×

Լուսանկարը՝ Մեդիամաքս GastroVino-ի թղթակից Անի Խչոյանը լավաշ է թխում

Մեր պատրաստած լավաշը, խորովածն ու տոլման՝ «Պանդոկ Երեւան գետափին» ռեստորանում

«Երեմյան փրոջեքթսը» մեկնարկում է գաստրոզբոսաշրջության զարգացանն ուղղված նոր նախագիծ: Հայաստան այցելած զբոսաշրջիկներն ու բոլոր նրանք, ովքեր հետաքրքրված են հայկական խոհանոցային մշակույթով, «Պանդոկ Երեւան գետափին» ռեստորանում կարող են մասնակցել գաստրոտուրերի, որոնց ընթացքում կծանոթանան հայկական ազգային խոհանոցին, ուտեստների պատրաստման առանձնահատկություններին: 

Մայիսի 10-ին առաջին գաստրոտուրին մասնակցել է նաեւ GastroVino-ն ։

Ավանդական լավաշ 

«Պանդոկ Երեւան գետափին» ռեստորանի բակում մշտապես նոր թխած հացի բույր է տարածվում: Եթե «հացատան» դուռը բաց է, ապա կարող եք լսել նաեւ, թե ինչպես են հացթուխները ավանդական լավաշը թխելու ընթացքում հայկական ժողովրդական երգեր երգում: Միայն այս մասնաճյուղում ամեն օր թխվում է 700-ից 1000 լավաշ: 

Թոնիրները պատրաստված են նույն լայնության ու խորության, եւ յուրաքանչյուր հացթուխ իր թոնիրն ունի: Հացթուխ Նվարդն ասում է՝ «Թոնիրը նեղացկոտ է ու զգում է հացթուխի տրամադրությունը», ապա իր տեղը զիջում է լրագրողներին: Առաջին լավաշն ընկնում է թոնրի մեջ, ինչպես ասում են՝ առաջին հացը միշտ կուտ է գնում։ 


Լուսանկարը՝ Մեդիամաքս Տիկին Նվարդը

Հացթուխներն ասում են՝ այլ տարբերակ չկա, սա էլ ավանդույթի մաս է: Լրագրողները հերթով մոտենում են թոնրին, հետո վերցնում իրենց թխած լավաշներն ու անցնում մյուս «առաքելությանը»: Նվարդն այս ընթացքում հետեւում է, որ թոնիրը թեժ մնա ու պարբերաբար ածուխ է ավելացնում:  


Լուսանկարը՝ Մեդիամաքս GastroVino-ի թղթակից Անի Խչոյանն՝ իր թխած լավաշի հետ

Թփով տոլմա

Գաստրոտուրը շարունակվում է տոլմայի պատրաստմամբ։ Ցանկացած միջուկ, որը փաթաթվում է խաղողի թփով, կարող է կոչվել տոլմա: Շեֆ-խոհարար Նորայր Մխեյանն ասում է, որ յուրաքանչյուր տարի տոլմայի փառատոնին նոր տեսակներ են ներկայացվում. հայտնի է տոլմայի ավելի քան 80 տեսակ: Խոհարարը պատմում է թփով տոլմայի մասին ու հիշեցնում, որ այն հայկական է, ու քանի որ պատրաստման համար երկար ժամանակ է պետք, չի կարող տեղից տեղ տեղափոխվող ժողովրդի խոհանոցին պատկանել: 


Լուսանկարը՝ Մեդիամաքս Նորայր Մխեյանը

Նորայր Մխեյանը ներկայացնում է իր ամենասիրած տարբերակը՝ ավանդական թփով տոլման: Այն պատրաստվում է տավարի աղացած մսից, համեմվում 4 տեսակի կանաչիներով՝ համեմ, սամիթ, մաղադանոս եւ ծիտրոն, անհրաժեշտ է նաեւ լոլիկ ու սոխ: Կարեւոր է խաղողի տերեւների ընտրությունը: Խոհարարն ասում է, որ թփով տոլմայի համար հավաքվում է առաջին տեսակի տերեւներ, սրանք առավել փափուկ են: Տարբեր կարող են լինել ինչպես միջուկները, այնպես էլ տոլմայի թփերը, օրինակ՝ խաղողի տերեւի փոխարեն կարելի է օգտագործել ազնվամորու կամ հազարի տերեւ: 


Լուսանկարը՝ Մեդիամաքս

Խոհարարը հերթով վերցնում է լրագրողների պատրաստած տոլմայի հատիկներն ու դասավորում կաթսայի մեջ, նաեւ շեշտում՝ կաթսայի հատակին անհրաժեշտ է դնել ափսե կամ թփեր։ Բայց, քանի որ մշակում անցած թփերը կարող են իրենց համը տալ հատիկներին, նախընտրելի է ափսե դնել: Խոհարարը ցույց է տալիս, թե ինչպես պետք է դասավորել հատիկները, որպեսզի եփվելու ընթացքում ուտեստի տեսքը չփչանա։


Լուսանկարը՝ Մեդիամաքս

Էրեբունի խորոված

Հետո «Պանդոկ Երեւան գետափին» ռեստորանի խոհանոցում խոհարարն առանձնացնում է շամփուրները։ Ավելի նեղերը, ասում է, նախատեսված են բանջարեղենի, հավի եւ գառան խորովածի համար, հաստ շամփուրները նախատեսված են հորթի, տավարի, խոզի խորովածի համար, իսկ ավելի կարճ շամփուրները՝ թոնրի մեջ պատրաստվող ուտեստների համար: 


Լուսանկարը՝ Մեդիամաքս

Նորայր Մխեյանը լրագրողներին սովորեցնում է պատրաստել Էրեբունի խորոված: Այն պատրաստելու համար անհրաժեշտ է համեմված հավի կրծքամիս, սունկ, լոլիկ, պղպեղ: 

Տարբեր երկրներում կրակի վրա միսը տարբեր կերպ են խորովում: Նորայր Մխեյանը ներկայացնում է հայկական ավանդական խորովածի ու ամերիկյան «բարբիքյուի» տարբերությունները: 


Լուսանկարը՝ Մեդիամաքս Նորայր Մխեյանը

Վերջինի պատրաստման ընթացքում ծխի առկայությունը հասցված է նվազագույնի: Հայկական խորովածի համար ծուխը պարտադիր է: 

«Պանդոկ Երեւան գետափին» ռեստորանում խորովածը պատրաստվում է ածուխով կամ խաղողի վազերով: 


Լուսանկարը՝ Մեդիամաքս

«Յուրաքանչյուր տեսակի փայտ մսին յուրահատուկ համ է տալիս»,- ասում է շեֆ-խոհարարը, ապա նշում, որ խորովածի համար կարելի է օգտագործել նաեւ թզենու ճյուղեր: 

Գաստրոտուրի ավարտին մասնակիցները Հրազդան գետի ափին՝ բացօթյա տաղավարում, համտեսում են իրենց պատրաստած ուտեստները: 

Անի Խչոյան
Լուսանկարները՝ Էմին Արիստակեսյանի

Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Կարդալ ավելին