույլ է տալիս արտադրել երկրի էկոլոգիապես մաքուր միջավայրը, որի հիմքում ընկած են զարգացած տեխնոլոգիաներով տարիների հարուստ գյուղատնտեսական եւ ձկնոսական արտադրության ավանդույթները»,- նշել է նա:
Արփի Ջիլավյան
Սվետլանա Թազագուլյան
Լուսանկարները՝ Էմին Արիստակեսյանի եւ միջոցառման կազմակերպիչների
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: