Ռեստորանների միության անդամները հանդիպում են ունեցել ՀՀ էկոնոմիկայի նախարար Վահան Քերոբյանի հետ: Հանդիպման մասին GastroVino-ին պատմել է  միության գործադիր տնօրեն Վահե Գեւորգյանը:

Քննարկման հիմնական առարկա են դարձել կորոնավիրուսի տնտեսական հետեւանքների չեզոքացման 23-րդ միջոցառման շարունակության անհրաժեշտությունն ու զարգացման ծրագրերի հետ կապված հետագա անելիքները:

«Տնտեսավարողների գործունեության շարունակականությանն եւ աշխատատեղերի պահպանմանն օժանդակություն տրամադրվող այս ծրագրի ժամկետն ավարտվում է ապրիլին: Պայմանավորվեցինք, որ աջակցության այդ ծրագիրը պետք է շարունակվի, մինչեւ ոլորտում վերականգնվի շրջանառության գոնե 70 տոկոսը՝ համեմատած 2019 թվականի հետ»,- նշել է Վահե Գեւորգյանը:

Ինչ վերաբերում է զարգացման ծրագրերի մասով հնչած առաջարկություններին՝ միության գործադիր տնօրենը նշել է.

«Հայաստանում գաստրոնոմիկ զբոսաշրջությունը զարգացնելու ավելի երկարաժամկետ ծրագրի համար առաջարկել ենք պետական աջակցությամբ
զբոսաշրջային միջոցառումներում ներառել գաստրոնոմիայի բաղադրիչը:
Այսինքն, երբ Հայաստանը այլ երկրներում զբոսաշրջային ուղղություններին վերաբերող թիրախային միջոցառումներ է անցկացնում, անպայման պետք է ներկայացնել մեր երկրի գաստրոնոմիան՝ տեղային կերակրատեսակներով»:

Խոսելով ռեստորանային ոլորտի ներկայիս իրավիճակից՝ Վահե Գեւորգյանն ասել է, որ ոլորտը դեռ չի հասել առանց վնասի աշխատելու պատկերին:

«Վերջին շրջանում առկա դրական միտումները հիմնականում պայմանավորված են նախկինում հետաձգված միջոցառումների անցկացմամբ, բայց սա ժամանակավոր բնույթ է կրելու: 2019-ի ցուցանիշներից բավականին հեռու ենք, տնտեսության մեջ դրական սպասումների ձեւավորման խնդիրն առկա է մնում: Եթե Երեւանում կարող է լինել խոհանոցային որոշակի ուղղվածության մի քանի բարձրակարգ ռեստորան, որոնցում այցելուների հոսք կա, դա բնավ չի նշանակում, որ ընդհանուր պատկերը բարելավված է»,- հավելել է Վահե Գեւորգյանը:

Արփի Ջիլավյան